KASOSYO NI KING
Ang bugtong ahensiya sa kagamhanan nga gitugotan pag-import og bugas humay mao ang National Food Authority (NFA). Apan ang NFA nisud og supply ug importation contracts uban sa Philippine International Trading Corporation (PITC). Ubos sa kontrata ang PITC makahimo pagtugot sa mga kooperatiba sa mga mag-uuma pagpangompra sab og bugas gikan sa gawas sa nasud.
Nganong mga mag-uuma? Nipasabot ang NFA aron kadugangan ang ilang kita labi na sa mga buwan nga motidlom ang ilang ani. Apan ang mga mag-uuma way minilyon ka pesos nga gikinahanglan pagpamalit og bugas humay gikan sa Vietnam ug ubang kanasuran. Maong naka-enter the dragon ang mga magpapatigayon. Silay tinuod nga nabuhong sa patigayon sa bugas. Ginamit, sama sa naandan, ang ngan sa mga mag-uuma.
-o0o-
Nga maoy gamot nga hinungdan ning kontrobersiya nga nahiagoman sa batan-ong magpapatigayon nga si Regan Rex King. Nabulilyaso siya di tungod sa pagtanggong sa Bureau of Customs sa iyang kargamento. Labaw nang di tungod sa pagronda sa National Bureau of Investigation (NBI) ug NFA sa inabangan niyang bodega sa Cabancalan, Mandaue City. Kon dili tungod sa iyang pagkabayo sa mga mag-uuma.
Ang lokal nga mga opisyal sa PITC niangkon nga si King "kasosyo" sa kooperatiba sa mga mag-uuma nga maoy nalista nga consignee sa natanggong nga kargamento nga 30,000 ka sakong Vietnamese rice. Wa sila magtagad pagpasabot nganong nakaapil sa salida ang adunahang magpapatigayon, nga di gani tingaling kaila og guna gikan sa sundang, sa programa nga gitumong paghaw-as sa mga mag-uuma gikan sa katimawa.
-o0o-
Ang Commission on Audit (COA) dugay rang nakabantay sa mga buslot sa kontrata tali sa NFA ug PITC. Niadtong 2000, walo na ka tuig ang nilabay, gibisto sa COA ang mosunod nga kahiwian:
· Ang duha ka kontrata sa NFA ug PITC nga balor og dul-an sa $30 milyones wa matarung pagpatuman nga ang bugas nangabot sa mga buwan nga wa na sila kinahanglana; ug
· Ang NFA way kasayuran pila ang kinatibuk-ang bugas humay nga na-import sa PITC.
-o0o-
Makapaalarma ang ikaduhang punto nga gibisto sa COA. Unsa man tinuod ang garantiya nga nabayran ang tukmang buhis sa kagamhanan sa tanang importasyon sa bugas humay nga gitugotan sa PITC? Nga ang NFA, nga maoy tagduma sa industriya sa bugas, wa mang kahatag og kuwentada ngadto sa COA pila ka barkong bugas ang nangabot pinasikad sa bill of lading sa rice importations?
Kon tinuod ang pangangkon ni Customs Collector Ricardo Belmonte nga P27 milyones ang gibayad ni King ngadto sa ilang buhatan, mahimo bang isulti sab ni King giunsa niya pag-ila-ila ang mga mag-uuma sa Luzon ug nga pilay iyang gipahinungod nila, bisan tungod na lang sa pagkaduhig sa ilang ngan sa iyang kontrobersiya? [30] leo_lastimosa@abs-cbn.com
No comments:
Post a Comment