Thursday, July 31, 2008

Arangkada of Leo Lastimosa for August 1, 2008

            SWITIK SA TEXT

 

            Inay tangtangon ang naglawog sa sayop nga mga linya sa text messaging sa iyang SONA, si Pres. Arroyo padayong nangita og lusot pagbawi sa iyang kauwawan.  Nga nakapasamot hinuon sa kalawom sa gahong nga iyang nahimutangan.  Inay makapasalipod lang unta sa pasangil nga nasipyat lang ang mga nagsuwat sa iyang pakigpung, nisamot na hinuon kalig-on ang pagduda nga ang iyang pamunoan mahiligon gyod og tinabonay—bisan mahitungod ra sa text.

            Usa ka adlaw human tulisoka ang DOTC nga maoy naglawog sa sayop nga kasayuran, nakakita na sab og laing lusot ang mga turutot sa Malakanyang.  Matod nila sakto si Arroyo.  Ang mga naminaw sa iyang SONA maoy nasayop.  Sa ato pa, sama sa naandan, kita na sab diay ang sad-an.

-o0o-

            Matod nila ang gipasabot ni Arroyo sa iyang SONA mao nga gilaslasan og 50 sentabos ang interconnection charges tali sa nagkaribal nga mga kompaniya sa telekomunikasyon.  Kon silay tuohan, kitang naminaw sa SONA maoy nasayop pagsabot nga ang text messages maoy gipasabot ni Arroyo nga gipaus-osan og 50 sentabos.

            Kamo na lay hukom kon kinsay namakak.  Akong gipaminaw og balik ang SONA.  Labi nang kabahin sa text messaging.  Wa gyod maghisgot si Arroyo og interconnection.  Niang upat ka linya sa SONA ni Arroyo nga naghisgot sa text:

            "Texting is a way of life. I asked the telecoms to cut the cost of messages between networks. They responded. It is now down to 50 centavos."

-o0o-

            Mahimo bayang makalusot si Arroyo.  Nga bisan texting ang iyang gihisgutan, ang interconnection charges gyoy iyang gipasabot.  Kon magsusuwat pa lang unta siyag mga tanghaga, makasabot ang katawhan nga naghisgot siyag uwak apan ang kabog gyod diay ang iyang gitumbok.  Pagpatin-aw, di paglibuglibog, ang katuyoan sa SONA.

            Apan ang NTC ra say nibuko sa bag-ong lusot sa Malakanyang.  Ang interconnection charges sa text messaging tali sa Globe, Smart ug Sun P0.35 ra.  Sa ato pa, kon tinuod pang pangangkon ni Arroyo nga gilaslasan og P0.50, utangan unta ang telcos og P0.15 sa matag text nga atong mapada.

-o0o-

            Tinuod hinuon ang pangangkon sa Malakanyang nga naningkamot ang kagamhanan paglaslas sa pinaburot nga interconnection charges sa telcos.  Apan ang nag-ung-ong nga kamandoan sa NTC alang lang sa P0.20 nga us-os.  Diin man kuhaa ni Arroyo ang P0.50?  Bisan asa ipaagi, bisan inaton pang pagsabot sa katawhan, sayop ang SONA.  Ug angayng mangayo og pasaylo si Arroyo.

            Mahimo hinuong tumanon sa Malakanyang ang sugyot ni Sen. Panfilo Lacson nga palayason ang speechwriter nga nag-ilad ni Arroyo sa laslas sa text.  Sayon rang pagpangita og tambasakan sa palasyo nga isakripisyo pagpanalipod ni Arroyo.  Gawas lang kon si Arroyo ang utok sa pagsukip sa sayop nga pangangkon sa text.  Tungod sa kanihit sa mahisgutan sa SONA.  [30]  leo_lastimosa@abs-cbn.com

Wednesday, July 30, 2008

Arangkada of Leo Lastimosa for July 31, 2008

            PAGHOT SA TEXT         

 

            Inay mangayo og pasaylo sa sayop nga pahibawo ni Pres. Arroyo sa iyang SONA nga gilaslasan nang presyo sa text messaging gikan sa P1 ngadto sa P0.50, nga mao untay angayng himuon kon wa pa sila mahubog sa gahom, ang Malakanyang nagdalidali pagpangita og matulisok.  Ilang nakit-an ang DOTC.  Nga mao dayoy gibasol sa paglawog sa sayop nga kasayuran ngadto ni Arroyo.

