Arangkada of Leo Lastimosa for May 12, 2008

       LANGAW RAY SANGIT

 

       Ang kaso batok ni kanhi bise gobernador John-John Osmena, nga gilambigit sa pagpayuhot sa 1.7 ka toneladas sa pseudoephedrine upat ka tuig nang nilabay, napasaka dihang wa na siya sa katungdanan ug naparot na sang pamolitika sa gamhanan niyang amahan, si kanhi senador Sonny Osmena.  Niadtong hawod pa kaayo ang kanhi senador, wa gyoy nakapangahas pagpasaka sa kaso batok sa iyang anak.  Bisan sa mga ebidensiya nga nahipos sa Philippine Drug Enforcement Agency (PDEA) nga nagtumbok sa batan-ong Osmena nga usa sa mga utok sa paggamit sa Sugbo isip transshipment point sa pagpasud sa sangkap sa illegal nga drugas ngadto sa Australia.

        Ang gipasanginlang mga kakonsabo ni John-John hagbay rang nasentensiyahan ug nabilanggo sa Australia.  Human napasakang kaso batok niya kadudahan pa kon makalihok ba.  Kinsay nag-ingon nga makiangayon ang balaod sa Pilipinas?

-o0o-

        Kon kasarangan pa lang unta nga mga tawo ang nahilambigit sa pagpayuhot sa giisip sa Australia nga labing dako untang kontrabando sa ilegal nga drugas sa ilang kasaysayan, niadto ra untang nagtingkagol sa bilanggoan.  Tungod sa katalagsaon, ma-headline gyod dayon sa media kon may dagkong mga opisyal nga makiha.  Bisan kon tabukon pa og pito ka lawod gikan sa pagpasaka sa kaso hangtod sa pagkahingpit sa husay.  Kana kon makalahutay man.

        Ang pait nga kamatuoran mao nga madutlan lang ang dagkong mga isda kon wa na sila sa gahom.  O kon ang ilang gikabangga mas gamhanan pa nila.  Apan samtang sikit pa sila sa luwag, mas dako pang kahigayonan nga moputi ang uwak.  Kay sa pagtaral nila sa hukmanan tungod sa bangis nga mga krimen nga nahimo batok sa katawhan.

-o0o-

        Mapasakaan kaha og kaso si kanhi mayor Teddy Ouano kon nagtungkawo pa siya sa gahom?  Makiha kaha si Radaza kon may lig-on pang koneksiyon sa Malakanyang?  Mas klaro ang maniobra kon suhiron ang listahan sa mga sinumbong, nga wa maglakip sa mas dagkong mga opisyal nga nipalusot sa transaksiyon.

        Gawas sa overpricing sa deco lampposts, may mas dagko pang transaksiyon sa Asean Summit nga gibinuangan sab.  Apan tungod sa kadagko sa mga hingtungdan, wa pa gyod matarung pag-imbestigar.  Ang nagpakabana kunohay nga mga sektor kutob ra sa pagpaningil unsa nay nahitabo sa mas gagmayng mga kaso.  Ang mga imbestigador mahadlok gani bisan sa paglitok na lang sa mga ngan sa mga imbestigahunon.

-o0o-

        Maong magpaabot una ta nga mangatangtang sa gahom ang mga hawod karon, o mag-una ba og katangtang ang mas gamhanang mga padrino nga ilang gisandigan, una sila madutli sa sistema sa hustisya.

        Masaligon kong moabot nang adlawa.  Kay way daotan nga molungtad hangtod sa hangtod.  Pagkakaron, moitlib lang una ta sa atong mga ngabil.  Ug dawaton nga ang mga institusyon nga gitahasan pagbaraw sa kahiwian suwawan kon higante ang nakalapas.  [30]  leo_lastimosa@abs-cbn.com