NAGDAHOM SA 2010
Kon tinuod ang sibaw nga mga pasangil nga nagsugod na si Pres. Arroyo paghanig sa mga higanteng maniobra paglugway sa iyang gahom lapas sa 2010, kinsa may makapugong niya? Ang iyang pagkontrolar sa mga mayor ug mga gobernador ug ang iyang bag-ong mayoriya sa Korte Suprema maoy motino nga makuha ni Arroyo ang bisan unsa niyang gusto.
Ang iyang makabungog nga mayoriya sa House of Representatives epektibo nga nakapugong sa mga pagsuway sa nagkatibuwaag nga oposisyon sa pagpalagpot niya pinaagi sa impeachment. Samang mayoriya sa House napakyas sab pagpapas sa kusganong pagsupak sa Senado sa nangaging mga pagsuway pag-usab sa batakang balaod.
Apan wa na niya kinahanglana ang mga kongresista sa labing bag-o ug gikalisangan niyang salida.
-o0o-
Kalugwayan lang ang pagpabilin ni Arroyo sa Malakanyang kon mausab ang batakang balaod. Kalugwayan lang ang batakang balaod kon kalaktawan ang Senado. Kalaktawan lang ang Senado pinaagi sa People's Initiative (PI). Ug makalusot lang ang PI kon mosugot ang kinabag-an sa lokal nga mga opisyal, nga takos kaayong makatigom sa gikinahanglang gidaghanon sa mga pirma, ug kon moyango ang mayoriya sa labawng hukmanan.
Ang PI maoy gitumbok sa mga kaatbang ni Arroyo nga maoy napiliang ruta sa Malakanyang paglugway sa ilang malipayong mga adlaw. Bisan di pa sila andam nga moangkon, ang oposisyon inutil sa pagpugong sa tren sa PI. Mahimong gisalikway na sa kinabag-an sa katawhan si Arroyo. Apan unsaon man nila pagbalibad ang gipadaog nilang mga mayor ug mga gobernador?
-o0o-
Kinsa man tuod ang makapugong ni Arroyo? Ang mga nangambisyon nga mopuli niya sa 2010 seguro gyod nga mokisikisi. Apan unsa may ilang mahimo?
Mas maayo pa nga magsugod na lang silag panlingo. Wa na nila tagda ang lab-as nga mga pasangil sa kahiwian ug mga pagsuway pagpalagpot ni Arroyo sa katungdanan. Kay nanagana nga mag-atubang lang sila og mas lig-ong Noli de Castro kon siyay makapuli ni Arroyo. Way usa nilang nagdahom nga di pa ganahan si Arroyo nga manamilit.
-o0o-
Wa sila mag-inusara. Ubang nagpakabana nga mga hut-ong sa katilingban mao say panghunahuna. Kumbinsido silang di anghel si Arroyo. Apan nipili sila pagpaabot na lang nga mapupos ang nahibiling duha ka tuig. Kay sa pagsugal sa bag-ong pangu nga ilang gikahadlokang labaw nga di kasaligan.
Nagtuo silang may kinutoban ang kadaotan. Nga may katagbawan ang mga kiriwan. Nga moabot rang adlaw nga mabusog sila ug malinawon nang mobiya aron pagpahimus sa natumpi nilang katigayonan. Mirisi nilang tanan.
Ang bugtong gikinahanglan aron manghawod ang kadaotan mao nga ang maayong mga tawo mangiyugpos lang ug way buhaton. Ang gikinahanglan pagbatok sa kadaotan mao ang pagbarug alang sa katarung. Sa labing unang kahigayonan. Nga niabot tulo ka tuig nang nilabay.
Sa 2010, mahimong uwahi nang tanan. [30] leo_lastimosa@abs-cbn.com
No comments:
Post a Comment