PAGPATAG SA BUKID
Ang mga pasalig sa developer sa gipasigarbo nga usa sa labing dakong subdivision sa Sugbo, ang Monterrazas de Cebu, sa kahabog ug kaluho sa ilang kabalayan ug kahingpit sa ilang panagang batok sa baha nameligrong mahagsa sa yuta. Kon kapamatud-an ang pasangil nga ang higanteng subdivision maoy tinubdan sa nibaha nga anapog nga gituohang nakabuni sa mga kanal ug nakapatumaw sa lapas-sa-tawo nga baha. May sukaranan nga mahimangod ang mga nagpuyo sa napu ka mga panimay nga gilunopan.
Nipasidaan si Cebu City Councilor Gerardo Carillo, tsirman sa Cebu City Disaster Coordinating Council (CDCC), nga mahimong makanselar ang lisensiya sa developer. Nipasabot si Carillo sa DYAB Abante Bisaya nga angayng susihon tinuod bang ang proyekto nakahudlat sa kinabuhi ug kabtangan sa kasilinganan.
-o0o-
Ang Monterrazas de Cebu, hinugpong proyekto sa Genvi Development Corp. (nga giduma sa managsuong Augusto ug Margarita Villalon) ug Landco Pacific Corp., magyaka sa walo ka bungtod sa lima ka barangay—Guadalupe, Sapangdaku, Labangon, Tisa ug Buhisan—nga may gitas-on nga upat ka kilometro ug kinatibuk-ang gidak-on nga 200 ka ektarya.
Kon tinuod nga ang subdivision maoy hinungdan sa baha, ang mga tagduma kapasanginlan nga namakak sa ilang pasalig nga magtukod og detention ponds, nga mobalor og tag-P2 milyones matag usa, aron paglikay sa baha. Matod sa mga molupyo gibahaan sila niadto kon mag-uwan. Apan mohubas dayon ang tubig. Nipuno sila nga karong nasugdan nang Monterrazas wa nay hubas-hubas ang tubig ug niabot na og taga-liog ang baha sa ilang kabalayan ug lapas-sa-tawo duol sa nainutil nga kanal.
-o0o-
Makalilisang nang daan ang baha gikan sa mga bungtod sa Dakbayan sa Sugbo sa wa pang Monterrazas de Cebu. Gikahadlokan ang pagtumaw sa mas bangis nga katalagman karon nga gisugdan na pag-upaw ang kabukiran. Ang baha sa Dakit nakapahimutang sa pagduda sa katakos sa kagamhanan pagpanalipod sa mga molupyo sa mga dapit nga giumbawan sa proyekto.
Unsa may ikasulti sa kagamhanan ngadto sa mga biktima? Nga natsambahan lang sila ug nga di na mausab ang baha? O nga mas maayong mobakwet na lang sa mas luwas nga dapit? O nga mas mahinungdanon ang binilyon ka pesos nga kitaon sa proyekto kay sa ilang kaluwas?
-o0o-
Ang mga proyekto sama sa Monterrazas de Cebu makatabang pagpalambo sa Sugbo. Makamugna nig dugang kahigayonan sa patigayon ug panrabaho. Apan sa unsa nga presyo?
Mahimong matukod ang subdivision sa way pagguba sa kinaiyahan. Kay kon mangahas ta paghilabot sa kinaiyahan, wa gyod tay dag-anan. Ang bag-ong mga teknolohiya di kasagang sa yuta nga giabuno sa sapa gikan sa pagkahunlak. Kon wa kapugni ang pagdahili sa anapog, unsa man ang atong garantiya nga di mosunod pagkasiak ang gitabas ug gipatag nga mga bungtod? [30] leo_lastimosa@abs-cbn.com
No comments:
Post a Comment