            Nga mahimong may sukaranan.  Kay si Transportation Sec. Leandro Mendoza mao may nagpagarpar nga kinahanglang librehon ang text messaging.  Bisan gibalibaran na siya sa Smart, Globe ug Sun, niinsistir si Mendoza nga gipaburot pag-ayo sa mga kompaniya ang ilang ginansiya.  Nasobrahan tingaling bilib sa ilang propaganda, mahimong gisipsipan ni Mendoza si Arroyo nga silay responsable sa pagbarato sa text.

-o0o-

            Nga, salamat sa isog nga tigpamaba sa Smart, nabisto dayon nga dako diayng bakak.  Kon nakapamakak ang Malakanyang sa ingon ini kabantang nga transaksiyon, pila pa kaha ka tinagoang mga transaksiyon ang ilang gililong gikan nato?

            Ang mas dakong sayop ni Arroyo mao ang pagpaghot sa text.  Nga ang tinuorayng gipahimuslan sa telcos mao man ang voice calls.  Ang text sa Pilipinas maoy usa sa labing barato sa tibuok kalibotan—mas taas sa Malaysia (P1.07), Indonesia (P1.18), India (P1.51), China (P1.55), Singapore (P1.69), Thailand (P2.71), Taiwan (P4.25), Hong Kong (P5.70) ug Australia (P10.40).

            Apan ang voice calls sa Pilipinas maoy usa sa labing mahal—kon itandi sa Hong Kong nga tag-P1.50 lang matag gutlo ug sa Malaysia nga tag-P4.

-o0o-

            Laing mga palusot sa telcos sa Pilipinas:

·        Namugos sila nga iphon ang voice calls sa mga gutlo inay sa mga gutling o segundos;

·        Nagpaugat pagpahamtang og expiry sa phone cards nga tagsa ka adlaw, o tagtulo ka adlaw, o tagsa ka buwan, inay sa gipatuman sa ubang kanasuran nga tag-unom ka buwan o tagsa ka tuig; ug

·        Padayon silang nangolekta og P4 nga interconnection fee sa matag voice call inay sa P1.50 nga gimando sa NTC.

-o0o-

            Deregulated ang industriya sa telekomunikasyon.  Sa ato pa, di kapamugos si Arroyo nga himuong permanente ang P0.50 matag text tali sa nagkaribal nga networks.  Samang gipikatan lang sa telcos ang nahaunang mga kamandoan sa NTC.

            Nganong di mang kapangisog si Arroyo batok sa telcos?  Inay angkunon ang kredito sa pinugos nga paglaslas sa presyo sa text, nganong di man niya ipatuman ang mga lagda nga mopugos sa mga kompaniya sa telepono pagduko sa mga puwersa sa gawasnong merkado?  Tungod ba kay mas humok ang luna sa iyang kasingkasing nga giokupahan sa telcos ug sa dagko nilang maamot atol sa piniliay?  O tungod ba kay mubo rang lahutay sa iyang pag-ulug-ulog sa katawhan—molungtad lag pila ka adlaw sa di pa ug human sa SONA?   [30]  leo_lastimosa@abs-cbn.com

Monday, July 28, 2008

Arangkada of Leo Lastimosa for July 30, 2008

            TINUOD NGA SONA

 

            Tungod sa kabaga sa mga taho sa iyang gabinete, wa maapil ni Pres. Arroyo ang tanang angayng hisgutan sa napu ka pahina ug 57 ka gutlo niyang SONA.  Isip magbubuhis nga nakatampo sa nagbusdik nang nasudnong panudlanan, niang mga linya nga angay gyod untang giapil sa SONA 2008:

1.     Tungod sa makugihong pangampanya, nakaangkon kog usa ka milyon ka boto nga mayoriya niadtong 2004 ug naluwas ang nasud ug ang katawhan gikan ni FPJ.  (Hunong para pakpak)  Salamat, Garci!

2.     Kay nakasaad man kong palambuon ang agrikultura, nigahin kog dul-an sa P1 bilyon alang sa abuno.  (Hunong kadiyot; kon way mopakpak, padayon)  Sa ngan sa mga mag-uuma, nalipay ang mga politiko.  Mabuhi ka, Joc-Joc!

