NAGHIUSA PAGTABANG
San Remegio, Amihanang Sugbo—Nahingpit nang pag-apud-apod sa mga hinabang alang sa 233 ka pamilya nga nawad-an og mga panimay tungod sa pagkusukuso sa bagyong Frank sa 27 ka mga barangay dinhi. Ang gida namong mga hinabang kabahin sa nagbaha nga relief goods gikan sa manggiluy-on nga mga Sugbuanon nga nitampo sa Kapamilya Relief Campaign sa ABS-CBN Cebu ug DYAB Abante Bisaya.
Ang kinabag-an sa mga bay nga hingpit nga naguba nahimutang sa tulo ka mga barangay daplin sa dagat. Nanghinaot mi nga ang hinabang nga ilang nadawat makatabang nila paghimo og bag-ong sinugdanan. Human nagusbat sa katalagman di lang ang ilang mga pinuy-anan kon dili apil nang ilang panguma ug pangisda.
-o0o-
Ang nahibilin nga hataganan og hinabang dinhi sa amihanang Sugbo mao na lang ang lungsod sa Daanbantayan. Nga maoy labing daghan og mga bay nga naguba sa mainland sa Sugbo: 630. Idungan unta namo ang pagpanghatag og hinabang sa San Remegio ug Daanbantayan. Apan naapiki mi sa trak nga kakargahan sa relief goods. Ang ELF truck sa Daanbantayan di paigo alang sa dul-an sa 700 ka sinakong pagkaon ug sinina alang sa 630 ka mga pamilya.
Ang trak nga among gikargahan sa relief goods sa San Remegio gipahuwaman ni Philip Tan sa Rotary Club. Nitabang paghakot sa mga hinabang ang batan-ong mga boluntaryo sa Rotaract Club. Nitanyag nga mokarga sa mga hinabang sa Daanbantayan ang Ceres Bus apan 20 ra ka sako ang maigo sa ilang compartment sa matag biyahe. Hinaot nga makahuwam mig mas dakong trak aron nga matiwas na paghatod ang mga hinabang karong semanaha.
-o0o-
Ang Kapamilya Relief Campaign ug ang Radiothon sa KBP Cebu Chapter, gawas nga nakatigom og labihan kadaghan nga hinabang, nilampos sab pagpahibawo sa mga Sugbuanon unsa kalapad ang kadaot nga nahimo ni Frank sa amihanang Sugbo, labi na sa isla sa Bantayan. Kay sa wa pa namo igkita ang kaliboan ka mga pamilya nga nabiktima sa bagyo, nasentro ang atensiyon sa mga Sugbuanon sa pagkalunod sa MV Princess of the Stars nga nisangpot sa kamatayon sa kapin sa 800 ka mga pasahero ug mga tripulante.
Ang ilang kakugang sa kadako sa kadaot sa ilang kaugalingong tugkaran ug mga silingan maoy usa sa nakaaghat sa mga Sugbuanon pagbubo og dugang hinabang alang sa naapiki nilang mga kapamilya.
-o0o-
Ang pagtigom sa mga hinabang maoy labing sayon nga bahin sa bisan unsang relief campaign. Ang labing kutas mao ang pagpamutos, paghakot ug pagpanghatag sa mga hinabang. Labi na kon ang mga biktima nahimutang sa isla nga may gilay-ong 128 kilometros.
Salamat sa mga boluntaryo, sa mga ahensiya sa kagamhanan ug pribadong sektor, ug sa kamanggihatagon sa mga Sugbuanon, mas nigaan ang among gimbuhaton. [30] leo_lastimosa@abs-cbn.com
No comments:
Post a Comment