ESKANDALO SA TARIPA
Ang nag-usab-usab nga pahibawo sa LTFRB sa gidak-on sa uminto sa plitehan sa PUJs sa Sugbo ug Central Visayas di katabang sa kuwestiyonable nang daan nga kaligdong sa sistema pagtakda sa plitehan. Ang unang pahibawo nga nadawat ni LTFRB 7 Director Romulo Bernardes mao nga P7.50 nay minimum nga plitehan sugod karong semanaha. Pag-adto ni Bernardes sa Manila niadtong Huwebes, nitubo ang plitehan ngadto sa P8 ug nga sa Lunes pa mapatuman. Labing uwahing pahibawo sa ilang ulohang buhatan mao nga sa Martes pa sa sunod semana mapatuman ang mas dakong plitehan.
Nganong wa man magkadimao ang LTFRB? Nga pila ka buwan na man unta nga nag-ung-ong ang mga petisyon sa uminto sa plitehan sa ilang buhatan?
-o0o-
Ang kinaham nga lusot sa kadagkoan sa LTFRB sa kalangay sa ilang pag-atiman sa mga petisyon sa transport groups sa Sugbo ug ubang bahin sa nasud mao nga nagpadayon pang ilang pagtuon. Sa gitas-on sa panahon sa ilang pagtuon, nagpaabot ang katawhan nga ang makuti nga proseso maka-umol sa labing makiangayon nga pag-balanse sa pagtidlom sa kita di lang sa mga drayber ug operators kon dili hasta na sa katimawa sa kinabag-an sa mga pasahero.
Apan ang sangpotanan sa taudtaod nilang pagtan-og sa mga petisyon di makadasig. Ang plitehan morag lastiko nga ilang giinat-inat. Agad kinsay mga hut-ong nga labing sipa og tingog. Libog nang daan ang sukaranan sa usbaw. Mas kabalak-an ang gikahadlokang mas makauuwawng kayamukat sa pagpatuman sa bag-ong plitehan.
-o0o-
Si Bernardes nitug-an sa "Arangkada" sa DYAB Abante Bisaya nga ang taripa nga ilang giandam di maglakip sa naandang detalye pilay plitehan sa nag-unang mga ruta. Igo lang nilang ipatik nga P8 ang minimum nga plitehan. Ug nga nga P6.40 ang minimum nga plitehan alang sa senior citizens ug mga tinun-an.
Manguros na lang tang daan. Magkapuliki unya ang LTFRB ug LTO paghusay sa init nga lalis nga gikahadlokang moulbo tali sa mga drayber ug mga pasahero. Pila ba gyoy tukmang plitehan gikan sa Colon ngadto sa Inayawan? Pila ba gyod ka kilometro gikan sa Ayala padung Ibabao, Mandaue?
-o0o-
May ulog-ulog ang LTFRB ngadto sa PUJ operators. Mahimong data-datahan nila pagbayad ang P520 nga filing fee: Unhan lang og P50 ug unya na impasan sa Septiyembre. Apan may sukaranan ang pagnegosyo sa kagamhanan sa filing fees ug mga taripa.
Sakto si Engr. Nigel Paul Villarete, planning ug development officer sa Dakbayan sa Sugbo. Di atraso sa mga drayber ug operators nga nisaka ang presyo sa lana. Busa di sila angayng pabayron kon mangayo og uminto sa plitehan. Katungdanan sa kagamhanan ang pagbutang og mga taripa pagpahibawo sa katawhan sa tukmang plitehan. Dakong eskandalo ang paggamit sa taripa nga laing kahimanan sa way kinutoban nilang panguwarta. [30] leo_lastimosa@abs-cbn.com
No comments:
Post a Comment