GARBO NI GWEN
Hain na man ang pasalig sa kadagkoan sa Kapitolyo nga nagkapuliki sila og pamalibad sa mga pundok nga nag-ilogay sa pag-abang sa Cebu International Convention Center (CICC)? Segun sa mga motorista nga makaagi sa CICC matag adlaw, mas daghang adlaw nga nagmingaw ang kontrobersiyal nga building. Kon mao, hain na man diay ang gipasigarbo sa Kapitolyo nga nasudnon ug kalibotanong mga kombensiyon nga magpila sa CICC?
Nabisto na bang kamatuoran nga ang CICC di diay world class suma sa gipatuo sa Kapitolyo? Nga ang mga liki sa bungbong, busluton nga atop, gubaon nga mga pansayan ug naglukut-lukot nga carpet di diay angayng himuong tinubdan sa garbo? Kon dili sa kauwawan?
-o0o-
Ang mga numero nga giluwatan sa Kapitolyo sa kita sa CICC di makapadasig. Ang buhatan ni Gobernador Gwen Garcia nipahibawo nga nakatigom ang CICC og P15 milyones hangtod niadtong Pebrero karong tuiga, 13 ka buwan human gisugdan paggamit ang building. Nagpasabot ba ni nga P1.2 milyones ray kita sa CICC matag buwan? Kon kuhaan sa P700,000 nga gasto sa maintenance matag buwan, lisod ipatin-aw nga tunga sa milyon ka pesos ray binuwan nga kita sa CICC.
Kon tinuod ang pangangkon nga ang P15 milyones natigom sud lang sa unom ka buwan, ang P30 milyones nga tinuig nga kita sa CICC mumho ra gihapon. Siyam-siyaman ang Sugbuanong mga magbubuhis una makabawi sa gibanabanang dul-an sa P1 bilyon nga gasto.
-o0o-
Dihang gisugyot pang pagtukod sa CICC, gikuwestiyon sa nagpakabanang mga sektor ang panginahanglan ini. Apan tungod sa 12th Asean Summit, nakalusot ang proyekto. Karong nahuman nang summit, inanayng natinuod ang mga pasidaan sa mga nisupak sa proyekto: Nga langawon ang CICC kay duna nay mas dagko ug mas maayong convention centers nga giduma sa pribadong mga kompaniya.
Samtang nagdumili pa hangtod karon paghatag og kuwentada sa kinatibuk-ang gasto sa pagtukod sa CICC, ang kadagkoan sa Kapitolyo angay sang mopasabot nganong giuna ang proyekto nga wa hingpit nga kapusli. Inay gastuhon alang sa mas dinaliang mga panginahanglan, sama sa pagpalambo sa district hospitals aron di na maghuot ang mga pasyente sa Vicente Sotto Memorial Medical Center.
-o0o-
Usa ka nagpakabana nga magbubuhis nihulagway sa CICC nga morang babayeng mabdos nga nagbikangkang. Di kong kadason ni kasalikway ana kay di man ko arkitekto. Samang di ko ka-komentaryo sa pangangkon sa usa ka inhinyero nga ang labing maayong bahin sa CICC mao ang parking lot.
Posible hinuon nga ang parking lot sa CICC mao ang makaluwas ini gikan sa hingpit nga pagka way kapuslanan. Kon tinuod ang pangangkon sa pipila ka mga mamalitay. Nga gigamit na isip extension parking alang sa mga sakyanan nga di na mapaigo sa silingan nga shopping mall. [30] leo_lastimosa@abs-cbn.com
No comments:
Post a Comment