Arangkada of Leo Lastimosa for July 3, 2008

          BAHA SA HINABANG

 

          Ang KBP Cebu Chapter nakatigom og P295,000 gikan sa mga niduyog sa "Radyo-thon" tibuok adlaw niadtong Lunes pinaagi sa paghapit sa among booth sa Fuente Osmena ug sa pag-deposito sa mga sanga sa ASPAC Bank sa Sugbo.  Bisan human nang radiothon, daghan pa gihapong nagpakabana nga mga tigpminaw nga nanawag ug nagpakisayod makahimo pa ba sila paghatod sa ilang mga hinabang sa Fuente.  Apan kay ang radiothon pagdason ra man ug di pagsapaw sa relief campaigns sa nagkalainlaing sibyaanan, giawhag namo sila sa pagpadangat sa ilang mga hinabang sa labing duol nilang mga sibyaanan.

Sa makausa pa, daghang salamat sa kamanggihatagon sa mga Sugbuanon ug sa panaghiusa sa mga sibyaanan ug mga magsisibya.

-o0o-

          Ang radiothon, nga gitumong lang unta nga molungtad og pipila ka takna, nainat sa tibuok adlaw tungod sa pagbaha sa mga hinabang sa mga Sugbuanon.  Tungod sa kasibot pa gihapon sa mga tigpaminaw sa pagpadayon pagtabang, naikag pagsugyot si Carlo Dugaduga, ang executive vice chairman sa KBP Cebu Chapter, nga lugwayan namo ang radiothon og lain pang adlaw.

          Mahimong tukion ang iyang sugyot sa tanang station managers atol sa General Membership Meeting (GMM) sa KBP Cebu sa Yayoy's Grill karong udto.  Tukion sab nila ang nagkalainlaing mga paagi sa pag-apud-apod sa natigom nga mga hinabang aron madawat sa labing daghan nga mga biktima sa labing dali nga panahon.

-o0o-

          Ang sentro sa GMM mao ang among problema.  Nga gamay ra kaayo kon itandi sa kakutas sa pagtigom sa mga hinabang.  Unsaon man namo paggasto ang dul-an sa P300,000 nga cash donations aron nga mas matabangan ang mas daghang mga biktima?  Pipila sa mga sugyot:

·        Ihurot ang kuwarta pagpalit og bugas, mahimong magpatabang sa NFA ug pribadong mga magpapatigayon aron mas daghang bugas ang makompra;

·        Ihurot ang kuwarta pagpalit og tubig, nga maoy nagnihit pag-ayo sa Western Visayas;

·        Kuwarta ang ipanghatag ngadto sa mga biktima sa bagyo;

·        Ipalit og disinfectant sa gidagsa nga mga patayng lawas; ug

·        Ipamisa sa nagkalainlaing mga simbahan alang sa kapahuwayang dayon sa mga kalag sa tanang nangamatay.

-o0o-

          Maningkamot ming di masubli ang kasaypanan sa ubang nangolekta og hinabang:  Kutob ra sa kolekta, way nagtagad pag-apud-apod ngadto sa mga biktima.  Mas kutas ang pagputos ug pagpanghatag sa mga hinabang.  Apan nigaan ang among trabaho salamat sa:

·        Cebu City Hall nga nipagamit sa ilang higanteng mga trak paghakot sa mga hinabang;

·        PRO 7 Director Ronald Roderos tungod sa pagpagamit sa multi-purpose hall sa Kampo Sergio Osmena Sr. nga pundohanan sa mga hinabang;

Cebu Normal University Pres. Ester Velasquez tungod sa pagpahuwam sa ilang social hall nga pundohanan ug pustanan sa mga hinabang ug sa ilang mga kawani ug mga tinun-an sa pag-alsa ug pagpamutos sa mga hinabang.  [30]  leo_lastimosa@abs-cbn.com