LUNOD SA KAMATUORAN
Nalukop na lang gyong Sulpicio Lines pagpangita og matulisok sa pagkalunod sa MV Princess of the Stars. Aron makapanghunaw sa responsibilidad sa pagkamatay sa kapin sa 800 nila ka pasahero ug tripulante. May mga pasangil silang katuohan. Apan mas daghan sa ilang mga pasangil ang klarong binuang:
· Katuohan ang ilang pasangil batok sa Philippine Coast Guard (PCG), gawas lang nga may bag-o na diayng kamandoan nga ang tag-iya ug kapitan na sa barko ang magbuot molarga ba sila o dili kon dunay signal number 1; ug
· Daghan untang moabiba sa ilang pagkiha sa Pagasa, apan ang mga sayop sa Pagasa nisangpot lang sa kahasol sa patigayon ug mga pasahero, ang bulilyaso sa Sulpicio nisangpot sa daghang kamatayon.
-o0o-
Ang ubang mga pasangil sa Sulpicio di lang yano nga panamastamas kon dili labihan na gyod kalahap ug kamapasagaron nga, kon ang pasidaan sa atong katiguwangan maoy tuohan, maisip na nga makagaba:
· Nga ang pagkalunod sa barko kabubut-on sa Ginoo (maayo hinuon nga pagkatubag ni Arsobispo Gaudencio Kardinal Rosales sa Manila nga ang pagsungasong sa higanteng bawod da sa bagyo usa ka pagpakabuang di pagbuot sa Ginoo); ug
· Usa sa naluwas nga mga tripulante, nga gikahadlokang gitudloan na sa mga abogado sa kompaniya unsay isulti atubangan sa Board of Marine Inquiry, nipasumbingay sa pagbasol sa mga pasahero nga wa dayon moambak bisan kaduha na momando og "abandon ship" ang kapitan.
-o0o-
Nganong nakaako man intawon sila pagbasol sa nangamatay nga mga pasahero sa Princess of the Stars? Nagpatuyang na ba lang kay di na mang kapanalipod sa ilang kaugalingon ang mga biktima? Gawas sa kangil-ad og taras, may dagkong buslot ang lusot sa Sulpicio:
· Kon tinuod ang sulti ni Renato Lanurias, laing survivor nga tripulante, nga nalunod ang barko 15 ka gutlo human sa pagmando sa kapitan og abandon ship, unsa pa man intawoy kahigayonan sa mga pasahero pag-ambak gikan sa pito ka andana nga barko?; ug
· Kon gigiyahan pa sa kapitan ug mga tripulante ang mga pasahero, nganong gipadpad man ang kasagaran sa mga nangamatay ngadto sa lagyong mga lalawigan sa Masbate, Quezon ug Camarines Sur nga duha ra man unta sila ka kilometro gikan sa Sibuyan Island?
-o0o-
Nagkaklaro ang motibo sa Sulpicio: Ang paghanig nang daan sa ilang depensa di lang batok sa mga kaso nga posibleng ipasaka kon dili, ug labi na, sa pagpadako sa kahigayonan nga makobra ang dakong insurance. Maong angayng protestahan ang padayong pagtak-op sa PCG sa ilang imbestigasyon gikan sa publiko.
Tungod sa ilang pagkontrolar sa 30% sa industriya, ang Sulpicio wa magnihit og mga tigdupa sa kagamhanan. Maong angayng bantayan ang barko gikan sa pagkadasok ngadto sa kinailawoman sa dagat aron pagpapas sa tanang pagduda sa pagkalunod. [30] leo_lastimosa@abs-cbn.com
No comments:
Post a Comment