PAGPILI SA KAUSABAN
Dihang gideklarar si Barack Obama nga mananaog sa labing taas ug labing kutas nga piniliay pagka presidente sa Estados Unidos, iyang naamgohan nga si Sen. Hillary Clinton ang mas higpit niyang kaatbang. Mas lisod ang iyang kampanya pagkuha sa nominasyon sa Democratic Party. Mas sayon niyang gipilde si Sen. John McCain.
Salamat sa higpit, emosyonal ug nainat pag-ayo nilang panagsangka ni Clinton, ug sa makalilisang nga kuwarta nga iyang natigom, natukod ni Obama ang labing lapad, labing gamhanan ug labing ambisyusong makinarya sa kampanya. Nga nidugmok sa bisan unsang kahigayonan ni McCain paglahutay. Mahimong di ni angkunon ni Obama, apan ang iyang paghuwam sa mensahe sa kampanya ni Clinton maoy nakatino sa iyang kadaogan batok ni McCain.
-o0o-
Di monopoliya ni McCain ang pag-usab-usab sa mga linya sa kampanya. Gidayeg niya si Pres. George Bush, dayon gisaway niya si Bush, gihulagway niyang disente si Obama, dayon nipasidaan siya nga kahadlokan si Obama. Si Obama nilusad sa iyang kandidatura pinasikad sa awhag nga papaulion ang kasundalohang Amerikanhon gikan sa Iraq ug usbon ang paagi sa pagduma sa kagamhanan. Nidaog siya sa mensahe sa ekonomiya.
Si McCain giisip nga masuk-anon, natarantar ug nagkabuang sa nag-usab-usab nga tuno sa iyang kampanya. Apan si Obama malampuson nga nigakos sa mensahe ni Clinton, nituhog ini sa iyang kaugalingong mga sugilanon ug mga sukaranan sa pagdagan ug nikumbinser sa mga botante nga siyay labing takos nga mohaw-as nila gikan sa ekonomikanhong krisis nga ilang nahimutangan ug sa duha ka gubat nga ang sinugdanan mahimong ilang gipaluyohan apan karon wa na nila masabti unsay padulngan.
-o0o-
Si Clinton maoy orihinal nga nisagop sa malampusong linya sa kampanya sa iyang banang si kanhi presidente Bill Clinton: "It's the economy, stupid." Samtang si Obama nagsigeg hisgot sa Iraq, si Clinton nipintal sa kalisod sa kahimtang sa katawhan ug nitanyag sa iyang pag-unong sa ilang pag-antos.
Kon mas sayo pa untang nihagsa ang kalibotanong ekonomiya, mahimong si Clinton ang nakakuha sa nominasyon ug sayon sab untang nipilde ni McCain. Apan way makahikaw ni Obama gikan sa paghupot sa makiangayon niyang luna sa kasaysayan.
-o0o-
Way nakaila ni Obama upat ka tuig ang nilabay. Hangtod sa iyang pakigpung sa Democratic Convention nga nipurung-purong sa pildero nga si John Kerry. Tinuod nga wa matay-og ang kalibotan sa paglusad sa iyang kandidatura. Apan ang iyang kahilaw natabonan sa iyang kalmang determinasyon. Ang ka-way kasinatian napulihan sa makinaadmanong kalantip. Maong ang mas hinog nga mga kaatbang nahugno atubangan niya.
Mahimong mas hinog silang Clinton ug McCain kay niya. Mahimong mas undanon ang ilang mga mensahe kay sa iya. Apan mas katuohan si Obama. Siya ang mas matinud-anong dagway sa kausaban nga dugay nang gipangandoy sa kinabag-an. [30] leo_lastimosa@abs-cbn.com
No comments:
Post a Comment