Arangkada of Leo Lastimosa for August 2, 2008

            GASA SA KINABUHI

 

            Ang labing unang blood donation activity sa DYAB Abante Bisaya ug ABS-CBN Cebu nahimo niadtong 1998.  Nagpatabang mi sa Regional Blood Coordinating Council (RBCC) pagpamutang og tiheras sa TV Newsroom.  Human sa tibuok adlaw namong pagdapit sa mga tigpaminaw paghatag og dugo, nakakuha mig 35 ka blood donors.  Gipasaligan mi sa RBCC nga wa sila maalkanse sa ilang biyahe.  Kay 30 ka blood donors diay ang gitakda nilang minimum.

            Ang sunod namong bloodletting, uban gihapon sa RBCC, gipahigayon sa samang tuig sa mas dako nang wanang sa social hall sa Our Lady of Fatima Parish sa Basak, Mandaue City.  Kapin na sa 60 ang among blood donors.

            Napu ka tuig nang nilabay.

-o0o-

            Maglisod mi pagtuo nga human sa napu ka tuig, nangambisyon na ming makakumbinser og 1,000 ka blood donors paghatag og dugo.  Gikan sa hagip-ot nga newsroom, dungan na namong ipahigayon ang kalihokan sa walo ka buwag nga venues.  Gawas sa RBCC, duna na mi karoy laing walo ka partners.  Ug dugay ra ming gikagiwan sa kabalaka nga maalkanse ang among partners sa ilang biyahe.

            Inanay namong nabatyagan nga nakasabot nang katawhan sa kamahinungdanon ug sa kadinalian sa panginahanglan sa paghatag og dugo.  Masaligon ming mas daghan na karon ang mouyon sa among pagsubli-subli nga ang dugo mao ang gasa sa kinabuhi.  Ug nga ang ilang paghatag og usa ka bag nga dugo makaluwas og hangtod sa tulo ka kinabuhi.

-o0o-

            Atong bantogang mga bayani nag-ula sa ilang dugo batok sa mga nangahas pag-ulipon sa nasud ug katawhan.  Karon wa nay mga langyawng kasundalohan nga naghudlat nga mosakmit sa atong kaugalingnan.  Maong wa na tay kahigayonan nga makapakita sa atong kaisog ug makabuhis sa atong kinabuhi sa natad sa panggubatan.

            Apan sa bag-ong panahon matubag gihapon nato ang lab-as nga hagit sa pag-ula sa atong dugo alang sa nasud ug sa katawhan.  Abunda ang kahigayonan sa paghatag sa gasa sa kinabuhi.  Moabot ni matag tulo ka buwan.  Pinaagi sa "Halad sa Kinabuhi," ang pinalapdan nga Kapamilya Blood Donation Campaign.  Nga sa samang higayon maoy usa sa motimaan sa tibuok buwan nga kasaulogan sa ika-20 nga sumad sa TV Patrol Central Visayas.

-o0o-

            Niang venues nga inyong mapilian, mas maayo kon magkuyog mong tibuok pamilya, kon makahigayon mo paghatag og dugo karong adlawa:

·        Marina Mall, 2^nd floor, uban sa Regional Blood Center sa DOH;

·        Mandaue City Hall grounds uban sa Cortes Gen. Hospital, Mandaue City District Hospital ug RBC;

·        SM City, 2^nd level, uban sa RBCC;

·        Perpetual Succor Hospital, Medical Specialty Center Building;

·        Cebu Doctors University Hospital Gym;

·        Chong Hua Hospital Lobby A & B;

·        EMall Parking Area uban sa Cebu City Medical Center; ug

• Gaisano Grand Fiesta Mall, 2^nd level, uban sa Philippine National Red Cross.  [30]  leo_lastimosa@abs-cbn.com