Arangkada of Leo Lastimosa for October 22, 2008

            BAWON SA MOSCOW

 

            Karong nahibalik na sa Pilipinas si Heneral Eliseo dela Paz, ang retiradong comptroller sa PNP nga gitanggong sa Moscow human nasakpang nagtago og P6.9 milyones nga balor sa euros, nabutyag ang mas makapakugang nga mga kasayuran gikan mismo sa iyang baba:

·        P9.2 milyones diay ang kinatibuk-an nga bawon sa delegasyon sa kapolisan sa PNP alang sa tigom sa Interpol sa Rusya, nga naglakip sa P2.3 milyones nga gahin nga giaprobahan sa PNP ug sa P6.9 milyones nga buwag niyang gikuha gikan sa panudlanan sa PNP; ug

·        Ang kalapasan ni dela Paz pagtago sa dakong kantidad nga iyang bawon nasubli-subli sa gidaghanon sa mga tugpahanan sa nagkalainlaing kanasuran nga iyang gisudlan ug gigawasan sa taas nilang biyahe gikan sa NAIA paingon sa Moscow.

-o0o-

            Si dela Paz nipasabot sa iyang gipatawag nga press conference sa mga hinungdan sa iyang pagda og dakong bawon ngadto sa Moscow:

·        Nahibawo siya nga ang hotels sa Moscow sama kamahal o mas mahal pa kay sa hotels sa ubang dagkong dakbayan sa kalibotan;

·        Nangandam siyang daan sa mga gastohan sa posibleng mga aksidente nga motumaw atol sa ilang pagbiyahe ug sa tigom sa Interpol; ug

·        Nagpaabot na siyang daan nga makagasto sila sa mga tigom uban sa mga delegado sa ubang kanasuran nga ilang ikatagbo gawas o human sa kalibotanong tigom sa Interpol.

-o0o-

            Sayop si dela Paz sa tanan niyang pangandam.  Kay nahuman na lang ang tigom ug namauli na lang sila balik sa Pilipinas, wa siyang kagasto og bisan usa ka dako sa P6.9 milyones nga balor sa euros nga iyang bawon.  Kana kon atong tuohan ang tanan niyang pangangkon.

            Bahala nag lisod tuohan, apan kon nagsulti sa tinuod si dela Paz, wa silay bisan gamayng gasto sa ilang pagsud-gawas sa mga tugpahanan, bisan sa mga takna nga nagpaabot sa ilang connecting flights, ug sa kinatibuk-an nilang pagpuyo sa Rusya, bisan sa daghan ug mahalong mga baligya nga nagpaibog sa luho nilang palibot.

-o00-

            Gawas lang kon naikog pag-ayo silang dela Paz ug kaubanan sa paghilabot sa dako nilang bawon.  Kay gikusi ang ilang mga tanlag sa mga payag-payag nga police stations sa Maguindanao ug ubang hilit nga mga dapit sa nasud.  Kay gidaog sila sa labihan kaikog sa kabos nga mga magbubuhis kansang makugihon nga pagtukaw ug panlimbasog maoy nagbuhi nila ug sa ilang mga pamilya.  Kay gilumsan sa nagbaha nga kaligdong ug katarung ang ilang mga kasingkasing ug way laing nahimo gawas sa pagkuot sa ilang kaugalingong mga panudlanan alang sa personal nilang mga panginahanglan.

            Mahimong pakpakan sila sa katawhan kon mao nay ilang gihimo.  Apan magmatuod sab na og mas dakong eskandalo:  Nga di lang si dela Paz ang nagtago og dakong bawon.  [30]  leo_lastimosa@abs-cbn.com