RUTA SA ILOILO
Natanggong ang mga hinabang sa mga Sugbuanon alang sa mga biktima sa bagyong Frank sa kasadpang Kabisay-an tungod sa kakuwang sa barko. Nga maoy labing sayon nga kakargahan sa relief goods gikan sa Sugbo ngadto sa Iloilo, usa sa labing nagusbat sa katalagman. Pipila ra ka barko ang nagsubay sa ruta. Tungod sa pagpugong sa mga barko sa Sulpicio Lines, nag-awas sila kanunay sa mga pasahero ug labi na sa mga kargamento.
Ang mga barko sa Philippine Navy way schedule pag-adto sa Iloilo. Gikuyawan mi nga kon mangahas paghangyo, kami maoy pabayron sa lana. Nga maoy among gilikayan. Di mi mogasto bisan usa ka dako sa cash donations. Angayng madawat sa mga biktima ang tanang hinabang hangtod sa kataposang usa ka dako.
-o0o-
Dugay nang may nitanyag sa ilang mga trak. Nga mao lay pun-on sa mga hinabang ug isakay og barge gikan sa Sugbo paingon sa Negros ug isakay na sab og laing barge gikan sa Bacolod paingon sa Iloilo. Apan amo silang gibalibaran. Tungod sa labihang kaikog.
Kay labihang taasa sa biyahe. Layo ug tuyok kaayong agianan. Kon moagi mi sa habagatang Sugbo paingon sa Negros, kinahanglan na sab ming mobalik sa amihanan aron makaabot sa Iloilo. Tulo ka oras ang biyahe paingon sa Samboan. Lima ka oras gikan sa Tampi paingon sa Bacolod.
Wa pa nay labot ang duha ka hugna sa way kinutoban nga pagpaabot, pagsakay, paglawig ug pagkanaog sa mga trak sa mga barge.
-o0o-
Maayo na lang nga may nagpakabanang mga kapamilya, nga ganahan ug kamao sab nga mosuhid sa mapa, nga nakakita og mas mubo nga ruta: Inay moadto pa mi sa habagatang Sugbo, adto na lang mi sakay og barge sa Tabuelan sa amihanan kasadpang Sugbo. Nga may barge nga moda sa mga kargamento ngadto sa Escalante City. Nga duha ka takna na lang gikan sa Bacolod.
Maong nakahunahuna mi pagdawat na lang sa gitanyag nga mga trak. Hinaot nga wa pa manluod ang matinabangong mga Sugbuanon sa among kaikog pagdawat sa ilang tanyag. Aron nga sa kataposan mahatag na gyong mga hinabang ngadto sa mga biktima.
-o0o-
Kana kon wa moy laing ikasugyot nga mas duol nga agianan ug mas sayon nga paagi paghakot sa mga hinabang labang sa duha ka dagat. Nga maoy nag-unang hinungdan nganong nagpabaga ko pagsuwat ini. Mangayo mi sa inyong tabang. Labi na tong mga suhito sa pagbiyahe para Iloilo.
Palihug tudloi mi sa tukmang dan. Mag-awas sa inyong mga hinabang ang tulo ka dagkong trak nga gitanyag. Ang amo na lang gyong ka-way alamag unsaon pag-abot ang atong silingang mga lalawigan maoy nag-uwang sa kamanggihatagon sa mga Sugbuanon gikan sa dako ug dinaliang panginahanglan sa mga Ilonggo. [30] leo_lastimosa@abs-cbn.com
No comments:
Post a Comment