MILAGRO SA SIBONGA
Lindogon, Sibonga—Mao ni ang nahimutangan sa simbahan sa Marian Monks of Holy Eucharistic Adoration. Nga kasagarang nasaypan sa taga gawas nga naa sud sa Barangay Simala, ang mas inila niyang silingan, nga naa sa daplin sa nasudnong highway sa habagatang tumoy sa lungsod. Ang simbahan nga gipunsisokan sa kaliboan ka mga tawo matag adlaw, labi na sa matag petsa 13 sa buwan, weekends ug holidays, nagtungtong sa usa sa labing taas nga bungtod sa ibabaw nga bahin sa barangay.
Salamat sa mga monghe, nikalit pagdasig ang lokal nga mga patigayon. Ang kaniadto awaaw nga nagliku-liko nga agianan gikan sa patag paingon dinhi sementado ug nalukop na sa mga tindahan ug mga kan-anan.
-o0o-
Usa sa labing malambuon nga patigayon mao ang mga parkinganan sa mga sakyanan. Bisan asa ka molingi, gikan sa patag paingon sa kinaibabwan, nanguhong ang mga parkinganan sa matag bakanteng luna. Tungod sa kalayo ning bukirang barangay, ang mga deboto makaabot lang dinhi kon magda og mga sakyanan. Ang dagkong mga pundok magpakyaw og buses ug jeepneys. Ang mga tubig-tubigan manakay sa ilang aircon nga vans ug mga awto.
Ang labing dakong parkinganan sa kilid sa ganghaan paingon sa simbahan mao say labing dakog bayad. Ang matag usa sa naglawud-lawod nga mga sakyanan nga nagpahimutang gipaninglan og P50. Ang mas layo nga mga parkinganan di sab magmahay. Mapuno silang tanan inigdasok sa mas daghang mga tawo human sa paniudto.
-o0o-
P200 ang abang sa matag payag-payag sa palibot. Nga mao ray kapasilongan sa mga pamilya nga gustong molikay sa naglingiting nga kainit ug sa bagang duot sa katawhan nga nagsugat-sugat patungas, palugsong, padung ug gikan sa simbahan ug sa imahen ni Birhen Maria sa bungtod.
Sa matag kilid sa agianan, giladlad sang mga abot sa mga mag-uuma sa Sibonga ug kasilinganang mga lungsod. Ang labing himalitan mao ang saging, kamote, nangka ug mga utanon. Batan-ong mga mamaligyaay nitanyag sab sa key chains ug gagmayng mga rebulto sa Mahal nga Birhen nga pulos tag-P10.
-o0o-
Tungod sa kataas sa pila sa katawhan nga gustong mosud sa simbahan ug mohawok sa imahen, wa kong kahigayon pagsud sa simbahan. Nga matahom ug habog kaayong tan-awon gikan sa gawas apan gihulagway sa pipila nga nakasud nga huyang og mga haligi, ampay sa stampede ug kuyawng mahugno. Apan nakasud ko sa kapilya sa ibabaw. Diin ipahubo ang imong sapatos sa di pa kang kasud. Solemne ang tibuok palibot haom sa tim-os nga mga pangaliya.
Nakadagkot sab mig de kolor nga mga kandila nga tag-P35 matag usa. Nahapitan mi sa mga nagda og mga buyot nga napuno sa mga amot. Ang hugot nga pagtuo sa mga deboto maoy nakapatuyhakaw sa higanteng simbahan ug sa namungingi nga mga tigbayon sa tibuok palibot. [30] leo_lastimosa@abs-cbn.com
No comments:
Post a Comment