BUSLOT NGA IRIGASYON
Maglisod si Pres. Arroyo pagtubag sa mosunod nga yanong matematika sa bugas humay nga gitanyag ni kanhi presidente Fidel Ramos:
· Ang 1.2 milyones ka toneladas nga bugas humay nga komprahon sa Pilipinas gikan sa gawas sa nasud karong tuiga napilu-pilo og kaupat kon itandi sa 300,000 toneladas nga gi-import sa nasud niadtong 1998;
· Ikapatin-aw lang ang dakong pagburot sa importasyon kon napilu-pilo sab og kaupat ang populasyon sa Pilipinas;
· Mahimo sab ning ikapasabot kon napilu-pilo og kaupat ang gidaghanon sa bugas humay nga makaon sa matag Pilipino; ug
· Kay lisod mang tuohan nga nitubo og kaupat ang populasyon o ang kinan-an sa katawhan, mas katuohan ang pasangil ni Ramos nga wa matarung ni Arroyo pagduma ang agrikultura.
-o0o-
Laing numero nga lisod ipasabot ni Arroyo: Hain man padung ang P3.1 bilyones nga gahin alang sa patubig sa mga humayan? Si Agriculture Secretary Arthur Yap niangkon nga nakadawat siya og kasayuran nga ang kuwarta wa moabot sa gitumong nga mga proyekto. Apan ambot madutlan ba kay ang mga nakapahimus giila man nga pulos mga alyado ni Arroyo.
Si Ramos mismo nibisto sa masulub-ong gidangatan sa iyang gipasiugdahan nga San Roque Multi-Purpose Dam Project sa iyang kaugalingong nataran sa Pangasinan. Ang proyekto gisugdan pagtukod sa pamunoang Ramos ug nahuman sa paglingkod nang Arroyo. Apan hangtod karon wa pang kapaagas og bisan usa na lang ka tulo nga tubig. Salamat sa gibasol ni Ramos nga "sobrang pamolitika."
Apan si Ramos dunay iyang kaugalingong agenda. May sukaranan ang pagduda nga nitingog na sab kay may gipangayo na sab tingaling wa mahatag sa palasyo.
-o0o-
Ang Bayongan Dam Irrigation Project sa Bohol, nga gihulagway nga maoy labing mahalon nga irigasyon sa tibuok kalibotan, kay gibanabanang mobalor og P600,000 matag ektarya, o kinatibuk-ang P1.5 bilyones, gikahadlokan nga di kapuslan sa mga mag-uuma:
· Nagsalig ni sa tubig nga moawas gikan sa Malinao Dam, maong nameligro nga maughan kay ang kinatibuk-ang kapasikad sa Malinao nakapatubig lang sa 65% sa iyang gialagarang mga umahan;
· Gatosan ka Bol-anong mga mag-uuma nawad-an og panginabuhi kay wa nay manurok sa ilang mga umahan human pataga alang sa irigasyon; ug
· Ang mga mag-uuma gipabayad og P3,000 alang sa taphaw kaayong serbisyo sa Malinao Dam, kay makakuha lang sila og tubig kon mag-uwan.
-o0o-
Si kanhi Neda Director General Romulo Neri nihulagway sa proyekto nga ilegal, niputol sa gahin alang ini ug nitandi sa kahiwian ngadto sa kontrata pagpalit og Toyota nga gipatuman pinaagi sa pagpalit sa mas mahalong BMW.
Ang gidak-on sa nausik nga pundo sa Bayongan gilista nga nisunod sa higanteng mga anomaliya sa Bataan Nuclear Power Plant (sa panahong Marcos) ug Expo Pavillion sa Pampanga (nga natukod atol sa pamunoan ni, nakatag-an mo, Ramos). [30] leo_lastimosa@abs-cbn.com
No comments:
Post a Comment