Arangkada of Leo Lastimosa for March 14, 2008

        MGA AMOTAN

 

        Gisubli pagtataw ni Dr. Carolino Mordeno, regional director sa Departamento sa Edukasyon (DepEd 7), nga ang mga amotan nga gikolekta sa mga tulonghaan alang sa graduwasyon di babag sa pagpaso sa entablado sa mga tinun-an kansang mga ginikanan di makabayad.  Matod ni Mordeno di na bag-o, kay matag tuig-tingtungha na ning gibalik-balik, ang kamandoan ni Education Secretary Jesli Lapus nga himuong yano ug likayan ang gastuso nga mga tulomanon sa graduwasyon.

        Mao ni katin-awan ni Mordeno atubangan sa sibaw nga reklamo sa mga ginikanan sa pagpamugos sa mga tulonghaan nga kinahanglang bayran ang mga amotan aron ang ilang mga anak mahatagan og final grades, mahatagan og clearance ug maka-gradwar.  Nipasidaan si Mordeno nga kasilotan ang mga magtutudlo ug mga prinsipal nga molapas sa lagda sa DepEd.

-o0o-

        Sa yanong pagkasulti:

·        Makahimo ang mga tulonghaan, pinaagi sa Parents-Teachers-Community Association (PTCA), pagpahamtang og mga bayranan alang sa graduwasyon, kay unsa may dagway sa graduwasyon kon wa na lang say tinuyo nga pangandam ug tulomanon;

·        Ang mga amotan kinahanglan di kaayo dako nga di na maabot sa kinabag-an sa mga tinun-an ug mga ginikanan;

·        Kon dunay mga ginikanan nga di gyong kabayad tungod sa kawad-on di kababagan ang ilang mga anak sa pagpaso ug pag-apil sa gradwasyon;

·        Kon dunay mga ginikanan nga may katakos unta pagbayad apan magdumili sa pagbayad, makapaso ug maka-gradwar gihapon ang ilang mga anak; sa ato pa

·        Ang mga tinun-an maka-gradwar bisan wa silay toga, bisan magsul-ob lang sa uniporme sa eskuylahan ug bisan sa classroom lang ipahigayon ang gradwasyon.

-o0o-

        Ang mga tinun-an ug mga ginikanan malipay sa baruganan ni Mordeno ug sa DepEd.  Apan ang kadagkoan sa PTCA di malingaw.  Labi na kon ilang gitan-aw ang graduwasyon isip kahigayonan sa pagpaukyab sa tulonghaan, pagpasundayag sa ka ug pagpangolekta og dugang pundo.

        Di sab malingaw ang mga magtutudlo ug mga prinsipal.  Kon ang ilang tuyo mao ang pagpalapad sa ilang papel ngadto sa ilang kadagkoan.  Ug labi na kon nagsalig nga mosaka ang ilang performance rating kon mas dako ang ilang koleksiyon.

-o0o-

        Kon tinuod ang pangangkon sa pipila ka mga magtutudlo nga silay motapal kon di kaabot og 75% sa mga tinun-an ang makabayad sa PNRC, anti-TB ug ubang mga amotan, ug kon tinuod ang pangangkon sa pipila ka mga prinsipal nga silay motapal kon di kabayad ang mga magtutudlo, amo silang dasigon sa pagreklamo.

        Kon tinuod nga pugngan ang ilang suholan kon di makatapal sa bayranan, angay silang mokiha.  Isip mga magtutudlo, silay labing nahibawo nga ang kasaypanan sa ilang kadagkoan pagpamugos sa amotan di matul-id sa paghimo og laing sayop:  Ang pagduhig sa kabos nga mga tinun-an sa kapakyas sa kagamhanan pagtuman sa batakang tahas paglibre sa edukasyon sa elementarya ug segundarya.  [30]  leo_lastimosa@abs-cbn.com