SAAG SA BUGAS
Ang hukom sa Malakanyang pagkuha sa NFA rice gikan sa mga merkado makapakugang. Apan may igong sukaranan. Samtang ang kamerkadohan maoy naandan nga palitanan sa bugas, bisan kinsa lang say makapalit. Tungod sa pagmahal pag-ayo sa commercial rice, bisan ang arang-arang nga mga pamilya, nga di maoy gipahinungdan sa baratong bugas sa kagamhanan, nakadugang sa kataas sa mga pila sa NFA outlets. Nga maoy gilikayan sa kagamhanan kay mosukwahi sa ilang pasalig nga way krisis sa bugas.
Mahimong mapapas nang mga pila sa kamerkadohan. Apan mobalhin ang mas taas nga pila ngadto sa mga munisipyo, barangay halls ug ubang balhinan sa pagbaligya sa baratong bugas. Ang kakuwang og kasinatian sa bag-ong mga tigbaligya og bugas gikahadlokan nga mopasamot, inay mopakalma, sa kayagaw.
-o0o-
Sakto ang tumong sa Malakanyang. Pinaagi sa pagkuha sa NFA rice gikan sa mga merkado, matino na gyod nga ang makadawat ini mao ra ang labing kabos nga mga pamilya nga di kaabot sa presyo sa commercial rice. May gamay lang problema. Unsay garantiya nga ang labing kabos gyoy makadawat sa bugas?
Wa katabang pagpapas sa pagduda sa kamatinud-anon sa kagamhanan pagtabang sa mga kabos ang pagtugyan sa Malakanyang ngadto sa lokal nga mga opisyal sa pag-apud-apod sa NFA rice. Bisan ang pasalig nga motabang ang social workers sa DSWD pag-ila sa labing kabos nga mga molupyo wa makapakumbinser ni bisan kinsa. Kay unsa man intawoy mahimo sa social workers kon singkahan na sila sa mga politiko pagpalabi sa ilang mga dumadapig?
Gawas pa, kon natakboyan na sa kagaw sa pamolitika ang Korte Suprema, Simbahang Katoliko ug ubang mga institusyon, ang DSWD na lang kahay pasayluon sa kamapahimuslanon sa mga nagtungkawo sa gahom?
-o0o-
Bisan ang lokal nga mga opisyal may sukaranan sa pagpanagana pagduma sa pag-apud-apod sa bugas. Kay bisan unsa pa kamakiangayon sa sistema nga ilang huptan, di mahitabo nga ilang matagbaw ang tanang nagkinahanglan. Under-the-bunal sila sa NFA. Kon 20-30 ka sako rang bugas ang ihatag matag lungsod, magpiyesta gyod sila sa balikas sa mahikawan nga mga konsumidor.
Pun-an pa sa mga politiko nga determinadong mobusog lang sa ilang mga dumadapig. Maglaway na ba lang ang mas kabos nilang politikanhong mga kaatbang?
-o0o-
Tungod sa sibaw nga mga protesta, ang duha ka adlaw nga lugway pagkuha sa NFA rice gikan sa kamerkadohan giinat sa Malakanyang ngadto sa duha ka semana. Di ko mahibung kon dalidalion pagbakwi sa palasyo ang ilang hukom.
Kay ang mga lakang sa Malakanyang pagpanagang sa krisis sa bugas pulos marka pataka. Mas tulibagbag kay sa manok nga giputlan og liog. Di man gud pagtabang sa katawhan ang tinuorayng katuyoan. Kon dili ang pagtino nga magpabilin si Arroyo sa gahom. [30] leo_lastimosa@abs-cbn.com
No comments:
Post a Comment