NAGHIUSA PAGSUKOL
Samtang nanglaba ko gahapon sayo sa buntag sa kabos nakong pinuy-anan sa Pagsabungan, Mandaue City, nakadawat kog text gikan ni Atty. Ruphil Banuc sa DYHP. Mahimo ba kuno kong interbyuhon sa alas-6:30? Nitubag ko nga "OK."
Alas-6:37 nang nibagting akong telepono. Si Chester Abadilla sa DYRF ang nanawag. Sa wa pa kong kapangutana kon nibalhin na ba siya sa DYHP, giingnan kong Chester nga interbyuhon kong Ike Durano. Kaingon nako nga naunhan lang ang DYHP sa DYRF sa pagtawag nako. Apan dihang gihatagan na nilag audio akong linya, tingog ni Ruphil ang akong nabati.
Nagdungan na ba sag og sibya silang Ruphil ug Ike? Natubag dayong akong pangutana. Gawas nilang Ruphil ug Ike, kauban sab nilag sibya si Carlo Dugaduga, ang bag-o lang nakagawas sa bilanggoan nga area manager sa Aksyon Radyo.
-o0o-
Kadiyot lang ang among panagsulti kay, sama sa naandan, pulos nag-apas sa panahon sa tulo ka sibyaanan. Ang sayong buntag man gud ang tapok-an sa labing daghang commercials sa radyo. Nga usa sa mga hinungdan nganong lisod tuohan nga nagkonsabo ang nag-unang mga sibyaanan paghimo og pooled broadcast alang sa taphawng hinungdan. Kon nakahukom ang mga magsisibya pagsakripisyo sa bililhon nilang mga gutlo ug pagpadaplin sa higpit nilang kumpetinsiya, duna gyod tingali silay mas mahinungdanong kawsa kay sa pag-atake sa usa ka politiko.
Laing tilimad-on nga way konsabo: Dihang gitawgan nako si Ruphil pasado alas-8, samtang naghaguros ang akong taxi kay, sama sa naandan, nauwahi na sab ko sa job fair sa Abellana National School, giingnan ko niya nga silang Ike maoy nagkasabot paghugpong sa ilang sibya ug pagtawag nako isip interviewee.
Sunod nakong gitawgan si Edward Abad sa ABC 5. Nga wa gani diay kadungog sa sibya. Labihan gyod diayng konsaboha! Nga ang chairman ug standards authority officer sa KBP Cebu Chapter pulos man way kasayuran!
-o0o-
Nasubo ko nga ubos kaayong pagtan-aw ni Bise Gobernador Greg Sanchez ni Carlo ug sa ubang mga magsisibya sa Sugbo. Matod ni Sanchez si kanhi mayor Gilbert Wagas ray tuyo sa iyang kihang libelo apan giapil lang niya si Carlo. Dihang nalutsan si Carlo og arrest warrant, nitanyag siyag amot nga P5,000 bisan sa kasayuran nga P70,000 ang girekomendar nga piyansa. Human gisalikway ni Carlo ang tanyag, namasangil pa gyod nga gisugo nako si Carlo nga magpapriso og usa ka gabii aron makahimo mig pooled broadcast pagka sunod buntag.
Tingali adunahan na kaayo si Sanchez nga maglisod na pagsabot nga ang kabos nga mga magsisibya maglisod pagtigom og P70,000 sa usa lang ka pamilok. Tingali nahubog na sa gahom ug sa iyang produkto nga di nang kadawat nga may kabos pang mga magsisibya nga mangahas pagpadayag og sukwahi nga panghunahuna. [30] leo_lastimosa@abs-cbn.com
No comments:
Post a Comment