NATANGGONG
Kon mag-taxi ko pauli gikan sa akong gitrabahoan, di ra ko abtan og lima ka gutlo. Kon magbaktas, 12 ka gutlo. Niadtong Huwebes sa gabii, naabtan kog 18 ka takna una nakapauli sa bay.
Lima ra ka oras nga nabara ang trapiko sa Mandaue ug amihanang Sugbo tungod sa pagbangga sa container van ug trak nga puno sa anapog sa kinasang-an gyod sa North Road ug Canduman Road. Ang dugang 13 ka takna nga kalangay sa pagpauli ako nang tinuyoan.
Wa ko mag-inusara sa paglangay-langay. Kuyog mi sa akong asawa.
-o0o-
Pipila ka gutlo human sa bangga, ang sakyanan sa akong asawa natanggong sa Marcelo Fernan Bridge. Uban sa laing kaliboan ka mga sakyanan nga nabara hangtod sa Subangdaku sa habagatan ug sa Liloan sa amihanan.
Masaligon siya nga, sama sa nangaging mga aksidente sa eskina Canduman, makalihok nang trapiko human lang sa pipila ka gutlo. Apan pagkakita nako sa kadagko sa mga sakyanan nga nagbangga ug sa kaapiki sa agianan nga kalutsan, gitambagan nako siya sa pagpangita og kahunongan kay ako siyang adtuon.
Nisakay dayon ko sa labing unang bakante nga PUJ nga nakalusot. Sa inilang fastfood chain duol sa gasoline station nga nabantog sa kalimpiyo sa ilang pansayan mi nag-abot.
-o0o-
Daghan nang mga motorista nga nakauna namo didto. Kasagaran nila nangaon. Ang uban sayo nga nag-inom. Pulos nakumbinser nga abtan og pila ka oras una makalihok ang trapiko.
Ang akong asawa nakapalit nang daan og pansit ug adobong tangkong gikan sa Mabolo. Maong namalit na lang mig extra rice ug nangayog tinidor. Samtang nangaon, nanglabay sa among atubangan ang baga nga panon sa katawhan nga nakaamgong mas paspas ang baktas kay sa pag-unong sa ilang mga gisakyan.
-o0o-
Dihang alas-9 na ug wa pa gyod kairog ang mga sakyanan, nanawag mi sa suki namong beach resort sa Mactan aron adto mangatug. Apan fully-booked sila. Alas-10, dihang maglisod nag buka akong mata, nanakay mi sa sakyanan ug nagpa-reserba sa telepono sa labing unang hotel nga may bakante.
Nisugot ang akong asawa nga mangatug mi sa hotel kon mosaad kong di motrabaho pagka ugma. Niyango ko bisan nagplanong mpbangon og kadlawon aron makatungha sa akong tulomanon sa radyo. Apan higanteng labad sa ulo ang akong namat-an.
-o0o-
Gawas nga nagping-it sa kasakit sa akong ulo, ang kadako sa bayranan sa hotel nga naglakip og libreng buffet breakfast maoy nakaaghat nako pag-text ni June Perez nga mahimo bang siya lang unay moduma sa Arangkada? Puslan mang na-absent, udto na ming namauli sa among bay.
Hawan nang nahitaboan sa aksidente. Nikagiw na sang akong labad sa ulo. Apan ang hulga sa pagkabara sa tibuok amihanang Sugbo kon may duha na sab ka higanteng sakyanan nga di magkasabot nagpabilin. [30] leo_lastimosa@abs-cbn.com
No comments:
Post a Comment