-o0o-

3.     Sa kadaghan ug kadagko sa krisis nga nahiagoman sa akong pamunoan, malipayon kong motaho ninyo nga krisis ra say nakaluwas nako.  (Ayaw pagpaabot og pakpak)  Salamat, rice crisis!

4.     Ang piniliay sa 2007 labihang lisora.  Ikaduha ra hinuon sa 2004.  Wa koy lig-ong mga kandidato.  Gawas sa mga kanhi oposisyon nga nangluod sa ilang kaubanan ug napugos pag-amen nako.  Apan bisan sa tanang kakulian, nakapadaog tag pipila.  Mabuhi ZTE!

5.     May mga pasangil nga lisod tubagon.  Labi na kon ang namasangil kabahin sa administrasyon.  Apan di mga anghel ang mga nanaway nako.  May mga baho sab sila.  Nga kon mabisto, makabuong sa kakatuohan bisan unsa kamatinud-anon ang mga pasangil nga giluwatan.  Salamat sa ikaduhang pamilya ni Jun Lozada!

-o0o-

6.     Nibali na si Joe de Venecia.  Kahadlokan tinuod ang iyang pagkontrolar sa mga kongresista.  Apan sa wa pang katuyhakaw, siyay unang nahagsa sa kudeta sa Kongreso.  Mabuhi ang Katas ng VAT!

7.     Bisan unsa na lay eskandalo nga gisablig sa akong pamunoan.  Apan may niulbong mga eskandalo nga nakamatuod nga di nako monopoliya ang pakauwaw.  Salamat, Sulpicio!

8.     Nasayop ko sa pagpasalig nga may pagkaon sa matag lamesa.  Nasayop ko sa pagsaad nga maka-eskuyla ang tanang bata.  Nasayop ko sa pagsangyaw nga mahimo na tang first world country.  Apan salamat sa mga ahensiya nga nakakumbinser sa katawhan nga di ako maoy labing bakakon.  Mabuhi, Pagasa!

-o0o-

9.     P32 na lang ang bugas.  Nahunong nang kotong.  50 sentabos na lang ang text.  Ni-us-os og P1.50 ang diesel.  Bantay lang, Shell!  Panguros nang daan, Smart!

10.           Ang survey sa Pulse Asia sa 2007 nihulagway nako nga labing kurakot.  Ang SWS nipahibawo nga -38 na lang ang akong net satisfaction rating.  Ang Pulse Asia nisibya nga kinabag-an nagtuo nga bakak ang tanan nakong SONA.  Apan di tanang surveys kasaligan.  Salamat, AGB Nielsen!
11.    Napilde nakong tanang samuk-samok nga impeachment complaints, hungaw nga mga kudeta ug ahat nga mga protesta sa kadalanan.  Kinsay nag-ingon nga kutob ra ko sa 2010?  Pekat, Noli, Loren, Mar, Manny ug Ping!  [30]  leo_lastimosa@abs-cbn.com

Arangkada of Leo Lastimosa for July 29, 2008

            SONA SA 2001

 

            Sa labing unang SONA ni Pres. Arroyo niadtong Hulyo 23, 2001, unom pa lang ka buwan human siya nakabanos sa Malakanyang, nipasalig siya nga pakigbatokan ang kakabos pinaagi sa (1) gawasnong patigayon nga may konsiyensiya; (2) modernisasyon sa agrikultura; (3) pagpalabi sa mga kabos; ug (4) pagpalambo sa moralidad sa kagamhanan ug katilingban.

            Pito ka tuig human sa iyang pagtungtong sa labing taas nga katungdanan, si Arroyo napakyas paglupig sa kakabos.  Gani, ang iyang ahensiya, National Statistical Coordination Board (NSCB), niangkon nga nidaghan ang wa ka-eskuyla sa elementarya ug high school tungod sa kakabos.  Sukwahi sa pasalig ni Arroyo, padayon ang mapahimuslanong patigayon, napasagdan ang agrikultura, gitalikdan ang mga kabos ug nitibugsok pag-ayong moralidad sa iyang pamunoan.

