PAKAUWAW SA TALISAY
Inay pasidunggan, angayng silotan ang kapolisan sa Talisay City. Di sila maoy nakasulbad sa krimen, nga giisip nga labing bangis sa Sugbo karong tuiga, nga nahitabo sa ilang kaugalingong nataran. Kini bisan kon ang kabanay sa mga biktima unang nidangop sa Talisay City Police Office. Salamat sa pagpabaya nilang Police Chief Romeo Perigo ug ginsakopan, napugos ang mga tagtungod pagdangop sa mas takos ug mas maabi-abihon nga mga polis sa silingang lungsod sa Minglanilla.
Ang bugtong tampo sa kapolisan sa Talisay pagsulbad sa kasong pagpatay nilang Eva Mae Peligro ug Gwendolyn Balasta mao ang pagdawat og limpiyo. Igo na lang nagtuhog sa mga ebidensiya nga nahipos sa mga polis sa Minglanilla ug nagpasaka sa kaso atubangan sa Talisay City Prosecutor's Office.
-o0o-
Taphaw ang lusot ni Perigo nga wa lang magkasinabtanay ang iyang mga polis ug ang mga paryente nilang Peligro ug Balasta. Ang pagpangiyugpos lang sa iyang mga polis sa alarma nga wa na igkita sa mga kabanay silang Peligro ug Balasta, bisan unsaon pag-inat ang pagsabot sa mabuot nga mga Talisaynon, di maisip nga yanong kaso sa wa pagsinabtanay.
Kaso to sa mga polis nga wa kasabot sa ilang trabaho. Ambot giunsa pagtudlo ni Perigo ang iyang mga sakop, apan makauuwaw nga pagpabaya ug pagbudhi sa katungdanan ang ilang gihimo. Kon may modangop sa presinto nga wa nang kakita sa ilang mga kabanay, magsusi ka. Di kay mora kang pahoy nga kutob lang sa paglista sa alarma.
-o0o-
Mas maayo ra sab hinuon nga ang kapolisan sa Minglanilla ang unang nakasusi sa kaso. Dako ang kahigayonan nga nagpabilin pang misteryo ang krimen kon mga polis pa sa Talisay ang gisaligan. Kay pipila ka adlaw ang nilabay, nabantang sab sa mga Sugbuanon ang laing makauuwaw nga salida nilang Perigo ug kaubanan.
Ang mga sakop ni Perigo, gipul-an ba kaha kanus-a mahuman ang 13 ka takna nga pagkatkat ni Geraldine Manreal sa punoan sa lubi sa Barangay Linao, nibiya bisan wa pa mahusay ang krisis. Namalik lang sila dihang nilayat nga si Manreal ug namatay. Inay silotan ang iyang mga sakop, nakatag-an mo, giduphan ni Perigo ang ilang kabuang.
-o0o-
Di lisod ang pagpangita sa hinungdan nganong nipilit si Perigo sa katungdanan bisan sa iyang mga bulilyaso. Di na ta kinahanglang motan-aw og layo pagsusi nganong sikit kaayo si Perigo sa kasingkasing ni Talisay City Mayor Soc Fernandez.
Ang pagpangiyugpos lang nilang Perigo ug kaubanan sa kapid-an na ka mga reklamo batok sa giingong pangabuso sa anak sa mayor nga si Joavan mahimong maoy nahimong labing lig-on nilang panagang. Inay pasidunggan silang Perigo sa Talisay City Council, angayng luwason sa mga konsehal ang mga Talisaynon gikan sa dugang mga eskandalo. [30] leo_lastimosa@abs-cbn.com
No comments:
Post a Comment