BARAHA NI GLO
Wa pa gani mausab ang batakang balaod, nagmalampuson na si Pres. Arroyo. Wa pa gani kalugwayi ang iyang termino, angay na siyang magsaulog.
Kay, sama sa naandan, nilampos na sab si Arroyo pagbuak-buak sa iyang mga kaatbang. Sa unang mga pagsuway niya pag-usab sa batakang balaod, nagkahiusa ang politikanhong oposisyon pagbabag niya. Napalihok nila ang Simbahang Katoliko ug ubang gamhanang mga institusyon sa daotang tinguha sa Malakanyang paggamit sa charter change alang sa pagpatigbabaw sa hakog nga politikanhong mga interes sa mga namunoan.
Apan ning higayona, gisakyan ni Arroyo ang nagkasungi nilang mga interes. Aron pagsakmit sa dugay na niyang gipangandoy: Dugang gahom ug dugang katuigan sa katungdanan.
-o0o-
Nahibawo si Arroyo nga wa siya mag-inusara sa kahinugon sa gahom. Nga bisan ang labing higpit niyang mga kaatbang di pa andam nga hingpit nang manamilit sa ilang mga katungdanan. Maong nakakita siya og dakong buslot. Aron pagpalusot sa iyang kataposang baraha paglikay nga mahukasan sa panimawos sa katawhan nga iyang gipahimuslan.
Ang kausaban sa batakang balaod mao ang iyang bugtong puhonan. Di siya makahimo pagpabilin sa gahom kon di kalugwayan ang iyang termino sa mga paagi nga gitakda sa konstitusyon. Ang lain niyang alternatibo mao ang pagpangahas pagsunod sa nangalisbo nga mga lakang sa diktador nga si Ferdinand Marcos. Ug pagtino nga ngitngit pa sa alkitran ang iyang politikanhong kaugmaon.
-o0o-
Salamat sa higanteng maniobra ni Arroyo, nagkabuwag na silang Senate Minority Leader Aquilino Pimentel Jr. ug Senador Panfilo Lacson. Si Pimentel di nang kabakwi sa iyang resolusyon alang sa federalismo karon nga gisakyan na sa Malakanyang ang iyang salida. Si Lacson nga nakatimaho og di mao nihulga na pagbakwi sa iyang pirma sa resolusyon.
Silang Lacson ug Pimentel di maoy una ug kataposan nga magkasungi. Ang mga pangu sa oposisyon nga wa nay kapaingnan kon madayon ang piniliay sa 2010, mosunod ni Pimentel pagtino nga di maahat ang ilang pagretiro. Samtang ang mga politiko kansang mga laraw madiskaril kon way piniliay sa 2010, mokisikisi sab samang Lacson.
-o0o-
Mas nakapait mao nga ang kausaban sa sistema sa kagamhanan di maoy tinuod nga tuyo ni Arroyo. Nganong morisgo man siya nga mawad-an sa makalilisang nga gahom pagkontrolar sa katigayonan ug tanang institusyon sa nasud kon makatag nang gahom sa sentralisadong kagamhanan ngadto sa nagkalainlaing mga estado?
Gilamian na siya pag-ayo sa Malakanyang aron boluntaryong motahan sa iyang gahom. Sama sa naandan gamiton na sab niyang cha-cha aron pagpalusot sa tinuod niyang tumong: Ang paglugway sa iyang pagpabilin sa katungdanan uban ang sama kon di man mas dako pang gahom nga iya karong gipahimuslan. Ang mga senador ug mga kongresista ug mga gobernador ug mga mayor, sama sa naandan, igo lang niyang himuon nga tikanganan. [30] leo_lastimosa@abs-cbn.com
No comments:
Post a Comment