TUBAG SA PALASYO
Clark, Pampanga----Nia magtapok dinhi ang mga haligi sa Kapisanan ng mga Brodkaster ng Pilipinas (KBP) alang sa 11th National Chapter Leaders Conference. Tinuig ning tigom sa mga tagduma sa mga sibyaanan sa radyo ug telebisyon sa mga dakbayan ug lalawigan nga gitumong pag-umol sa direksiyon sa industriya sa pagpanibya sa mosunod nga katuigan.
Kining kalihokan giisip nga mas makahuloganon kay sa tinuig nga tigom sa mga tag-iya sa radio ug TV networks. Kay ang mga nanambong mao gyoy nagpalihok sa industriya. Ang nagsugod sa kalihokan di taga Manila. Kon dili Sugbuanon: Si Cerge Remonde. Kinsa gawas nga unang taga promdi nga napiling nasudnong tsirman sa KBP mao say labing taas og termino sa kasaysayan sa kahugpongan, unom ka sunud-sunod nga tuig.
-o0o-
Si Remonde, nga nagsul-ob ron sa iyang bag-ong kawo isip Secretary General sa Presidential Management Staff (PMS), maoy pinasidunggang dinapit sa kalihokan. Ang iyang pakigpung gidominahan sa naandan nga litaniya sa mga nahimo sa pamunoan pagpalambo sa ekonomiya, pagmugna og bag-ong kahigayonan sa panrabaho ug pagtukod sa higanteng infrastratura.
Andam na unta kong manghuy-ab dihang gitapos ang iyang pakigpung pinaagi sa paghagit sa tanang nanambong sa pagpangutana niya mahitungod sa bisan unsang aspeto sa pamunoan. Nisaad siya sa pagtubag sa tanang pangutana sa way pagpasalipod sa bag-o lang nabasura nga EO 464 ug sa mas kontrobersiyal nga executive privilege.
Ang kalantip sa mga pangutana gikan sa mga opisyal sa KBP ug ang prangka nga pagtubag ni Remonde nilang tanan nakakumbinser nako nga (1) wa mausik ang akong biyahe dinhi; ug (2) may kapuslanan ang paglingkod sa usa ka Sugbuanon sa gabinete.
-o0o-
Niang pipila sa among mga pangutana ug mga tubag ni Remonde:
· Sige mong pangangkon nga nilambo ang ekonomiya apan nganong kabos man gihapong kinabag-an? Kay 10% sa populasyon ang nagkontrolar sa nasudnong katigayonan busa kinahanglan unang palambuon ang ekonomiya sa pila ka tuig una moabot ang kaharuhay ngadto sa labing kabos;
· Nganong sa Tsina man nangutang ang Pilipinas inay sa naandang utanganan sama sa US ug Japan? Kay mas suod nang relasyon sa Pilipinas ug Tsina gawas nga mas dako ang gigahin sa Tsina nga pahuwaman sa ubang kanasuran; ug
· Unsaon pagtuo sa katawhan sa pamunoan nga si Arroyo wa pa man moangkon sa iyang suliran? Way kagamhanan nga way suliran sa credibility. Di makapanagang ang administrasyon sa tanang pasangil kay may nasud silang giduma, samtang ang oposisyon way laing giatiman gawas sa pagpanaway.
-o0o-
Kon samang Remonde nanubag pa lang ang Malakanyang sa mga pasangil inay nga molihay ug manggukod, di unta sila maapiki karon. Wa ko mouyon sa tanan niyang tubag apan ang pagbukas sa iyang kaugalingon sa mga pangutana nakaiban sa nag-alintabo namong pagduda. [30] leo_lastimosa@abs-cbn.com
No comments:
Post a Comment