-o0o-

            Atol gihapon sa labing una niyang SONA, nisaad si Arroyo nga  (1) aporan og mga libro ang tanang tinun-an sa Grades 1, 2, 3 ug 4 ug sa 1st ug 2nd year high school; ug (2) gahinan og P1.5 bilyones ang pagkuha og dugang mga magtutudlo ug pagpausbaw sa ilang suholan.  Apan hangtod karon padayong nag-ilogay og mga libro ang mga tinun-an sa public schools ug pabiling kuwang ang, ug napasagdan ang suholan ug benepisyo sa, mga magtutudlo.

            Nisaad sab si Arroyo og P6 bilyones alang sa irigasyon, P2 bilyones alang sa mga bodega sa mga abot sa mga mag-uuma, P2 bilyones alang sa infrastractura, P2 bilyones alang sa pahuwam ug P2 bilyones alang sa pagtuon sa bag-ong mga teknolohiya sa panguma.  Ang higanteng krisis sa bugas karong tuiga maoy nakabisto nga wa igkita ang P14 bilyones nga iyang gisaad alang sa agrikultura.

-o0o-

            Mao  sab ni nahitabo sa uban pang mga saad sa SONA ni Arroyo pito ka tuig ang nilabay:

·        2,000 ektaryas nga luna sa kagamhanan ang iapud-apod sa Carp ug 150,000 ka kabos nga mga pamilya ang makapalit sa mga luna nga ilang gipuy-an matag tuig.  Si Arroyo mismo niangkon nga pakyas ang Carp ug nga kinahanglan ning lugwayan; ug

·        Laslasan og katunga ang presyo sa nag-unang mga tambal.  Gipikatan na siya sa mga pabrika sa mga tambal, naglangay-langay pa gyod si Arroyo pagpirma sa balaod pagpaubos sa presyo sa tambal.

-o0o-

            Pito ka tuig ang nilabay, nisaad si Arroyo nga papason nang Abu Sayyaf.  Pila ka adlaw sa wa pang iyang SONA karong tuiga, ang mga bandido nakadagit sa mga kawani og kooperatiba ug, pila ka semana ang nilabay, gilambigit pa gani sa pagdagit nilang Ces Drilon ug kaubanan.

            Pito ka tuig sang nilabay nga unang nisaad si Arroyo ang P1 bilyon alang sa modernisasyon sa kapolisan ug binilyon ka pesos alang sa modernisasyon sa armadong kusog.  Mahimong nabuhong nang mga heneral.  Apan ang kasarangang mga polis ug mga sundawo naglaway sa mas makiangayong mga benepisyo nga gipaibog nila.  [30]  leo_lastimosa@abs-cbn.com

Sunday, July 27, 2008

Arangkada of Leo Lastimosa for July 28, 2008

          LISTA SA MGA SAAD

 

          Di mabasol ang kinabag-an sa katawhan nga di na motuo sa Sona bisan wa pang kasugod og pakigpung si Pres. Arroyo.  Abunda ang ilang sukaranan sa pagduda nga igo lang silang bakakan.  Niang pasiuna nakong listahan sa mga saad ni Arroyo nga wa matuman:

·        Nga may pagkaon sa matag lamesa;

·        Nga ang Evat makapalambo sa atong pagpuyo;

·        Nga iyang ipabilanggo ang mga kawatan sa kagamhanan apil nang mga sakop sa iyang pamilya;

·        Nga ang matag sakop sa gabinete may ikapakita nang sangpotanan sa ilang kampanya batok sa pangurakot;

·        Nga molambo ang ekonomiya ug mahimo na tang first world country;

·        Nga mapulbos nang Abu Sayyaf pila ka tuig ang nilabay;

·        Nga mapapas nang rebelyon sa mga komunista;

·        Nga makab-ot nang kauyonan sa kalinaw uban sa mga rebelde;

-o0o-

·        Nga bilangguon niyang mga magpapatigayon nga nanago sa bugas ug nagpaburot sa presyo;

·        Nga mabadlong na ang sindikato sa smugglers sa nagkalainlaing mga pantalan sa nasud;

·        Nga mapalambo ang edukasyon;

·        Nga malibre ang edukasyon sa elementarya ug high school;

·        Nga ang matag bata maka-eskuyla;

·        Nga matukoran og eskuylahan ang matag barangay;

·        Nga maaporan og mga libro ang matag tinun-an;

·        Nga malaslasan nag katunga ang mga pirma nga gikinahanglan sa mga transaksiyon ug mapalambo ang pangalagad sa nagkalainlaing mga buhatan sa kagamhanan;

