Arangkada of Leo Lastimosa for June 18, 2008

            PALAWAY NGA SUBSIDY

 

            Hangtod karon wa pay klaro kanus-a makatilaw ang mga konsumidor sa Sugbo ug kasilinganang mga lalawigan sa P500 nga subsidy alang sa gagmay nga mga konsumidor sa kuryente.  Ang Visayan Electric Co. (Veco) ug Mactan Electric Co. (Meco) nagpaabot pa sa mga lagda gikan sa Energy Regulatory Commission (ERC).  Samtang ang Cebu Electric Cooperatives (Cebeco) gisaaran pa sa National Electrification Administration (NEA) og dugang detalye pagpatuman sa subsidy.

            Ang DSWD nipasalig nga mapatuman nang subsidy sa Sugbo ug ubang mga lalawigan sa mosunod nga duha ka semana.  Nipasalig sila nga mas hapsay nang sistema.  Human nagkaguliyang ang ilang pagdirekta og hatag sa P500 ngadto sa matag konsumidor inay ipaagi sa Manila Electric Co. (Meralco).

-o0o-

            Wa pay tubag ang sibaw nga pangutana kinsay makadawat sa subsidy dinhi sa Sugbo ug ubang mga lalawigan.  Ang 100 kilowatthours paubos nga konsumo sa lifeline consumers sa Meralco sa Metro Manila taas ra kaayo kon itandi sa gidak-on sa konsumo sa gagmayng mga konsumidor dinhi sa Sugbo:

·        Ang lifeline consumers sa Veco sa Metro Cebu makahurot lang og 55 kilowatthours matag buwan; samtang

·        Ang lifeline consumers sa Cebeco 2, nga naglakip sa mga dakbayan sa Danao ug Sugbo ug sa 11 ka mga lungsod gikan sa Compostela hangtod sa Daanbantayan, mokonsumo lang og 20 kilowatthours matag buwan.

Ang lifeline consumers nagpahimus nag subsidy gikan sa mas dagkong

mga konsumidor.  Ipatuman bang lagda sa Metro Manila?  O ipatigbabaw ang lahi nga ang-ang sa konsumo sa Sugbo ug ubang lalawigan?

-o0o-

            Si Ethel Natera, tigpamaba sa Veco, wa pa ganing kahibawo kon apil bang ilang mga konsumidor sa kausa-ra-ihatag-nga P500.  Duna silay 70,000 ka lifeline users sa Metro Cebu ubos sa lagda nga gitakda sa ERC.  Kon ipahamtang ang lagda sa Meralco, mas daghang konsumidor ang makatilaw.

            Ang manager sa Cebeco 2, Peter Señeres, niangkon nga 28,000 ka konsumidor sa amihanang Sugbo ang makatilaw sa subsidy kon gamiton ang ilang kaugalingong lagda.  Apan kon ipasikad sa lagda sa Meralco, 68,000 ka mga konsumidor ang mahatagan og tag-P500 nga hinabang.

-o0o-

            Lahi sa una nga bisan way konsumo motakilid ang konsumidor sa gitakdang minimum nga bayranan, karon gitangtang nang minimum.  Ang konsumidor sa Veco nga way konsumo magbayad lang og P5 matag buwan.  Ang konsumidor sa Cebeco nga way konsumo magbayad lang og P2.50 matag buwan.  Matod ni Natera ang lifeline users sa Veco nagpahimus nag 25% nga diskuwento.  Maong inay P300 ang ilang binuwan nga bayranan, kapin na lang sa P200 ang aktuwal nga mabayran.

May sukaranan ang pangigi sa mas dagkong konsumidor nganong gipalaway lang sila sa subsidy.  Nga di unta mahitabo kon paminawon ni Arroyo ang mas yano, sayon ug makiangayong alibyo sa mga konsumidor—ang paglibkas sa 12% nga EVAT sa bayranan sa kuryente.  [30]  leo_lastimosa@abs-cbn.com