PANGPANG SA TABUELAN
Nameligro ang kadalanan sa amihanan kasadpang Sugbo tungod sa pinatuyangan nga pagpangubkob sa anapog sa silong sa mga pangpang nga nag-umbaw sa agianan sa mga sakyanan. Ang mga anapog gipamaligya ngadto sa kontraktor sa dakong proyekto sa kasadpan. Nidahili nang dagkong bato ug nakatabon sa dakong bahin sa nasudnong highway sa Barangay Dalid, Tabuelan.
Naagian namong nidahiling mga bato sa among pagpaingon sa Iloilo niadtong Lunes sa buntag. Pagbalik namo gikan sa Iloilo sa Martes sa hapon, nagpasad gihapon ang mga bato. May nakita ming mga tawo nga naghinay-hinay og piko ug bara samtang nagtungtong sa dagkong bato. Gipakaingon namo kon silay nangubkob sa mga anapog. Hangtod nga nagpaila nga taga DPWH sila.
-o0o-
Matod sa mga kawani sa DPWH duha ka semana na human sa pagdahili sa mga bato. Apan wa pa gyod moabot ang buldoser nga ilang gipangayo gikan sa district office. Kon ang ilang piko ug bara ray saligan, siyam-siyaman sila una mahawan ang agianan. O, simbako layo ra to, maabtan sila sa sunod nga pagdahili sa mga bato.
Nga maoy nalikayan sa mga nangubkobay sa anapog. Ang nahibilin mao na lang ang mga anapog nga maayong pagkatumpi sa daplin sa highway nga ilang gikubkoban. Di ka maglisod pagpangita og katin-awan nganong wa mabadlong ang ilegal nilang kalihokan. Samtang wa magdali ang mga kawani sa DPWH paghawan sa mga bato, labaw pa silang wa magpakabana pagsakmit sa kinubkob nga anapog.
-o0o-
Ang pagkubkob sa anapog maoy gibasol sa DPWH nga nakapahuyang sa tiilan sa pangpang ug nakapalusno sa dagkong bato gikan sa ibabaw. Sa among pagbiya sa Barangay Dalid, among nahibaw-an nga di lang sa Tabuelan gihimo ang ilegal nga pagpangubkob sa anapog. Sa ubang bahin sa nasudnong highway, di lang ang mga bato maoy nameligrong mangatagak kon dili ang mas dakong bahin sa pangpang ang gikahadlokan nga matumpag.
Unya na ba molihok ang kagamhanan kon ang tibuok pangpang nay mahapla ug motabon sa highway nga nagsumpay sa amihanan kasadpang kalungsoran ngadto sa ubang bahin sa Sugbo? Unya na ba sila magkarakara pagpatuman sa balaod kon duna nay mga kinabuhi nga makalas?
-o0o-
Tinuod gyod diayng panultihon sa atong katiguwangan nga magkalayo gikan sa mga dakbayan magkahuyang sang pagpatuman sa balaod. Maong kon magkahilit ang kalungsoran mas daginuton ang pagtagad sa kagamhanan.
Napasagdan man gani ang higante ug nagnganga nga mga libaong sa kadalanan sa Metro Cebu, unsa na kaha ang awaaw nga naglikuliko nga kadalanan sa Tabuelan nga maayo lag malilian kon mo-asul ang buwan. Hain na mang road users tax? Mahibung pa bang Malakanyang nganong mangyam-id lang ang kinabag-an kon mopasidaan silang masakripisyo ang batakang mga serbisyo kon tangtangon ang madaugdaugong expanded value added tax? [30] leo_lastimosa@abs-cbn.com
No comments:
Post a Comment