KABILIN NI BUSH
Ning bisperas sa piniliayng presidensiyal sa Estados Unidos, samtang ang atensiyon sa tibuok kalibotan masentro nilang Barack Obama ug John McCain, ang labing dakong kamingaw ug kahaw-ang mabatyagan sa gitinguha nila nga pulihan, si US Pres. George Bush. Ang pangu sa Republican Party morang nasakit og sangla:
· Si McCain naglikay nga makit-ang mangampanya uban niya, nisaway sa iyang mga binuhatan ug nisalikway sa bisan unsang mga pasangil nga iyang padayunon ang mga lakang ni Bush nga nakapasilag sa nagkalainlaing kanasuran ug nakapahagsa sa kalibotanong ekonomiya; ug
· Ang iyang pildehunon nga mga kandidato pagka senador ug pagka kongresista morang mga San Pedro nga naglumba pagpanghimakak og bisan unsang kalambigitan niya.
-o0o-
Ang wa nay pupanagana nga pagsalikway sa iyang mga alyado maoy labing sakit nga tampok sa garbo ni Bush. Kinsa pila ka tuig ang nilabay, dihang nagpahimus pa siya og popularidad nga 70% pataas, way kukauwaw nga nilingka sa ubang kanasuran ug sa iyang kaugalingong katawhan paglusad sa gubat nga wa kinahanglana ug di niya madaog.
Human sa pagkawaldas sa binilyon ka dolyar nga nakapatibugsok sa Amerikanhong ekonomiya, sa pagkamatay sa kaliboan ka Amerikanhong mga sundawo ug sa mas daghan pang inosenteng mga sibilyan, ang Iraq mas nagkaguliyang ug mas nagkadugo. Nataligam-an pa gyod ang mas mahinungdanong gubat sa Afghanistan ug sa pagpangita sa utok sa pagpangatake sa 9/11.
-o0o-
Kataposan nakong nakit-an si Bush pila ka semana ang nilabay pagpatin-aw niya unsaon pagtabang sa mga institusyon nga nabangkarota tungod sa krisis nga wa niya mabaraw. Mas tiguwang na, nagkanga-kanga nang nibasa sa teleprompter, nawa nang garbusong tuyhad ug mapalabilabihong mug-ot.
Bisan kinsa tingali sa sapatos ni Bush mahugno sab: 20% na lang ang approval rating (pasabot, dul-an sa 80% sa mga Amerikanhon wa na malingaw sa iyang salida); siyay labing inutil nga itik sa kalibotan sukad ni Harry Truman; ug ang nag-ung-ong nga bangis nga hukom sa kasaysayan niya isip usa sa labing pulpol nga presidente sa kasaysayan.
-o0o-
Labing dakong kauwawan ni Bush mao nga siyay naghimo sa labing dakong hagit alang ni bisan kinsang mosunod niya: Ang paghaw-as sa US sa kinalawoman nga gahong nga siyay nagkawot. Labing makapangutngot sa iyang tanlag: Ang mopuli niya mahimong bantogan samang Lincoln o Roosevelt kon makabuntog sa higanteng krisis nga iyang gibilin.
Si Bush gitanyagan og krisis pagmatuod sa iyang liderato. Apan gigamit niyang kahigayonan aron magpakauwaw. Karong hapit na manamilit, may sukaranan ang pangutana: Nganong siya man intawoy napili? Napilde siya sa popular vote sa 2004. Salamat sa depektusong mga balota sa Florida nilabaw siyag 500 botos ug nakuhang electoral votes. Labing lantip nga hubad sa iyang pagdaog: Mas maayo siyang mopahiyom kay sa tuskig nga si Al Gore. [30] leo_lastimosa@abs-cbn.com
No comments:
Post a Comment