TIPIGANAN SA SUGBO
Pila ka tug na lang ug mapahigayon na gyod ang gikahinaman nga "Kinaiyang Sugbuanon," ang paglab-as sa mga awit, balak ug ubang maanindot nga kalihokan sa mabulukong kagahapon sa Sugbo. Karong Sabado sa gabii pasidunggan ang bantogang mga kompositor ug mga mag-aawit nga nakatampo sa pagpalambo sa mga kinaiyang Sugbuanon. Nga gikahadlokang matabonan ug makalimtan na lang sa kakiat ug kagahob sa kabag-ohan.
Si Dr. Jose "Sir Dodong" Gullas nagpasiugda sa kalihokan pagpasidungog sa nitaliwan niyang mga ginikanan. Iyang tampo pagpabiling buhi sa atong kabilin. Gihulagway ni Sir Dodong ang iyang paningkamot nga usa lang ka tulo sa luha sa kalaworan sa mga pagsuway batok sa dilang Sugbuanon. Apan ang init nga paghangop sa kalihokan nagtino nga ang bul-og nga iyang gisugdan mokuyanap, manakod ug makapukaw sa mga Sugbuanon sa dako ug dinaliang panginahanglan pagpakabana pagluwas sa atong kasaysayan.
-o0o-
Dungan sa mabulukong tulomanon karong Sabado, pormal sang ilusad ni Sir Dodong ang Tipiganan sa mga Handumanan sa Kinaiyang Sugbuanon Foundation. Siyay motanyag og luna nga pahimutangan sa tanang tipaka sa kagahapon sa mga Sugbuanon aron nga di hingpit nga mawani ni makalimtan.
Ang tanang manambong sa "Kinaiyang Sugbuanon" gidasig pagdala sa ilang gihuptan nga karaang mga plaka, mga pamantalaan, mga libro, mga hulagway ug ubang bililhong kabtangan sa ilang katiguwangan. Hatagan sila og opisyal nga resibo pagmatuod sa ilang pagpanag-iya sa kabtangan, nga butangan sa ilang mga ngan aron may kapasalamat ang umaabot natong mga kaliwatan sa ilang pagsuhid sa mga bantayog sa atong kaagi.
Ang di katambong sa kalihokan karong Sabado tungod sa di kalikayan nga kakulian giawhag sa pagda sa karaan nilang kabtangan ngadto sa DYAB Abante Bisaya o sa University of the Visayas (UV) aron nga malistang daan ang ilang mga tampo ug kapasalamatan sila atol sa paglusad ni Sir Dodong sa tipiganan.
-o0o-
Ikaduhang hugna na ang pasidungog nga masaksihan karong Sabado. Dason ni sa pagpasidungog ni Sir Dodong sa niaging tuig sa mga kabanay nilang 'Yo Karpo Ben Zubiri (Matod Nila), Vicente Rubi ug Mariano Vestil (Kasadya Ning Taknaa). Ang mangu sa pasidunggan karong Sabado mao ang mga kapamilya nilang Dominggo "Minggoy" Lopez (Kamingaw sa Payag) ug Manuel "Maning" Velez. Ilhon sab silang Max Surban nga naila sa iyang novelty songs ug si Kakoy Canete sa nga maoy nipaila sa arnis ngadto sa ubang kanasuran sa kalibotan. Upat ka bantogang Sugbuanong mag-aawit pasidunggan sab: Silang Erlinda Dajao Sayson, Novo Bono Jr., Al Comendador ug Jaime Salazar.
Ang mga tiket nga tag P100 ug tag P50 lang mapalit gikan sa UV Alumni office, The Freeman, Banat ug Globe Telecom's Business Centers sa Ayala, SM ug Elizabeth Mall. Ang "Kinaiyang Sugbuanon" ipahigayon sa Cebu International Convention Center (CICC). [30] leo_lastimosa@abs-cbn.com
No comments:
Post a Comment