KATALAGMAN SA DAKIT
Ang Landco Pacific, developer sa Monterrazas de Cebu, di makaikyas sa responsibilidad sa taga liog nga baha nga nahiagoman sa mga molupyo sa Sityo Dakit sa Barangay Guadalupe sa Dakbayan sa Sugbo dayong tungang gabii niadtong Lunes. Kay samtang tinuod ang ilang pasangil nga ampay nang daan sa baha ang Dakit bisan sa wa pa sila, di ikalimod nga nisamot ang suliran sa pagsugod sa ilang pagkabkab sa kabukiran.
Di igo ang panagang nga nakahimo na sila og detention ponds. Nga gimando sa Cebu City Hall human sa makalilisang nga pagbaha sa samang dapit unom ka buwan nang nilabay. Ang bag-ong baha maoy nagmatuod nga kuwang pa ang ilang gihimo.
-o0o-
Sa ilang paningkamot nga makapanalipod sa higanteng proyekto, ang kadagkoan sa Landco nakaluwat og pamahayag nga di lang bangis ngadto sa mga biktima apan makapaulbo sab sa kasuko sa ubang mabuot nga mga Sugbuanon. Inay mangayo og pasaylo human niangkon og responsibilidad sa baha, ang kadagkoan sa Landco nihapit pa gyod pagpanamastamas sa mga biktima:
· Nga ang baha mahimong gikan sa nabara nilang mga kanal kay itom man ang tubig;
· Nga nisamot ang baha tungod sa kadaghan sa gipataka lang og labay nga mga basura;
· Nga kasarangan lang ang baha kay naa man sila pagtukod sa ilang mga panimay sa sapa; ug
· Nga ang mas malungtarong sulbad sa suliran mao ang ilang pagbakwet ngadto sa mas luwas nga dapit.
-o0o-
Bisan kon nahapitan lang paghisgot ug bisan may sukaranan pang tanang pamahayag sa kadagkoan sa Landco—nga mga iskuwater ang taga Dakit, nga mga hugawan sila, ug nga mas magmalinawon ang ilang panghunahuna ug mas molambo ang ilang pagpuyo kon dawaton ang gitanyag nga relocation site—di tawhanon ang pagsaway nila pila lang ka takna human nahiagom og katalagman.
Makapatandog sa balatian ang hulagway sa mga bata nga nahukaw gikan sa ilang paghinanok dayong tungang gabii ug gidali pagbakwet sa barangay uban sa mga inahan aron nga di mangalumos. Maong lisod sabton nganong inay pangayoan og pasaylo, palayason na man hinuon gikan sa ilang mga pinuy-anan.
-o0o-
Apan ang Monterrazas igo lang nakasunod sa nangalisbong kabilin sa pagpabaya. Nga naumol sa daghang katuigan sa panagkonsabo sa mga opisyal sa kagamhanan ug sa nag-unang developers pagbuni sa mga sapa ug mga kanal ug paggusbat sa kinaiyahan.
Ang pagpabilin sa mga molupyo sa Dakit bisan sa hulga sa baha simbolo sa katimawa. Di sa pagpahimus. Mas salawayon ang kapakyas sa kagamhanan pagbalhin nila ngadto sa mas luwas nga kapuy-an. Ang pagtukod sa higanteng mga tigbayon sa ilang palibot, sa way paglantaw nga nahimo nang mas hagip-ot ug mas kuyaw ang ilang kahimtang, nagmatuod unsa ra gyod diay sila kagamay. [30] leo_lastimosa@abs-cbn.com
No comments:
Post a Comment