UTANG SA SULPICIO
Makapasubo ang reklamo sa mga kabanay sa mga tripulante sa nalunod nga MV Princess of the Stars nga hangtod karon wa pa silang kadawat og bisan unsang benepisyo gikan sa Sulpicio Lines Inc. Lisod tuohan nga, upat na ka buwan human sa pagkalunod sa barko, wa pay nahatag ang Sulpicio nga bisan usa ka dako ngadto sa mga tagtungod sa mga nagduma sa ilang mga barko sud na sa daghang katuigan.
Tinuod bang gipasagdan lang sa kadagkoan sa kompaniya ang nagkalisudlisod intawon nga mga biyuda, mga ginikanan ug mga igsuon? Nga gipanggutom na karon. Kay ang mga tripulante, nga gikahadlokang nalunod uban sa barko, mao ray ilang gisaligan sa inadlaw-adlawng panginahanglan.
-o0o-
Namakak ba diay ang Sulpicio Lines sa ilang pasalig nga ang tanang natino nga nakasakay sa nalunod nga barko, ma-pasahero man o ma-tripulante, nailhan na man ang patayng lawas o wa pa, bayran dayon nila og P200,000 matag usa? Hain na man diay tong ilang pagtino nga ang mga sakop sa unyon makadawat sab og samang kantidad, bisan kon P40,000 ray gitakda nga bayad sa ilang collective bargaining agreement (CBA)?
Kon nagpatuo ang Sulpicio nga manggihatagon sa mga pasahero, nganong gihikawan man sa samang mga benepisyo ang ilang mga tripulante? Nagtuo bang mga pasahero ray kamaong mokiha? Ug nagsalig nga ang ilang mga tripulante mahimo lang ulug-ulogan?
-o0o-
Mas lisod tuohan nga magpaugat lang gihapon ang Sulpicio human napaso sa nahauna nilang pagpabaya sa mga panginahanglan sa mga biktima sa katalagman nga gibasol sa Board of Marine Inquiry (BMI) sa ilang pagpabaya. Kaingon man nako nga naleksiyon nang kadagkoan sa kompaniya. Human gituman sa Dakbayan sa Sugbo ug ubang buhatan sa kagamhanan ang ila untang mga gimbuhaton.
Apan kublan gyod tingali og kasingkasing ang mga tag-iya sa Sulpicio. Kay inay atimanon dayon, gipasa-pasa man lang gihapon ang mga tagtungod sa mga tripulante.
-o0o-
Apil sa nagpanon sa Arangkada sa DYAB Abante Bisaya mao ang mga paryente sa janitors sa Princess of the Stars nga gi-suplay sa ahensiya ni Provincial Board Member Tito Gastardo ngadto sa Sulpicio. Mora intawon silang mga bola sa pingpong:
· Gibalibaran sila sa Sulpicio kay adto lang sila makakobra sa mga benepisyo gikan sa ahensiya ni Gastardo; apan
· Ang ahensiya nibalibad sab kay wa pa sila bayri sa Sulpicio bisan giunsa na pag-apura ni Gastardo, kay kasagaran sa mga biktima taga Daanbantayan man; apan
· Ang Sulpicio nipasabot ni Gastardo nga nagpaabot pa sila nga bayran sa ilang insurance company.
Sa kasamtangan, ang mga kabanay sa mga tripulante wa nay gikaon, wa
nay ikagasto pagpadayon pagpa-eskuyla sa ilang mga anak, wa nay ikabayad sa mga utang, ni sa pagpatambal sa masakiton nilang mga kadugo. [30] leo_lastimosa@abs-cbn.com
No comments:
Post a Comment