·        Nga makamugna siya og kapin sa usa ka milyon ka bag-ong trabaho matag tuig;

·        Nga matapos nang laktod nga mga pagpamatay ug kahatagan og hustisya ang mga biktima;

·        Nga mapabarato ang presyo sa tambal;

·        Nga mabalanse ang nasudnong budget;

·        Nga mapalambo ang koleksiyon sa buhis;

·        Nga masilotan ang tax evaders;

·        Nga mahiusa na ang nasud;

-o0o-

·        Nga mamugna ang usa ka milyon ka bag-ong patigayon ug laing usa ka milyon ka trabaho sa agrikultura;

·        Nga makahuwam og pundo ang tulo ka milyon ka gagmayng mga magpapatigayon;

·        Nga kahatagan og tubig nga mainom ang matag barangay;

·        Nga mapaluag nang kahuot sa trapiko ug patigayon sa Metro Manila, Sugbo ug ubang dagkong dakbayan;

·        Nga mapalambo ang Clark ug Subic isip sentro sa patigayon sa Asya;

-o0o-

·        Nga ma-computerize nang piniliay;

·        Nga kahatagan og 150,000 ka baratong mga pinuy-anan ang mga kabos matag tuig;

·        Nga masulbad nang suliran sa higanteng utang sa Napocor;

·        Nga ang kagamhanan di na makigkumpetinsiya sa pribadong mga negosyo;

·        Nga mamenosan ang gidaghanon sa mga kabos;

·        Nga maapud-apod ngadto sa mga mag-uuma ang 1,000 ka ektarya nga pribadong luna ug 1,000 ektarya sa luna sa kagamhanan; ug

Saturday, July 26, 2008

Arangkada of Leo Lastimosa for July 27, 2008

    KINAHAM NGA PAGKAON

    Usa sa labing halandumong bahin sa atong mga kasinatian mao ang pagkaon.  Ang atong gikaon sa gagmay pa tang mga bata.  Ang giluto sa atong inahan sa pagpamalhin nato og bay.  Ang hikay o mga putahe sa atong kasal.  Labing lamian nga mga pagkaon nga atong natilawan sa nagkalainlaing mga dapit nga atong naduaw.
    Bawon nga mga pagkaon maoy nakahimong gaan ug lingaw sa among 220 ka kilometro ug siyam ka takna nga biyahe pag-apud-apod sa mga hinabang alang sa mga biktima sa bagyong Frank sa Daanbantayan sa amihang tumoy sa Sugbo niadtong Miyerkules.  Labing halandumon ang mapasalamaton nga mga panagway sa mga nawad-an sa ilang mga pinuy-anan.  Apan sikit nga nagsunod ang lamian namong mga pagkaon.
        -o0o-
    Pagsugod pa lang sa biyahe, ang tag-iya sa mga sakyanan alang sa among mga hinabang ug mga boluntaryo nangompra nag daghang puso ug barbecue sa Liloan.  Sa hapit matag lungsod nga among nalabyan, may gipagawas nga bag-ong mga putahe--chicharon sa Carcar, buwad nga nukos ug humba sa Mandaue, meat roll ug masareal sa Didang's ug rosquillos sa Titay's.
    Tungod sa labihan nang kabusog, gilaktawan na lang ang gidumtan unta namong manok Bisaya sa Catmon ug budbod kabog sa Sogod.  Makabusdik sang paniudto ang gipaandam ni Mayor Sun Shimura sa Daanbantayan.  Maong labihang daghana pang pagkaon ang nahibilin sa among pagbalik.  Apan wa ning kapugong sa tag-iya sa among gihuwaman nga mga sakyanan, nga hugtanong nipasidaan nako nga di gyod sila ilhon, pagpangompra og labihang inita pang pintos sa Bogo.
        -o0o-
    Nahibawo kong matag usa nato may kinaham nga mga pagkaon sa nagkalainlaing mga dapit nga atong nasuroyan.  Apan pipila ra tingali ang naghago paghimo og listahan.  Tugoti nga mangahas ko paghimo og ako:
  • Kanding nga sinabwan sa Bulacao, Talisay ug kaldereta sa Ramos;
  • Nukos nga sinudlan og karne sa Pardo ug sizzling nukos nga sinilihan sa Neo-Neo;
  • Gisagol nga kinilawng isda, bat ug kinhason sa Mangga District ug kodja sa Kainggit sa Tagbilaran;
  • Lambay sa Madridejos ug boneless danggit sa Bantayan;
  • Tinowa sa Taboan ug sinugbang isda ug linarang sa bato sa Pasil;
            -o0o-
  • Kinawa nga lumi sa Manalili, utan kamunggay sa Cathedral ug ginabot sa Mabolo;
  • Tawilis ug salad nga dahon ug buwak sa Tagaytay;
  • Chicharon nga isda sa Sham Shui Po ug shabu-shabu sa Mongkok sa Hong Kong;
  • Inasal nga kanding sa Iligan; tilaob nga pilit ug balanghoy nga chicharon sa Camiguin, lanzones sa Mambajao ug pastel sa Cagayan de Oro;
  • Tapang isda ug aping sa baboy sa Danao;
  • Siomai sa Tisa, batchoy sa Capitol, Bulalo sa Jones ug balbacua sa Leon Kilat.
  • Ampaw ug takoy sa Carcar, torta sa Argao ug bingkang Mayol ug bingkang kabog sa Mandaue; ug
  • Salbaro, lumpia de mani ug bukhayo sa Palompon.  [30]  leo_lastimosa@abs-cbn.com

