BROADCASTERS DAY
Usa sa labing inilang komentarista dinhi sa Sugbo nikumpisal nako nga pagsugod pa niya og panrabaho nag-abang siya og kuwarto nga way bintana. Nag-antos siya sa labing yano nga higdaanan ug ubang sangkap kay mao ra may maabot sa gamay niyang kita.
Apan kon mogawas na sa iyang inabangang kuwarto, tuyhad ang iyang barug, limpiyo ug plantsado ang iyang sinina ug karsones ug way bisan gamayng tilimad-on sa iyang kawad-on. Gawas lang tingali sa iyang pagsakay og PUJ kay wa pa may katakos bisan sa pagpangutang na lang og sakyanan.
Wa siya magpakaaron ingnon. Di siya garbuso. Nanagana lang nga kon mabantang sa kinabag-an ang iyang katimawa, maibanan ang gibug-aton sa iyang tingog sa radyo.
-o0o-
Nahadlok kong wa siya mag-inusara. Kay bisan wa nako itago ang akong kakabos, may mga tawo lang gihapon nga di makatuo nga maglakaw ra ko matag buntag ug gabii ngadto ug gikan sa atong gitrabahoan. Maglisod silag dawat nga ang tingog nga ilang mabati sa radyo sama ra diay nila og kahimtang.
Mao ni sukaranan sa among kabalaka nga langawon ang labing unang Cebu Broadcasters Day nga gipasiugdahan sa Kapisanan ng mga Brodkaster ng Pilipinas (KBP) Cebu Chapter: Nga mauwaw ang mga magsisibya ug ang mga sakop sa ilang pamilya nga mopila alang sa libreng tambal ug ibot sa ngipon nga among gitanyag.
Maong naaghat mi pagpalapad sa pangalagad ngadto sa labing kabos nga mga silingan sa mga magsisibya. Aron nga kon way magpakita nga mga magsisibya, di makawang ang kahago sa dul-an sa gatos ka mga doktor nga nisanong sa among pagdapit ug ang P700,000 nga balor sa tambal nga hinatag sa Unilab.
-o0o-
Labihan namong sayopa. Ang inilang mga magsisibya maoy labing sayo nga nipila. Wa mangayo og pabor. Nagpainit kuyog sa ubang mga pasyente. Gibahaan gani mi og tawag sa mga kawani sa mga pamantalaan kon makaapil ba sab sila. Gihangop namo ang ilang pagsalmot.
Apan nakatsamba mi pag-apil sa kabos nga kasilinganan. Silay kinabag-an. Ang ilang presensiya maoy nakahingpit sa kahulogan sa kalihokan dihang ang mga magsisibya, sama sa naandan, nibiya sa ilang mga pamilya ug inay magpatambal nitabang na hinuon pagpahapsay sa pagpanambal.
-o0o-
Salamat sa Unilab, Pepsi, Lourdes Catering Services, Popular Feed Mill Corp., CGS Printers, Kulas Shirts, Dunkin' Donuts, Nature Spring, Calmoseptine, Cebu Medical Society, Phil. College of Physicians, Cebu City Medical Center, Vicente Sotto Memorial Medical Center, Gullas Medical School, Cebu Doctors University Hospital, Sacred Heart Hospital, Velez Gen. Hospital, Cebu City Health Dept., Abellana National School, DMDP-Cebu City government, UV College of Nursing ug boluntaryong mga doktor.
Ang inyong tabang nakapalig-on sa mensahe nga way magsisibya nga mapasagdan. Nga may kahugpongan siyang kadangpan kon mahiagom og kakulian sa pagtuman sa iyang tahas pag-alagad sa katawhan. [30] leo_lastimosa@abs-cbn.com
No comments:
Post a Comment