Arangkada of Leo Lastimosa for July 14, 2008

          BUGAS UG BARKO

 

          Sta. Fe, Isla sa Bantayan—Mao na ni ang ikatulo ug kataposang hugna sa among paghatod og hinabang alang sa kaliboan ka mga pamilyang nawad-an sa ilang mga panimay tungod sa bagyong Frank.  Dunay 909 ka pamilya kansang mga pinuy-anan hingpit nga nagusbat.  Mas gamay kon itandi sa 1,400 ka pamilya sa Bantayan ug 1,363 ka pamilya sa Madridejos.

          Kon apilon pag-ihap ang parsiyal nga nagub-an sa ilang mga bay, kapin sa 2,000 ka pamilya ang tabanganan sa Sta. Fe.  Apan kuwangon ang mga hinabang sa manggihatagong mga Sugbuanon nga natigom sa Kapamilya Relief Campaign.  Duna pa ra bay kaliboan ka pamilyang nawad-an sab sa ilang mga panimay sa San Remegio, Medellin, Daanbantayan ug Bogo City.

-o0o-

          Nakugang ko sa kadaghan sa mga pamilyang naigo ni Frank dinhi sa isla.  Gipakaingon namo kon di gyod maapod paghatag og hinabang ang tanang biktima, bisan kon ang nawad-an sa ilang mga pinuy-anan ray among hatagan.  Apan salamat sa way hunong nga pagbaha sa hinabang nga niabot sa ABS-CBN Broadcast Complex ug sa ubang drop-off points sa Kapamilya Relief Campaign sa Metro Cebu.  Human sa among tahas dinhi sa isla, mangambisyon na sab mi pag-apud-apod og hinabang sa mainland sa amihanang Sugbo.

          Bugas ang labing kuwangan.  Kay sa among nangaging relief campaigns, bugas gyoy pangitaon sa mga biktima.  May biktima man gani sa Bantayan nga nisumbong namo nga sa wa pang kadawat sa hinabang bugas, tubig lang nga inasinan ang gitambal sa ilang kagutom.  Apan bisan ipalit ang tanan namong cash donations og bugas, kuwang lang gihapon.

-o0o-

          Apil sa nakatubag sa among dinaliang panginahanglan sa dugang bugas maong nadayon mi dinhi:

·        Magtiayon nga nihatag og tsekeng pay-to-cash nga P20,000 aron ikapalit dayon og bugas;

·        Call Tech Call Center sa JY Square nga nihatag og siyam ka sakong bugas;

·        Kooperatiba sa Fairchild Semiconductor nga inay noodles 14 ka sakong bugas ang ilang gikompra; ug

·        St. Benefict's Learning Center nga naghatod og siyam ka sakong bugas.

-o0o-

          Igo na lang hinuon silang nakapuno sa cash donations, mga pagkaon, sardinas, noodles, mga gamit sa kusina, mga habol, unlan ug moskitero ug mga sinina nga mas unang nangabot.  Way pagkunhod ang kahabog sa mga bungtod sa mga hinabang.

Daghang salamat ni Wellington Chanlim sa pagpagamit sa iyang MV Gemini 6 nga kaduha na makargahi sa mga hinabang alang sa Bantayan.  Daghang salamat sab sa mga boluntaryo:

·        Association of Concerned Texters (ACT) nga gawas nga namutos nanguyog sab dinhi pag-apud-apod sa mga hinabang;

·        Gatosan ka mga tinun-an sa Mandaue City College nga gipangulohan sa ilang mga magtutudlo;

·        Mga tinun-an sa College of Nursing sa UV nga nigahin sa ilang weekend sa pagpanghakot ug pagpamutos; ug

Guardians Brotherhood sa Mandaue ug Bantayan.  [30]  leo_lastimosa@abs-cbn.com