BAKASYON NI GLO
Mahimong ihulagway sa Malakanyang ang sekretong pagduaw ni Pres. Arroyo sa headquarters sa ZTE Telecommunications sa Schenzen, China niadtong Nobyembre 2, 2006 nga bakasyon. Mahimo nilang tawgon ang iyang pakigtagbo sa kadagkoan sa ZTE, pakigduwa og golf ug pagpanihapon uban nila nga "private time." Mahimo ganing moboluntaryo sila og kasayuran nga igo lang nilang gihisgutan ang polusyon sa silingang Hong Kong ug ang umaabot nga pagduma sa Tsina sa Olympics sa Beijing.
Apan ang pagkabisto sa hulagway ni Pres. Arroyo ug sa iyang bana sa ZTE golf course nakapahimutang sa pagduda sa iyang pagkisikisi ug pagpangugat pagpamalibad nga wa siyay direktang kalambigitan sa transaksiyon. Ang presensiya ni kanhi Comelec chairman Benjamin Abalos nakapalig-on sa mga pasangil nga silay nagkonsabo pagpalusot sa kahiwian.
-o0o-
Mas makahuloganon ang "bakasyon" ug ang "private time" ni Pres. Arroyo uban ni Abalos, kanhi House speaker Jose de Venecia ug sa iyang bana nga si Mike sa Schenzen tungod sa nisunod nga mga panghitabo:
· Ang ZTE maoy nakasipong sa higanteng transaksiyon bisan sa mas baratong tanyag sa karibal nga mga kompaniya;
· Nakalusot ang transaksiyon bisan sa pagduda ni kanhi Neda secretary general Romulo Neri nga gipaburot ang presyo;
· Nibalitok si Arroyo sa iyang orihinal nga baruganan nga gamiton ang build-operate-transfer (BOT) scheme aron nga way bisan usa ka dako nga gastuhon ang gobyerno alang sa transaksiyon;
· Gibiyaan ni Arroyo ang himatyon niyang bana sa tambalanan aron lang pagsaksi sa pinirmahay sa kontrata sa Boao, China; ug
· Ang kahibulongan nga pagkahanaw sa kontrata dihang nisibaw nang daghang mga pangutana mahitungod sa transaksiyon.
-o0o-
Di tang kapaabot nga motingog dayon si Pres. Arroyo pagtubag sa lab-as nga ebidensiya sa dugay na kaayong mga pasangil sa kahiwian batok niya. Kay nitagam na siya. Napaso siya dihang nitingog dayon ug nangayo og pasaylo sa pagtumaw sa Hello Garci tapes.
Karon wa nay "Hyatt 10" sa gabinete nga motukbil sa iyang konsiyensiya. Ni mohulga pagbiya kon di siya moangkon sa kasaypanan. Ang tanang nahibiling naglibot niya pulos modupa ug modason sa bisan unsang pamakak nga ilang mahunahunaan.
-o0o-
Mapukaw na bang katawhan kon makaatubang na sa Senado ang labing bag-ong testigo batok ni Arroyo? Mobarug na ba pagpaningil og katuohan nga mga tubag sa dugay nang nag-ung-ong nilang mga pangutana? Molihok na ba gikan sa iyang pangiyugpos ug mopasiugda sa tukmang kausaban human napamatud-an ang pagtikas sa ilang kabubut-on ug pagkawkaw sa ilang katigayonan?
Ambot lang. Way nahibawo. Mahimong hatagan og mas dakong pagtagad sa kinabag-an ang pag-alim sa hapdos nilang tiyan. O, tungod sa nagkagrabe nilang kalisod ug kagutom, mahimong mapuno na sa taphaw nga pamakak ug mohingilin na sa pamunoan nga hagbay rang nagbudhi sa ilang mga interes. [30] leo_lastimosa@abs-cbn.com
No comments:
Post a Comment