Arangkada of Leo Lastimosa for August 11, 2008

          TABANG SA ILOILO

 

          Sa inyong pagbasa ini, nagbiyahe na mi paingon sa kasadpang Kabisay-an.  Kuyog namo ang tulo ka trak sa mga hinabang gikan sa manggihatagon nga mga Sugbuanon alang sa mga biktima sa bagyong Frank sa Iloilo ug kasilinganang mga lalawigan nga maoy labing nagusbat sa katalagman.  Tibuok adlaw ang among panaw.  Kon way kakulian, salamat sa inyong mga pangaliya, makaapud-apod na mi sa inyong mga hinabang ngadto sa mga biktima karong hapon.

          Bisan sa kalayo, bisan sa kalisod ug bisan sa kakutas, gipaningkamotan namo nga matuman ang among saad ninyo sa pagsugod sa relief campaign nga dad-on gyod namo sa mga dapit nga naigo sa bagyo ug pangunayan namo pag-apud-apod ang inyong mga hinabang.

-o0o-

          Ang tulo ka dagkong trak pulos pinahuwaman.  Ang duha ka trak gipanag-iya sa Cindy's Enterprises.  Ang ikatulo iya sa laing magpapatigayon nga nihangyo nga di magpaila.  Gawas nga nagpada sa ilang mga kargador, sila pa gyoy nigasto sa krudo ug niabaga sa plitehan sa mga barge gikan sa Sugbo paingon sa Negros ug gikan sa Bacolod paingon sa Iloilo.

          Ang ilang manggihatagon nga tanyag sa panabang maoy nakapakumbinser namo sa pagsugot ning taas nga baktas paghakot sa relief goods.  Mas hayahay untang barko apan, tungod sa kadaghan sa ubang mga kargamento nga natanggong sa mga pantalan, maanam-anam ug makatag ang mga hinabang.  Bahala nag pamaolan mig usa ka tuig inigkahuman ning duha namo ka adlaw nga biyahe, basta nga matingob paghatod ang mga hinabang.

-o0o-

          Magpasalamat sab mi sa E. B. Aznar Shipping Corp., nga nagbase sa Dakbayan sa Sugbo, sa ilang paghatag namog dakong diskuwento sa plitehan sa among mga sakyanan ug mga kargamento.  Di lang gikan sa Sugbo paingon sa Negros karong adlawa kon dili apil na sab ang biyahe pabalik gikan sa Negros paingon sa Sugbo ugma. 

Wa na man mi kaila sa Bacolod, nanghinaot ming makasakay sab dayon mi og barge pagtabok paingon sa Iloilo.  Labaw nang wa man mi kaila sa Iloilo, manghinaot ming may kadayonan ug kakatulgan mi didto.

-o0o-

          Hangtod sa 6,530 ka pamilya ang mahatagan sa duha ka hugpong sa among kargamento—ang una gikan sa KBP Cebu Chapter Radiothon, ug ang ikaduha gikan sa Kapamilya Relief Campaign sa DYAB Abante Bisaya ug ABS-CBN Cebu:

·        199 ka sako sa food packs (nga tag-napu ka food packs matag sako) sa KBP nga gitipigan sa social hall sa Cebu Normal University; ug

·        454 ka food packs (nga tag-napu sab ka food packs matag sako), 561 ka sako sa used clothing ug 51 ka containers sa mineral water gikan sa ABS-CBN Broadcast Complex.

Ang mga hinabang sa KBP among itunol ngadto ni Arsobispo Angel Lagdameo sa Jaro; samtang ang sa ABS-CBN Cebu iapud-apod dayon ug ang mahibilin itugyan sa ABS-CBN Iloilo.  [30]  leo_lastimosa@abs-cbn.com