LUOYNG KONSUMIDOR
Usa sa labing nataligam-an dinhi sa Sugbo mao ang kawsa sa mga konsumidor. Kinsa gisayun-sayon lang pagpahimus sa mga magpapatigayon—gikan sa binuang nga mga promo ngadto sa kuwang nga mga sukli. Kini tungod sa kainutil sa kagamhanan pagpatigbabaw sa katungod sa mga konsumidor. Ug sa kainutil sa mga konsumidor pagpanalipod sa ilang kaugalingon.
Ang pagkatap sa melamine sa mga gatas gikan sa Tsina maoy labing uwahing ebidensiya di lang sa kapakyas sa kagamhanan pagbantay sa kalidad sa mga produkto sa pagkaon. Kon dili sa ka-wa gyoy dag-anan sa mga konsumidor kon makahilo, inay makapahimsog, ang mga pagkaon nga ilang gipamalit.
-o0o-
Ila-ilaha ug palihug ipangaliya ang pipila lang sa mga buhatan sa kagamhanan nga gitugyanan unta apan napakyas pagpatuman sa mga balaod nga gitumong pagpanalipod sa mga konsumidor:
· Department of Trade and Industry (DTI): Gawas nga nagmika lang sa pagpatuman sa Price Act, napakyas pa gyod pagtino nga ang mga produkto lang nga nakapasar sa mga lagda sa kalidad ang mabaligya sa mga tindahan;
· Bureau of Food and Drugs (BFAD): Utrong naghagok sa katungdanan, mangolekta lang og food samples kon duna nay mangasakit o mangamatay ug manggungis na lang ang mga biktima di pa mahibaw-an ang sangpotanan sa laboratory examination; ug
· Department of Agriculture (DA): Eskandalo nang daan nga way napabilanggo sa kartel sa bugas ug sa pagmaniobra sa presyo sa mga produkto sa agrikultura sa kamerkadohan, wa pa gyod hingpit nga kapatuman sa pagdili sa makahilong mga kemikal sa mga umahan.
-o0o-
Kon ang kagamhanan maoy saligan, makaluluoy ang mga konsumidor. Kay kasagaran sa mga buhatan nga gitahasan pagpanalipod sa mga konsumidor, tua kapusta sa pikas. Ang pipila ka mga buhatan nga may pagbati unta sa mga konsumidor, labihan sab katalawan ug katapolan paghimo sa ilang katungdanan.
Maong ang mga konsumidor na lay nahibilin nga manalipod sa ilang kaugalingon. Ang subo nga kamatuoran mao nga wa nay consumers group nga naglihok sa Sugbo karon. Sayon ra kaayo silang gidakdakan sa taas nga plitehan ug presyo sa mga palaliton ug mga palusot sa patigayon.
-o0o-
May mga pagsuway karong bag-o pagtukod og bag-ong pundok sa mga konsumidor. Hinaot nga mas malampuson sila kay sa nag-unang mga pagsuway. Ang nangu sa bag-ong mga paningkamot mao ang senior citizens nga dagkong mga opisyal sa kagamhanan niadto. Nga maoy labing takos nga mangu sa mga konsumidor tungod sa kahinog sa ilang kaalam ug kasinatian. Di hinuon makapadasig nga tilimad-on ang ilang kapakyas pagpanalipod sa ilang kaubanan nga gihikawan sa 20% nilang diskuwento sa mga botika, mga kan-anan ug mga sakyanan.
Tinuod gyong sulti sa atong katiguwangan: Kon ang pagbuhat sama pa lang kasayon sa pagsulti, ang tanang payag mga palasyo na unta karon. [30] leo_lastimosa@abs-cbn.com
No comments:
Post a Comment