KINSAY WAY DISIPLINA?
Daghan nang kampanya ang gilusad pagdisiplina sa katawhan. Ubos sa diktadurang Marcos, giingnan ta nga "Sa ikauunlad ng bayan, disiplina ang kailangan." Sa bag-ong panahon, gipabahaan ta sa mga mensahe nga di magpataka og labang sa dan, nga mosakay sa PUJ stops lamang, nga di magpataka og labay sa basura, nga mobayad sa tukmang buhis ug daghan pang ubang mga tugon.
Minilyon ka pesos sa atong buhis ang gigasto sa kagamhanan pagtisok sa mga mensahe sa disiplina sa atong alimpatakan. Gawas sa kaliboan ka polis, traffic enforcers, mga barangay tanod ug mga tigkolekta og buhis nga gipakatap pagtino nga nituman ta sa mga lagda. Nganong gihulagway man lang gihapon ang atong katawhan nga kuwang o wa gyoy disiplina?
-o0o-
Una, bakak ang pasangil. Pipila lang ang nagpabadlong. Ang kinabag-an wa magpataka paglabang sa dan, ang kinabag-an nitultol sa tukmang kanaoganan ug sakayanan sa PUJs, ang kinabag-an nagtarung paglabay sa basura ug ang kinabag-an nibayad sa tukmang buhis.
Ikaduha, di ang katawhan maoy way disiplina. Kon dili ang labing dagkong mga opisyal sa kagamhanan maoy kuwang og dukol. Silay mag-wangwang aron makalusot kon mabara ang trapiko, silay nangyatak sa mga balaod ginamit ang ilang gahom, silay nagpaburot sa katungdanan ug silay tinuod nga nakapabira sa atong nasud ngadto sa lang-og nga gahong nga iya karong nahimutangan.
-o0o-
Taphaw ang bisan unsang kampanya pagdisiplina sa pipila ka sakop sa katilingban. Kay ang gitumong sa mga tigpasiugda mao ang mga sanga. Hinakalimtan ang gamot nga mga hinungdan.
Ang ka-way disiplina sa pipila maisip nga ilang matang sa pagprotesta batok sa labing dagkong mga opisyal sa kagamhanan. Kon wa kasiloti ang mga tikasan sa piniliay, ang labing dagkong tigtimba sa nasudnong panudlanan ug ang higanteng tax evaders, nganong magtagad man sila pagsubay sa mga lagda sa pagtabok sad an, pagsakay sa PUJs, paglabay sa basura ug pagbayad sa tukmang buhis, nga mahimo lang gihapong kawaton?
-o0o-
Ang atong kasaysayan naputos sa mga palusot sa mga haligi sa katilingban. Sa panahon sa mga Katsila, ang mga katungdanan sa kagamhanan nga mahimong huptan sa mga di puti, gipatongan og presyo sa mga pari ug dagkong mga politiko. Maong ang mga duna ray kuwarta maoy magpulipuli sa gahom.
Nakalingkawas na ta sa mga Katsila. Apan di sa ilang kabilin sa pangurakot. Nagbuntaog nga katigayonan lang gihapoy yawe sa tag-as nga katungdanan sa kagamhanan.
Unsa may nahibilin alang sa mga kabos nga maoy kinabag-an? Kon mahurot nang kuwartang ipabaha atol sa kampanya sa mga piniliay? Way lain kon dili ang pag-alsa. Aron pagpahinumdom sa mga nagtungkawo sa gahom kinsa ang tinuod nga Haring Lungsod. Kay di man silang kalusad og rebolusyon matag adlaw, mamaregla lang una og labay sa basura, labang sa dan ug sakay sa PUJ. [30] leo_lastimosa@abs-cbn.com
No comments:
Post a Comment