Arangkada of Leo Lastimosa for August 4, 2008

          2,012 DIAY KA BAYANI

 

          Sa kinatibuk-an, kapin sa duha ka libo ka mga Sugbuanon ang nagpanon paingon sa walo ka buwag nga mga dapit nga dungan nga gipahigayonan sa Halad sa Kinabuhi, ang pinalapdan nga Kapamilya Blood Donation Campaign.  Gisungasong nila ang tanang kakulian—pag-uswag sa ubang lakaw, pagpalta sa trabaho o klase, pagpaabot og pila ka takna, pagbalhin-balhin gikan sa usa ka venue ngadto sa lain ug, ang labing lisod suklan sa kinabag-an nga labing unang higayong niapil sa kalihokan, ang kahadlok pagpatusok og dakong dagom ug pagpakuha og dugo—aron lang makahatag sa gasa sa kinabuhi.

          1,464 ra hinuon nilay gitugotan nga makahatag og dugo.  Apan ang nahibiling 548, nga gibalibaran tungod sa kakulian sa panglawas ug sa kakuwang sa panahon ug blood bags, sama ra kamabayanihon sa ilang determinadong tinguha pagluwas og mga kinabuhi.

-o0o-

          Niang kinatibuk-ang asoy sa gidaghanon sa blood donors nga nakapasar ug nabalibaran sa walo ka venues sa Halad sa Kinabuhi:

·        EMall Parking Area nga giduma sa CCMC—337 ang nakahatag og dugo ug 47 ang nabalibaran tungod sa kakulian sa panglawas;

·        Gaisano Grand Fiesta Mall nga giduma sa PNRC—255 ang nakahatag og dugo, 48 ang nabalibaran tungod sa kakulian sa panglawas ug 70 ang nabalibaran kay nahutdan nag blood bags;

·        Mandaue City Hall Grounds nga giduma sa Dr. Ignacio Cortes Gen. Hospital ug Mandaue City District Hospital uban sa RBC—150 ang nakahatag og dugo, 10 ang nabalibaran tungod sa kakulian sa panglawas ug 20 ang nabalibaran tungod sa kaapiki sa panahon;

·        Chong Hua Hospital—150 ang nakahatag og dugo ug 59 ang nabalibaran tungod sa kakulian sa panglawas;

·        Marina Mall nga giduma sa RBC—123 ang nakahatag og dugo ug 52 ang nabalibaran tungod sa kakulian sa panglawas;

·        Cebu Doctors University Hospital—102 ang nakatag og dugo ug 102 ang nabalibaran tungod sa kakulian sa panglawas; ug

·        Perpetual Succor Hospital—98 ang nakahatag og dugo ug 15 ang nabalibaran tungod sa kakulian sa panglawas.

-o0o-

          Nagpadayon nang screening sa 1,464 ka bags (o 732 ka litro) sa dugo nga natigom sa usa ka adlaw.  Sa mosunod nga mga adlaw, makaginhawag luag ang tanang tambalanan sa Sugbo tungod sa abundang dugo nga mahimong makaluwas og hangtod sa 4,392 ka kinabuhi.  Ang matag blood donor, gawas sa lalim nga katagbawan nga makaluwas og mga kinabuhi nakadawat sab og mga insentibo:

·        Blood donation card nga molibre sa dugo ug screening fee kon simbako siyay magkinahanglan;

·        Libreng physical examination kay mahibaw-an man duna bay sakit pinaagi sa dugo; ug

• ABS-CBN t-shirts sa unang 700 ka donors, t-shirts sa tanang donors sa PSH ug 35% nga diskuwento sa charity ward sa tanang tambalanan sa CDUH alang sa malampuson nilang donors.  [30]  leo_lastimosa@abs-cbn.com