Friday, July 25, 2008

Arangkada of Leo Lastimosa for July 26, 2008

          TSAMBA NI GLO

 

          Nakatsamba si Pres. Arroyo sa iyang pagtugot sa passenger vessels sa Sulpicio Lines paglawig apan alang lang sa mga kargamento.  Gidid-an lang gihapon niya ang Sulpicio sa pagpamasahero.  Ning paagiha, natagbaw ni Arroyo ang nagkasungi nga mga hut-ong:

·        Iyang natubag ang kabalaka sa mga magpapatigayon sa natanggong nilang mga kargamento ug napiang nga mga patigayon; apan

·        Napasaligan sab niyang nagbangotan nga mga kabanay sa nangamatayng mga pasahero sa MV Princess of the Stars nga wa pa niya absuweltoha ang kompaniya gikan sa responsibilidad sa katalagman.

Kon ingon ini pa lang unta kamanggialamon ang tanang mga hukom ni Arroyo, di unta magkabulingit ug mangalisbo pag-ayo ang iyang pamunoan.

-o0o-

          May sukaranan hinuon ang katawhan nga nagtuo nga, human sa Hello Garcia scandal nga nakapahimutang sa pagduda sa kaligdong sa mandatong nadaog sa piniliayng presidensiyal niadtong 2004, di na siyang takos nga makahimo og mga lakang nga makaayo sa kinabag-an.  Ug nga ang iyang tsamba nga paghapsay sa kontrobersiya sa mga barko sa Sulpicio:

·        Mahimong tungod lang kay naminaw sa tambag sa pipila ka mga opisyal nga di kabahin sa iyang naandang mga sinaligan nga magsige lang og tila sa iyang lapalapa; o

·        Mahimo sang di lang gyod ingon ana kasikit sa luwag ang kadagkoan sa Sulpicio, nga andam niyang duphan bisan unsay pakauwaw nga pasiugdahan.

-o0o-

          Sa kataposan, human sa way kinutoban nga kalangay, nipirma na gyod og kauyonan ang Sulpicio sa kontrata uban sa Salvage Titan Corp.  Apan nanglipaghon una og kapin sa adlaw ang kadagkoan sa Malakanyang.  Kay wa man tumana sa Sulpicio ang gipahibawo sa palasyo nga pagpirma sa kontrata niadtong Miyerkules.  Nipirmang Sulpicio lapas na sa oras nga tingtrabaho ug dayon nang panihapon niadtong Huwebes.

          Ug ang kontrata di alang sa refloating sa barko.  Kon dili alang lang sa pagkuha sa makahilong mga kemikal, nga naglakip sa 10 metricas toneladas nga endosulfan sa Del Monte Philippines.  Sa ato pa, wa gyod hingpit nga mapadugo ang Sulpicio.

