TEXT SA LINOG
Kon nakabasa pa ka ini, nakaseguro ko nga nagbarug pang imong bay. Ug nga wa mahinayon ang kusog nga linog. Nga gipasidaan nga moigo sa Pilipinas gabii. Kon nituo ka sa nikatap nga text messages, nakaginhawa na tingali kag luag karon. Kon usa ka sa mga iresponsable nga nipakatap sa text messages sa way pagsusi unsa katinuod ang kasayuran, hinaot nga mangita dayon ka og kumpisalanan aron ikasumbong ang dako nimong atraso.
Kon wa kang kadawat sa text messages, pasayloa nga gihasol tika. Di lang ko makapalabay sa kahigayonan pagpahimatngon sa mga humok og ilong. Nga sayon kaayong magpagamit pagpakatap sa mga bakak sa mga way lingaw.
-o0o-
Mao ni ang text message nga nikatap: US GEOLOGICAL SOCIETY PREDICTS A 6.8 MAGNITUDE EARTHQUAKE TO HIT THE PHILIPPINE PLATES TONIGHT. PLEASE BE CALM BUT ALERT.>> Hawaii State Emergency Preparedness Office. Pulos peke ang gihisgutan nga mga ahensiya:
· Way ahensiya nga US Geological Society, sa Hawaii man o sa bisan asang estado sa US. Duna hinuoy US Geological Survey (USGS) nga nihulagway sa iyang kaugalingon nga "unbiased, multi-disciplinary science organization"; ug
· Wa say ahensiya nga nagda sa mas kadudahan nga ngan nga Hawaii State Emergency Preparedness Office. Duna hinuoy Department of Emergency Management nga nagbase sa Dakbayan sa Honolulu, ang ulohan sa Hawaii.
-o0o-
Ang mas dakong buslot sa mensahe mao ang pagtino nga 6.8 ang magnitude sa linog. Wa pay teknolohiya nga makatag-an sa gikusgon sa linog. Gani, wa pay teknolohiya nga makatag-an kanus-a mahitabo ang linog. Duna hinuoy magpatugatuga pagpangagpas sa linog apan di sila dawaton sa lehitimong seismologists. Ang bugtong mahimo mao lang ang pag-agpas sa kahigayonan sa pagkahitabo sa linog.
Ang nangaging mga panag-an sa linog gipasikad sa seismicity patterns, electromagnetic fields, kahimtang sa panahon ug di kasarangan nga bayhon sa panganod, radon o hydrogen gas content sa yuta o tubig ilawom sa yuta, ang-ang sa tubig sa mga atabay ug, nakatag-an mo, sa taras sa mga hayop. Tanan nila nangasayop.
-o0o-
Laing bersiyon sa text message nagkutlo sa ngan ni Ambassador Tita de Villa. Nagduda ko kon si de Villa ba gyod ang nag-text kay gipulihan na siya isip embahador sa Pilipinas alang sa Vatican. Bisan nakapuyo siya sa lingkoranan sa Simbahang Katoliko, wa siya tugahi sa gahom pagtag-an sa umaabot nga mga panghitabo.
Gawas pa, ang mensahe nga giingong iya ni de Villa nag-ingon nga igo ra sab siyang nakadawat sa text. Lisod hinuong sabton nganong gipasa niyang mensahe tungod lang kay nakabatyag sa hinay nga linog nga nasentro sa Isabela gahapon sa buntag. Hinaot nga wa kaapil si de Villa pagpakatap niadtong text message sa kamatayon ni Papa Juan Pablo II dihang baskog pa siya. [30] leo_lastimosa@abs-cbn.com
No comments:
Post a Comment