Arangkada of Leo Lastimosa for May 16, 2008

       BAKAK SA ZTE

 

       Kon mamakak, di gyod magkadimao.  Bisan unsa kamadanihon sa bakak.  Bisan unsa kaanad sa bakakon.  Bisan unsa kamaayong pagka-ensayo sa pamakak.  Bisan unsa kadaling lipaton sa gibakakan.

       Mao ni nahitabo sa Malakanyang.  Nagtuo ang kadagkoan sa palasyo nga motuo ang katawhan bisan unsay ilang isulti.  O, kon di motuo, magpalingug-lingog ra ang katawhan sa bisan unsang mga pasangil nga luwatan sa mga kaatbang ni Pres. Arroyo.

       Dihang nalab-as ang paglambigit ni Arroyo sa NBN-ZTE scandal, gipakaingon sa palasyo nga, sama sa nangaging mga passangil, mahilom ra og makalimtan.  Apan, salamat sa ilang nasobrahang bilib sa ilang katakos pagpamakak, nisiwil ang sidsid sa ilang sayal.  Nga gilaoman nga sa kataposan mahukasan na gyong nangalisbo nilang bayhon.

-o0o-

       Sama sa pag-ulbo sa Hello Garci scandal tulo ka tuig nang nilabay, si Press Secretary Ignacio Bunye ang unang nitingog.  Sayon ra kaayo niyang nasalikway nga dakong bakak ang pasangil sa sekretong pagduaw sa magtiayong Arroyo sa ZTE Telecommunication headquarters sa Schenzen, China niadtong Nobyembre 2, 2006.  Mas dali siyang nakasumbalik nga way laing lingaw ang oposisyon gawas sa pagpaningkamot pagpalagpot ni Arroyo.  Ang panghimakak ni Bunye gidasonan sab dayon sa dakong opisyal sa ZTE nga niinsistir nga way rekord ang kompaniya sa pagduaw sa mga

Arroyo.

       Dihang nabisto nga lahi sa nangaging mga saksi—silang Joey de Venecia ug Jun Lozada—nga pulos ra sulti, ang bag-ong saksi dunay mga hulagway, ang pangabaga ni Bunye nga si Lorelei Fajardo nidalidali pag-angkon nga tinuod diay nga niadto sa Schenzen ang magtiayong Arroyo.  Apan wa mahisguti ang NBN-ZTE deal.

-o0o-

       Si kanhi Comelec chairman Benjamin Abalos nitabang pagdupa sa mga Arroyo.  Pinaagi sa pag-angkon nga siyay nagdapit nila ngadto sa Schenzen.  Iyang abogado, Salvador Panelo, nipakapin pa gyod nga nanihapon ang mga Arroyo uban sa kadagkoan sa ZTE.  Apan kahimtang ra sa panahon ang ilang gihisgutan.

       Wa sab papiri si Senador Miriam Defensor-Santiago.  Matod niya kasarangan lang ug way balaod nga nalapas ang pakigkita ni Arroyo sa mga magpapatigayon nga nagtinguha pagbubo og dakong puhonan sa nasud.

-o0o-

       Salamat sa ilang pag-ilogay ug pag-iyahay pagpanagang sa pasangil batok sa ilang amo, nabisto ang way kinutobang pamakak sa Malakanyang:

·        Namakak diay si Bunye (nga di na bag-o kay nagpapating man gyod siya sa Hello Garci) ug ang dakong opisyal sa ZTE;

·        Namakak diay si Fajardo sa pag-insistir nga wa hisguti ang NBN-ZTE tungod sa pagugat ni Santiago nga pribilehiyo ni Arroyo ang pakigkita sa mga magpapatigayon;

·        Mas sikit pa gyod diay sa ampaw sa Carcar ang papel ni Abalos sa anomalusong transaksiyon; ug

·        Ang sekretong pag-adto ni Arroyo sa Schenzen ug ang iyang pagsaksi sa pinirmahay sa kontrata sa Boao nagmatuod sa mas lawom niyang kalambigitan sa eskandalo.  [30]  leo_lastimosa@abs-cbn.com