SALAMAT SA TABANG
Gilusad sa kadagkoan sa KBP Cebu Chapter ang "Radyo-thon" alang sa mga biktima sa bagyong Frank sa Kabisay-an uban ang dakong panagana nga nakatampo na ang mga Sugbuanon sa relief campaigns nga gipasiugdahan sa mga sibyaanan sa Sugbo ug kasilinganang mga dapit. Ug nga magmingaw ug langawon ang among kalihokan kay nadungan sa welga sa mga sakyanan nga gilusad sa Nadsu ug alyadong mga kahugpongan.
Apan kuwang diay ang among bilib sa kamanggihatagon sa mga Sugbuanon alang sa ilang kasilinganan nga maoy nahiagom sa labing bangis nga kastigo sa katalagman. Labaw ming nasayop sa pagduda sa kalig-on ug kamatinud-anon sa panaghiusa sa mga magsisibya sa Sugbo.
-o0o-
Sa akong pagsuwat ini, dul-an na sa P200,000 ang cash donations nga among nadawat sa booth sa KBP Cebu Radyo-thon duol sa Fuente Osmena Rotunda. Wa ni labot sa cash deposits sa nagkalainlaing mga sanga sa Aspac Bank nga nitabang sa KBP paghimong mas sayon sa paghatag sa hinabang sa mga molupyo sa mga dakbayan ug kalungsoran diin nahimutang ang ilang mga sangang buhatan.
Nakahatod na sab mi og duha ka ten-wheeler trucks sa relief goods ngadto sa social hall sa Cebu Normal University nga gipahuwaman ni CNU Pres., Dr. Ester Velasquez, samtang nangolekta pa mi og igong gidaghanon sa mga sako nga kasudlan sa i-repack nang mga hinabang. Wa ni labot sa mga hinabang nga gihatod sa mga tigpaminaw ngadto sa labing duol nga mga sibyaanan atol sa Radyo-thon.
-o0o-
Ang mga hinabang nagikan sa mga kawani ug mga magpapatigayon nga nagsakay sa ilang pribadong mga sakyanan. Mas daghan ang mga hinabang gikan sa gatosan ka taxi drivers nga mapasalamaton sa kadaghan sa ilang mga pasahero tungod sa welga sa PUJs. Ang kinabag-an sa mga nanabang nag-bisikleta, naghabal-habal, nag-trasikol, nagkariton ug nagbaktas bitbit ang ilang pinutos nga relief goods ug kinasingkasing nga cash donations.
Di mong kabasol nako nga nakaamgo nga kon magtinabangay lang ang mga Sugbuanon, wa gyoy magmingaw kay napasagdan ug wa gyoy mamatay sa gutom o mangligdas uban ang aslom nga mga damgo tungod sa kakutoy sa tiyan.
-o0o-
Sa makausa pa, daghang salamat sa KBP Bohol Chapter ug KBP Negros Oriental Chapter sa ilang pagduyog sa Radyo-thon. Daghang salamat sa mga hinabang sa Cebu City gpvernment, ASPAC Bank, Dunkin' Donuts, Jollibee sa Maxilom ug Colon, CNU ug sa tanang nagpakabana nga mga sibyaanan ug mga magsisibya sa Sugbo.
Ang KBP Radyo-thon wa itumong pagsapaw, hinunoa pagdason lang, sa relief campaigns sa sakop nga mga sibyaanan. Gitumong ang kalihokan pag-abot sa katawhan nga mahimong wa pa maabot sa tagsa-tagsa nga tingog sa mga sibyaanan, apan gipanghinaot nga nahikap sa hiniusang paglihok ug pagpakabana sa kinatibuk-an sa industriya. [30] leo_lastimosa@abs-cbn.com
No comments:
Post a Comment