AWIT SA INTERNET
Gisultihan na ta mo nganong di ko ganahan nga mag-download og MP3 files sa akong kinaham nga mga awit. Kay di ko gustong mapuno ang akong hard disk ug mokamang ang akong PC. Gawas pa, tungod sa kapaspas na karon sa internet connection, mahimo na kong maminaw og mga awit online pinaagi sa Lastfm, Imeem, Grooveshark ug daghan pang uban.
Apan alang nimong ganahan gyong makaangkon og kopya sa mga kanta nga mahimong patokaron bisan offline, duna koy isugyot nga mas maayo pa kay sa gipanggukod na nga mga kompaniya sama sa Limewire, Bittorrent, Ares ug uban pa. Dunay laktod nga paagi sa pagtultol sa minilyon ka MP3 files nga naglutawlutaw sa internet. Uban sa tabang sa labing gamhanang search engine sa kalibotan—ang Google.
-o0o-
Dugay na ning katakos sa Google pagtultol sa tanang MP3 files nga gibutang sa websites o blogs sa mga unibersidad ug pribadong mga indibiduwal. Apan wa magamit sa kadaghanan kay nadani sa ilegal nga mga paagi pag-download. Hasol sab ang pagtultol sa tanang MP3 files kay nagkatag sa kaliboan ka websites.
Mas sayon ang paggamit sa Google kay di na ka kinahanglang mo-download og application, sama sa Limewire ug Ares. Mora ra kang mananggi og mais gikan sa libraries sa mga kanta. Kana kon imo silang matultolan. Dunay websites nga tagsa ra ka MP3 file ang sud; apan duna say namungingi og gatosan o kaliboan ka mga kanta.
Andamang imong kaugalingon. Niang yawe pagtultol sa minilyon ka MP3 files sa nagkalainlaing bersiyon sa mga awit sa akong kinaham nga banda, nakatag-an ka, ang Beatles: http://tinyurl.com/oblada.
-o0o-
Mas taas ang aktuwal nga URL. Ako lang gimubo pinaagi sa tinyurl.com alang sa imong kasayon. Kon matultolan na nimo, usba ang kataposan nga pung ("Beatles") ug ilisi sa imong kinaham nga banda o mag-aawit.Pananglitan, matultolan nimo ang tanang kanta sa U2, http://tinyurl.com/bonou2; o sa Eraserheads, http://tinyurl.com/eraserh; o ang tanang kanta sa pasko, http://tinyurl.com/pasko08.
Ikaw nay bahala unsay sunod nimong buhaton. Wa nay makabuwag nimo ug sa imong kinaham nga mga awit. Ayaw lang palabig download kay tingalig magbagulbol nang imong hard disk. Ayaw sab i-burn sa CDs aron ibaligya. Kay pirata ray mohimo ana.
-o0o-
Apan kon sama nako matagbaw na kang maminaw og mga kanta online ug hasolan nang mag-download, duna koy bag-ong nakaplagang mga paagi pagtilok sa tanang nindot nga kanta sa Imeem ug Lastfm:
· Sa Imeem, mahimo kang mobutang sa search box di lang sa ngan sa banda o mag-aawit kon dili hasta sa matag sa kanta, sama sa Christmas, o baroque, o jazz, o rock; ug
* Sa Lastfm, mahimo kang maghimo og estasyon sa tanan nimong kinaham nga awit pinaagi sa paggamit og tag nga ikaw ray makatultol, sama sa "leo lastimosa". [30] leo_lastimosa@abs-cbn.com
No comments:
Post a Comment