Napilde ba ang people power kay nagtungkawo gihapon sa Malakanyang si Pres. Arroyo bisan sa sunud-sunod nga mga protesta sa kadalanan batok sa iyang pamunoan? Moisa na ba sab ta, sa makausa pa, sa puti nga toalya? Sama sa atong gihimo human napakyas ang nangaging impeachment proceedings sa Kongreso batok niya?
Alang nako wa mapilde ang people power. Wa makawang ang mga protesta sa kadalanan sa kaulohan, dinhi sa Sugbo ug sa ubang mga lalawigan. Bisan nagpabilin pa sa gahom si Arroyo ug ang iyang mga alyado, natay-og na sila sa sibaw nga mga protesta. Way sukaranan ang mga awhag nga mobalik na lang sab ta og pangiyugpos.
-o0o-
Ang mga protesta sa kadalanan, bisan kon wa mosangpot sa gitinguha nga kausaban sa nasudnong liderato, sama sa Edsa Uno sa 1986 ug sa Edsa Dos sa 2001, dunay duha ka lantip kaayong mga suwab:
Una, nakapukaw sila sa nagpakabana apan nagpakahilom lang nga kinabag-an sa katawhan nga wa diay sila mag-inusara sa ilang kahimangod sa higanteng mga kahiwian nga nahimo sa kagamhanan ug nga daghan diay ang nisawo sa ilang mga pangandoy alang sa makiangayon nga kausaban; ug
Ikaduha, napugwat ang kagamhanan nga di na diay nila mailad, malipat, mahaylo, mahudlat ni mabungul-bungolan ang nagmata na nga katawhan ug nga di na diay silang kapatuyang sa pagpaburot sa pribado nilang mga panudlanan ginamit ang ilang mga katungdanan.
-o0o-
Bisan kon sa makausa pa nakalahutay na sab si Pres. Arroyo sa lab-as nga mga pagsuway pagpalagpot niya sa gahom, di mahitabong mahilom na lang sab pagbalik ang katawhan. Ug mokalawat sa propaganda sa Malakanyang nga mas makaayo alang sa tanang hingtungdan ang pagpaabot sa pagkapupos sa iyang termino sa 2010.
Hangtod nga di matubag ang mga pasangil sa pagpanikas, pagpamakak ug pagpangawat batok ni Arroyo, sa iyang bana ug ubang mga hinanib, di mahunong ang mga protesta. Busa di pang katug nga maghayang ang mga nagsagakay sa naapiki nga pamunoan.
-o0o-
Sa gusto niya ug sa dili, si Pres. Arroyo kinahanglang manubag sa mga nahimo ug wa mahimo sa iyang pito na ka tuig nga pamunoan. Kinahanglan niyang tubagon ang iyang pakigsulti ni kanhi Comelec commissioner Virgilio Garcillano. Kinahanglan niyang tubagon ang mga pagduda sa pagkawat sa iyang mandato sa piniliay sa 2004. Kinahanglan niyang tubagon gibutyag nga Jose Pidal bank account, fertilizer scam ug NBN-ZTE scandal.
Di siya mapasakaan og kaso sa korte. May kaso na siya sa Ombudsman apan gikahadlokang di ning kairog. Ang makabungog niyang mayoriya sa Kongreso motino nga way impeachment complaint nga makadut niya. Ginawongan niya ang militar, kapolisan, simbahan ug ubang mga institusyon. Apan kay duna pa may kaangayan manubag siya ning tanan. [30] leo_lastimosa@abs-cbn.com
No comments:
Post a Comment