SUGNIB SA MINDANAO
Sa SONA nga gidominahan sa mga butang nga kasagaran makit-an sa listahan sa pagpangompra—kotong, text, tubatuba, bombilya, bugas humay ug kuryente—ang nitumaw nga labing makahuloganong pahibawo ni Pres. Arroyo mao ang kauyonan nga nakab-ot tali sa kagamhanan ug sa MILF. Apan sama sa iyang pahibawo sa pagbarato sa text, labihang panghilam-os ni Arroyo sa negatibong mga reaksiyon sa dinalidali niyang kauyonan uban sa mga rebelde sa Mindanao.
Nakaingon ko nga dinalidali kay nahagsa nang sabutsabot tulo ka adlaw sa wa pang SONA. Apan tungod sa desperadong panginahanglan sa mahinungdanong mga pahibawo taliwa sa nilayat nga presyo sa lana ug bugas ug ubang mga palaliton ug nitidlom niyang popularidad, gipasanginlan ang iyang pamunoan nga niyango sa tanang gipangayo sa MILF.
-o0o-
Gidalidali ni Arroyo pagpada sa Malaysia sa duha niya ka sinaligan, silang National Security Adviser Norberto Gonzales ug Presidential Adviser Hermogenes Esperon, aron pagbanhaw sa sabutsabot. Tuod man, human sa pila lang ka takna, morang nagyapa-yapa ang Malakanyang nga nipahibawo nga nahusay nang labing dakong babag sa kauyonan.
Sukwahi sa sipa nga pakpak gikan sa iyang mga dumadapig nga nisugat sa iyang pahibawo sud sa Kongreso, suliyaw ang iyang nahiagoman gikan sa nagkalainlaing mga hut-ong sa katilingan. Nga pulos nidemanda nga ibutyag ang unod sa kauyonan. Mas nisilaob ang masuk-anong mga reaksiyon dihang nabisto nga niuyon ang kagamhanan pagpalapad sa Autonomous Region of Muslim Mindanao (ARMM).
-o0o-
Labihan gyong pangalisbo sa kauyonan nga bisan ang suod nga mga alyado ni Arroyo sa Zamboanga, Iligan ug ubang dapit sa Mindanao nikisikisi sa ilang giisip nga pagbaligya sa Malakanyang sa kabahin sa ilang mga teritoryo ngadto sa MILF. Samtang nakapalipay siya sa pipila ka mga rebelde, niulbo ang mas baga nga pundok sa katawhan nga nakabatyag nga gibudhian sa ilang kaugalingong kagamhanan.
Klarong nauwaw ang Malakanyang sa pagbaraw sa Korte Suprema sa pinirmahay unta sa kauyonan sa Kuala Lumpur. Bisan kon sa nasobrahan nilang propaganda mora na hinuon nga silay nipasaka sa petisyon nga nisupak sa kauyonan. Sa tago, mahimong nagpasalamat ang palasyo sa pagpugong sa labawng hukmanan. Kay nakalingkawas sila gikan sa mas dakong daob.
-o0o-
Salamat sa Korte Suprema, makapahimus ang Malakanyang og pipila ka adlaw nga lugway sa pagpakalma sa namugna nga tensiyon. Si Arroyo makasandig sa abunda niyang kasinatian pagpabaha og pabor aron pagtagbaw sa tanang hingtungdan.
Manghinaot hinuon ang mabuot nga mga lungsoranon nga nakakat-on og leksiyon si Arroyo ning higante niyang bulilyaso. Ang suliran sa Mindanao labihan na kadako ug kakaraan nga mahusay lang pinaagi sa mapailubon ug matinud-anon nga pagbugtaw sa kalinaw. Di sa pagpangita lang og bisan unsa na lang nindot nga ikasulti sa SONA. O dinaliang pahumot sa nangalisbo na niyang pamunoan. [30] leo_lastimosa@abs-cbn.com
No comments:
Post a Comment