Arangkada of Leo Lastimosa for July 8, 2008

            TUYOK SA PANAHON

 

            Ang Pagasa maoy unang gilat-an sa pagsugod sa imbestigasyon sa Kongreso mahitungod sa pagkalunod sa MV Princess of the Stars.  May abundang mga sukaranan ang mga kongresista sa pagdabudabo ni Dr. Frisco Nilo, ang pangu sa Pagasa:

·        Ang kalangay sa pagpamalit sa modernong mga kahimanan bisan kon may gigahin nang kuwarta ang Kongreso;

·        Samtang kuwestiyonable nang daan ang forecast sa Pagasa, langay ug wa pa gyoy klaro ang ilang sistema sa pagsangyaw sa maong kasayuran ngadto sa katawhan; ug

·        Bisan sa kapaspas sa pag-usab-usab sa direksiyon sa bagyong Frank, ang Pagasa pabiling nag-agad sa ilang naandang schedule sa pagluwat og weather bulletins matag unom ka takna.

-o0o-

            Niang way kinutoban nga tuyuk-tuyok nga ruta sa forecast sa Pagasa sa di pa masangyaw ngadto sa publiko, apil na sa mga kompaniya sa barko ug ayroplano, ang labing uwahing kasayuran mahitungod sa bagyo:

·        Ang nagkalainlaing weather stations manghipos sa kasayuran sa bagyo labi na kon ang ilang nahimutangan usa sa maigo sa katalagman;

·        Ang weather stations, bisan kon maoy naa sa posisyon sa paghatag sa katawhan sa labing dinalian nga kasayuran sa bagyo nga ilang nakuha, way gahom sa paghimo og forecast, igo lang silang mohatag sa kasayuran ngadto sa ilang ulohang buhatan; ug

·        Ang ulohang buhatan sa Pagasa di magdali, maabtan una og unom ka oras sa di pa moluwat sa sunod nga weather bulletin.

-o0o-

            Kon luwatan na sa Pagasa ang weather bulletin, salamat sa naandan nga makalibog nga burukrasya sa kagamhanan, way garantiya nga mapadangat dayon ni ngadto sa mga mangingisda, mga kapitan sa barko, mga piloto sa ayroplano ug mga pasahero:

·        Ang ulohang buhatan kinahanglan pang mo-fax sa bulletin ngadto sa nagkalainlaing weather stations;

·        Ang weather stations mo-fax sa samang bulletin ngadto sa Philippine Coast Guard (PCG) ug ubang ahensiya sa kagamhanan; ug

·        Ang operation center sa PCG kinahanglan pang maghimo og ilang kaugalingong memorandum pinasikad sa bulletin nga maoy ipada sa nagkalainlaing PCG stations.

-o0o-

            Sa kaso sa bagyong Frank, ang weather bulletin number 8 nadawat sa PCG gikan sa Pagasa kapin sa oras human ni naluwatan ug ang bulletin number 9 human sa tunga sa oras.  Kon ingon ini kahinay ang pinasahay sa kasayuran sa bagyo nga maayo ang mga linya sa telepono, ikaw na lay pamalandong unsay mahitabo kon, ug kadaghan na ni mahiagomi sa Pagasa Mactan, mangadaot ang ilang mga telepono.

            Inigkadawat sa PCG stations sa weather bulletin, kinahanglan pa nilang ipada ang kasayuran ngadto sa naglawig nang mga barko.  Ang problema:  Ang ilang kahimanan sa komunikasyon di kaabot sa pipila ka bahin sa nasud.  Mahibung pa ba ta sa pasidaan nga ang pagpabaya nga nisangpot sa pagkalunod sa Princess of the Stars di maoy kataposan?  [30]  leo_lastimosa@abs-cbn.com