-o0o-

          Sa makausa pa, nabantang ang tinuod nga bulok sa Sulpicio.  Lisod sabton ang ilang pagdumili paghatag sa mga biyuda sa nangamatay nilang mga tripulante sa samang benepisyo nga ilang gitanyag ngadto sa mga kabanay sa nangamatay nga mga pasahero.

          Ang pag-insistir sa Sulpicio nga ipatuman ang collective bargaining agreement uban sa unyon sa mga kawani nga P40,000 ray bayad dakong bugalbugal.  Ilang mga tripulante maoy nag-atiman sa ilang mga barko, nagpalihok sa ilang patigayon ug nakatabang pagtumpi sa dako nilang ginansiya.

Itom na ba gyod diay kaayong ilang kasingkasing nga nakaako man paghikaw sa benepisyo alang sa mga pasahero, nga wa gani nila mailhi ni igkita, gikan sa ilang mga kawani nga matinud-anong nag-alagad sa kompaniya sa daghang katuigan?  [30]  leo_lastimosa@abs-cbn.com

Thursday, July 24, 2008

Arangkada of Leo Lastimosa for July 25, 2008

            NAGKATUIRIS LANG

 

            Kon imong paminawon ang nagkalainlaing ahensiya sa kagamhanan, maglibog ka kon unsa nay nahitabo sa mga barko sa Sulpicio Lines—pila nay gitugotan nga makabiyahe ug pila ang pabilin nga gigakotan sa mga pantalan:

·        Si Transportation Secretary Leandro Mendoza nipahibawo human sa tigom tali ni Pres. Arroyo ug sa mga tag-iya sa Sulpicio nga walo ka barko sa Sulpicio ang sublion pag-inspeksiyon sa Marina;

·        Ubang mga turutot sa Malakanyang niangkon nga wa pay bisan usa sa mga barko sa Sulpicio nga gipalarga;

·        Ang Marina niinsistir nga 13 ka mga barko sa Sulpicio ang ilang susihon pagbalik; nga maoy nitakdo sa

·        Pahibawo sa Sulpicio nga pito ra nila ka cargo vessels ang gitugotan nga makalawig ug 13 nila ka passenger-cargo vessels ang gidid-an sa paglawig.

-o0o-

            Kon pasikaran ang talaan sa Marina, ang Sulpicio dunay 22 ka barko.  Mahimong ang pito ka cargo vessels nga gitugotan nga makalawig naglakip na sa MV Panama 17 nga gigamit sa nagpadayong search and retrieval operations sa Romblon, Masbate ug kasilinganang mga lalawigan.  Mahimo sab nga ang 13 ka passenger-cargo vessels nga giingong gigaid sa mga pantalan wa maglakip sa duha ka barko—ang MV Cebu Princess ug MV Cagayan Princess—nga gigamit sab pagpanghakot sa nabangalan nga mga patayng lawas.

            Hinaot nga ang wa magkadimao nga mga numero sa Malakanyang nataligam-an lang.  Ug nanukad lang sa kakuwang o ka-wa gyoy pakiglambigit sa Marina ug ubang buhatan sa kagamhanan.  Apan di kaha magkayamukat sang ilang mga hukom kon nagkatuiris nang daan ang mga kasayuran nga gipasikaran?

-o0o-

            Laing kalibogan tungod sa nagkatuiris nga kasayuran nga gihatag sa Malakanyang:  Kanus-a man gyod kasugdi ang pagpalutaw pagbalik sa MV Princess of the Stars?

·        Unang pahibawo sa palasyo mao nga uyon nang Sulpicio nga maoy mogasto sa refloating;

·        Sunod nga pahibawo sa palasyo nga ipa-uwahi ang refloating kay unahon ang pagkuha sa makahilong mga kemikal ug lana sa barko;

·        Nipahibawo ang Malakanyang nga pirmahan nang kontrata tali sa Sulpicio ug Titan Salvage Corp. niadtong Miyerkules; apan

·        Ang bag-ong pahibawo mao nga ang kontrata alang diay sa survey pagtultol sa nahimutangan sa makahilong mga kemikal.

-o0o-

            Unsay wa isulti sa Malakanyang?

