NGANONG SI LOZADA
Kon nigawas si Rodolfo Noel Lozada Jr. tulo ka tuig ang nilabay, kanus-a niulbo ang labing unang higanteng eskandalo nga nakatay-og sa pamunoan ni Pres. Arroyo, di unta ingon ini kamahinungdanon ang iyang testimoniya sa kahiwian sa kagamhanan nga iyang naapilan. Apan niadtong 2005, wa pay NBN-ZTE. Samtang mas bug-at ang Hello Garci scandal, kay nahilambigit man ang ka-lehitimo sa iyang mandato nga nakuha sa piniliay sa 2004, apan ang pagtumaw sa saksi nga susamang Lozada niadtong higayona di unta makapugwat sa Malakanyang sama karon.
Ang nakadapit sa pagtagad sa kinabag-an sa katawhan (92% sa mga nanan-aw sa "Harapan" tali nilang Lozada ug sa iyang mga gipasanginlan sa ABS-CBN sa tibuok nasud ang nituo sa iyang pasangil) mao ang pagtumaw sa iyang testimoniya human gibaraw ang tanang nangaging mga pagsuway pagsusi sa gikuwestiyon nga mga transaksiyon sa pamunoan.
-o0o-
Di lang usa, di lang duha, kon dili tulo gyod ka impeachment complaints ang gibasura sa Kongreso tungod sa Hello Garci ug ubang mga eskandalo. Naglaom unta ang katawhan nga matarung pagpatuman ang proseso nga mao ray bugtong paagi pagpaningil sa presidente nga, ubos sa balaod, di makiha sa bisan asang hukmanan samtang naglingkod pa sa Malakanyang. Bisan nabasura pa untang impeachment complaints human sa makiangayong husay, di maukay og ingon ini ang katawhan sa expose ni Lozada.
Apan wa tukia ang mga pasangil. Wa hatagi og higayon ang mga nipasaka sa mga kaso pagpresentar sa ilang mga saksi ug mga ebidensiya. Ang kinabag-an sa mga kongresista nga niluba sa mga kaso wa mopakita og bisan gamay na lang pagpakaaron-ingnon nga gipasikad sa merito ang ilang hukom. Way bisan usa nilang nagtagad pagsalimbong sa pagbaha sa kuwarta gikan sa liderato sa House ug sa palasyo wa pang binuntagay nga mga botasyon.
-o0o-
Si Lozada kurakot. Ug mananapaw. Bisan wa pa matarung pag-detalye ang iyang mga anomaliya sa Philippine Forest Corporation ug sa iyang kaminyuon, giangkon nang Lozada nga may mga nahimo siya niadto nga nakapaubos sa iyang pagtan-aw sa iyang kaugalingon. Si Lozada talawan. Wa niya ilimod nga hangtod sa kataposang gutlo nagdumili unta siya pag-atubang sa mga senador.
Silang kanhi Comelec commissioner Virgilio Garcillano ug kanhi Agriculture undersecretary Joc-Joc Bolante may kahigayonan sab untang mahimong Lozada. Apan lahi ni Lozada gipalabi nilang kangitngit kay sa kahayag.
-o0o-
Di ko andam modupa nga tinuod ang tanang sulti ni Lozada. Apan sablig siya sa lab-as nga tubig. Sa atong pangiyugpos atubangan sa nangalisbong pamakak sa mga politiko, si Lozada nipahinumdom nato nga di ta inutil pagbadlong sa labing dagkong mga opisyal sa kagamhanan.
Maong labaw ni Cory, Erap, Ping, Villar, Roxas, Legarda ug ubang nitanyag pagpangu sa kampanya alang sa katarung ug kamatuoran, si Lozada ang gidumog sa mga tinun-an, mga batan-on ug ubang mga hut-ong nga nagpakahilokm sa nangaging katuigan. [30] leo_lastimosa@abs-cbn.com
No comments:
Post a Comment