Arangkada of Leo Lastimosa for April 17, 2008

            GANTI SA PAGTABI

 

            Ang duha ka institusyon nga nasentro sa kontrobersiya sa Sugbo karong semanaha—ang Vicente Sotto Memorial Medical Center (VSMMC) ug ang Monterrazas de Cebu—nipasundayag og managlahi nga paagi pagtubag sa mga pasangil batok nila:

·        Ang VSMMC, nga gipasanginlan nga nidupa sa iyang mga doktor ug nurses nga nagbugalbugal sa pasyente nga ilang gi-operahan, dugay nga nagpakahilom ug karon na lang nitingog human nihulga ang biktima nga mokiha; samtang

·        Ang Monterrazas, nga gibasol sa mga mga molupyo sa Dakit, Guadalupe, Cebu City nga maoy sad-an sa pagdahili sa anapog ug paglunop sa ilang kabalayan, niangkon dayon og responsibilidad ug nihatag dayon og hinabang ngadto sa mga biktima.

Managlahi sab ang sangpotanan.  Ang Monterrazas mahimong nakalingkawas na gikan sa labing makadaot nga bahin sa kontrobersiya.  Sa pikas nga bahin, ang VSMMC padayong nagkabulingit sa mga pasangil sa pagtabon ug pagpabaya.

-o0o-

            Pulos seryuso ang mga kalapasan nga gipasangil batok sa VSMMC ug Monterrazas.  Ang tambalanan nagpakahilom sud sa upat ka buwan bisan nabisto na ang pagpakauwaw sa iyang mga kawani sa ilang pag-opera sa 39 anyos nga pasyente nga napaskan og body spray sa usa ka bahin sa iyang lawas.  Samtang ang Monterrazas wa katuman sa ilang pasalig nga ang ilang multi-milyones pesos nga balor sa detention ponds makasagang sa pagbaha sa mga dapit nga giamboan sa 200 ka ektarya nga subdivision.

            Kon kapamatud-an, ang mga doktor ug nurses sa VSMMC nakalapas sa katungod sa privacy sa pasyente ug ang mga tagduma sa tambalanan nitago sa makauuwawng kalapasan ug nidupa sa mga responsable.  Ang Monterrazas nakahulga sa kinabuhi ug nakagusbat gyod gani sa kabtangan sa mga biktima.

            Tungod sa ilang pagpakahilom, VSMMC gitulisok nga morag nakahimo og mas bug-at nga krimen.  Tungod sa ilang pagtabi dayon, ang Monterrazas morang nahumot pa bisan napugos paghunong sa ilang trabaho human kanselaha ni Cebu City Mayor Tomas Osmena ang ilang development permit.

-o0o-

            Ang bag-ong pangangkon sa VSMMC, nga nahingpit nang ilang imbestigasyon ug nga ipagawas na ganing ilang mga rekomendasyon pagsilot sa mga doktor ug nurses nga nagbugalbugal sa pasyente, mas undanon ug makahuloganon kay sa nahaunang paglihay-lihay ug taphaw nilang mga pamahayag.  Apan di gihapon kapapas sa pagduda nga karon na lang sila napugwat kay nireklamo nang pasyente ug naukay nang mga Sugbuanon.

            Nganong naabtan man tuod og upat ka buwan ang ilang imbestigasyon?  Unsa ba kamakiangayon ang ilang imbestigasyon nga wa man sila magtagad pagpakigkita ug pagkuha sa pamahayag sa biktima?  Unsa ba kamatinud-anon ang ilang imbestigasyon nga wa man ipaubos sa preventive suspension ang mga hingtungdan?  Ug unsa may garantiya nga ang mga gipasanginlan wa mosabotahe sa pakisusi pinaagi sa pagguba sa mga ebidensiya ug pag-influencia ang mga testigo?  [30]  leo_lastimosa@abs-cbn.com