·        Nga ang Salvage Titan molihok lang kon bayran og cash sa Sulpicio ang katunga sa presyo sa kontrata ug nga garantiyahan sa kagamhanan ang balanse;

·        Nga ang tinuod nga hinungdan nganong hangtod karon wa pa gyod mapirmahi ang kontrata tali sa Salvage Titan ug Sulpicio mao nga wa pa gyoy klaro kinsay mobayad; kay

Ang insurer sa nalunod nga barko, Oriental Insurance Corp., nagdumili pagdawat sa notice of abandonment sa Sulpicio kay di gusto nga maoy maka-um-om sa P4.5 bilyones nga bayranan sa refloating.  [30]  leo_lastimosa@abs-cbn.com

Wednesday, July 23, 2008

Arangkada of Leo Lastimosa for July 24, 2008

            P3M NGA HINABANG

 

            Daanbantayan, Amihanang Sugbo—Kapoy ug kutas.  Apan gaan ug lingaw.

            Malipayon kong motaho ninyo nga na-apud-apod nang mga hinabang ngadto sa mga biktima sa bagyong Frank sa Sugbo.  Mao na ni ang ikawalo ug kataposang dapit nga may mga pinuy-anan nga hingpit nga nagusbat sa bagyo.  Ang tahas nga giisip nga imposible natuman.  Ang gimbuhaton nga labihang lisora nahuman na.

            Ang pagpangayo og tabang alang sa mga biktima sa katalagman di sayon.  Ang labing lisod nga bahin mao nga unsaon pagtigom og igong gidaghanon sa hinabang nga maapod ang tanang mga biktima, o bisan ang labing grabe lang nga naigo.  Apan mas lisod ang paghakot sa mga hinabang ug pag-apud-apod nila sa mga biktima.

-o0o-

            Salamat sa kamanggiluy-on, kamahigugmaon ug kamanggihatagon sa mga Sugbuanon.  Nagbaha ang mga hinabang nga among nadawat.  Di lang sa Radiothon sa KBP sa Sugbo, Bohol ug Negros Oriental.  Kon dili, ug labi na, sa Kapamilya Relief Campaign sa DYAB Abante Bisaya ug ABS-CBN Cebu.  Labihang daghana sa mga hinabang nga gawas nga naapod ang Sugbuanong mga biktima, may nahibilin pa alang sa Iloilo ug ubang mga lalawigan sa kasadpang Kabisay-an.

            Dihang nagpakitabang ta paghakot sa mga hinabang alang sa isla sa Bantayan, may nagpahuwam dayon og barko ug mga trak.  Dihang nagpakitabang ta paghakot sa mga hinabang alang dinhi sa amihanang tumoy sa Sugbo, may nagpagamit dayon sa ilang mga trak ug daghang niboluntaryo paghakot ug pag-apud-apod sa mga hinabang.

-o0o-

            Sa kinatibuk-an, nakahatag na ta og hinabang sa 5,477 ka mga pamilya.  Ang Talisay City mao ray nagrabehan sa habagatang Sugbo.  Ang laing pito ka mga dapit pulos nahimutang sa amihanan:  Bantayan, Madridejos ug Sta. Fe sa isla sa Bantayan; ug San Remegio, Bogo City, Medellin ug Daanbantayan sa mainland.

            Ang matag pamilya nahatagan og P127.50 nga balor sa food packs ug P400 nga balor sa used clothes.  Sa ato pa, ang tanang hinabang nga naapud-apod na nikabat og P2,889,117.50.  Kon iapil ang mga hinabang nga padayon pang nagbaha sa ABS-CBN Broadcast Complex, kapin sa P3 milyones ang balor sa tanang hinabang.

-o0o-

            Kana mao lang ang pinaubsan nga banabana sa bili sa mga hinabang.  Wa pa maapil pagkuwenta ang panahon nga gigahin sa gatosan ka mga boluntaryo sa pagbaswat, pagputos ug pag-apud-apod sa mga hinabang.  Ingon man ang gasto sa lana sa mga trak ug barko paglatas sa gatosan ka kilometro nga mga agianan paingon sa mga biktima sa bagyo.

            Maong, sa makausa pa, daghang salamat sa tanang nakatampo sa ilang kuwarta, kabtangan, panahon, kahago ug pangaliya.  Nahuman na ta sa Sugbo apan wa pa matiwas ang kinatibuk-an natong tahas.  Hinaot magpadayon ang inyong tabang paghatod sa atong mga hinabang sa Iloilo ug kasilinganang mga lalawigan.  [30]  leo_lastimosa@abs-cbn.com