Arangkada of Leo Lastimosa for July 7, 2008

          LUOY ANG SULPICIO

 

          Ang labing gamhanang argumento nga gigamit sa obispo sa Simbahang Katoliko pagkumbinser ni Pres. Arroyo nga libkason ang pagdili sa mga barko sa Sulpicio Lines mao nga makaluluoy ang Pamilyang Go kay wa silay laing panginabuhi gawas sa ilang mga barko.  Mas tukma ang argumento nga gamiton sa PUJ driver nga nanglabyog sa ruta kay nangiyawat nga mas dako ang kita nga ikauli sa iyang pamilya.  Apan di ning kapanalipod niya gikan sa silot.

          Mas tukma ang argumento nga gamiton sa taxi driver nga nilubag sa iyang pasahero kay naglisod pag-abot boundary nga gipahamtang sa operator.  Apan di ning kapanalipod niya gikan sa multa ug suspenso sa iyang lisensiya.

-o0o-

          Ang mga Go nga nanag-iya sa Sulpicio, suma ning mga numero nga nakuha ni Kongresista Emmylou Talino-Mendoza sa House Committee on Legislative Franchises gikan sa SEC, di sama kamakaluluoy sa kakha-tuka nga PUJ ug taxi drivers:

·        Ang ilang tinuig nga kita mokabat og dul-an sa P6 bilyones;

·        Sud na sa daghang katuigan, usa sila sa 200 ka labing dagkong korporasyon sa Pilipinas;

·        Ang 22 ka barko sa Sulpicio nikita og P1.84 bilyones sukad sa 2007;

·        Niburot og 10% ang kita sa Sulpicio sa niaging tuig; ug

·        Nitubo ang kita sa Sulpicio og 57% gikan sa P3.6 bilyones sa 2001 ngadto sa P5.7 bilyones sa 2007.

-o0o-

          Bisan sa dakong kita sa Sulpicio, ug sa pagkontrolar nila sa 40% sa industriya, ikaduha lang sila nga labing dako og kita sa mga kompaniya sa barko sa Pilipinas.  Nagsunod lang sila sa Aboitiz Transport System Corp. nga may kita nga labaw og 50% kay sa Sulpicio.  Katulo hinuon pil-a sa Sulpicio ang kita sa ikatulong labing dakong kompaniya, ang Negros Navigation Co. Inc.

          Ang Sulpicio nga dunay 2,500 ka mga kawani kanunayng nangangkon nga alkanse.  Nga ilang gibasol sa dakong gasto sa ilang operasyon.  Apan tungod sa dako nilang kita nunot sa dakong tubo sa populasyon, naibanan ang ilang alkanse gikan sa P229 milyones sa 2006 ngadto sa P211 milyones sa 2007.

-o0o-

          Salamat sa salida sa Sulpicio, nahibawo na ta hain mahimutang ang simpatiya ning gobyernoha.  Gitinuod pag-apiki ang kabos nga taxi ug PUJ drivers, bahala na kon ang ilang kalapasan nisangpot lang sa kahasol sa trapiko ug way bisan usa ka kinabuhi nga nakalas.

          Apan humok pa sa mamon ang ilang kasingkasing alang sa Sulpicio, bahala na kon sa niaging 28 ka tuig lima na ka barko ang nalunod, nga nisangpot sa kamatayon sa kaliboan ka mga pasahero, 15 ang nasangad, unom ang nabangga, upat ang nasunog ug tulo ang naaberiya ug nag-utaw-utaw sa dagat uban sa mga pasahero sa kapin sa tulo ka adlaw.  [30]  leo_lastimosa@abs-cbn.com