LIBRENG VOICE MAILS
Tungod sa pagsutoy sa presyo sa lana, nga gikahadlokang moabot og $200 dolyares matag baril sa di pa matapos kining tuiga, gikahadlokan nga molayat sab ang presyo sa nag-unang mga palaliton ug bayranan sa kuryente ug ubang inadlawng panginahanglan. Labi nang gasto sa pagbiyahe.
Maong samtang gikabalak-an ang pagtidlom sa turismo ug ubang mga patigayon, gipaabot nga molambo ang bag-o ug mas baratong mga teknolohiya sa komunikasyon. Labi nang mga nagbase sa internet. Bisan sa pagkarakara sa mga kompaniya sa ayroplano pagduso sa ilang mga promo aron nga di hingpit nga mokagiw ang ilang mga pasahero, mas madanihon ang alternatibo sa makalilisang nga plitehan sa pagbiyahe—ang pagdangop sa libreng email ug voice over internet protocol (VoIP).
-o0o-
Di kahibudngan nga kisaw kaayong kumpetinsiya tali sa higanteng mga kompaniya sa internet pagpalambo sa ilang web-based email services:
· Ang Yahoo bag-o lang nipahibawo nga gawas sa @yahoo.com, duna silay gitanyag nga laing duha ka email addresses—ang @ymail.com ug @rocketmail.com;
· Ang Microsoft (Hotmail), Yahoo ug Google (Gmail) nagpalabwanay sa kapasidad sa ilang email services—ang Google 6 gigabytes, ang Hotmail 10 gigabytes ug ang Yahoo unlimited;
· Ang Yahoo ug Gmail duna nay built-in nga chat features nga motugot og instant messaging; ug
· Ang Hotmail ug Yahoo mahimo nang magkasultianay, samtang ang Yahoo ug Gmail nagsabutsabot na sab pagsumpay sa ilang instant messaging services.
-o0o-
Ang labing mapuslanon alang nako mao ang VoIP services sa mga kompaniya nga nahisgutan sa ibabaw. Lupig hinuon silang tanan sa Skype. Nga nagpaabot nga makakuha nag 245 milyones ka subscribers karong tuiga. Nakauna na sang Skype pakiglambigit sa mga kompaniya sa telepono aron paglugway sa mas barato nilang serbisyo gawas sa personal computer (PC).
Apan kon gusto ka og libreng VoIP services, di mabentahaan ang tulo ka mga karibal sa Skype. Managsama rang kalidad, bisan kon peer-to-peer (P2P) ang teknolohiya sa Skype. Apan kon magkasultianay nang tulo, lupigon ang Skype sa hinugpong nga gidaghanon sa subscribers sa Yahoo Messenger, MSN Messenger ug Google Talk.
-o0o-
Akong gisusi ang ilang mga serbisyo sa voice mail. Nga mapuslanon kon di magkaabot sa imong contacts online. Unsa ba kasayon ang pagbilin og recorded messages, di lang sinuwat nga mga mensahe, kon offline ang imong gustong ikasulti?
· Ang Skype magpabayad sa ilang voice mails;
· Ang MSN di kapada og voice mails kon offline ang imong contacts;
· Ang Yahoo Messenger nagtanyag og duha ka gutlong libreng voice mails, apan magpaabot kag pipila ka gutling una mapada ang mensahe human nimo na-record; ug ang kampeyon mao
Ang Google Talk nga nagtanyag og napu ka gutlong libreng voice mails, nga maadto dayon sa Google servers samtang gi-record nimo ug makuha sa offline nimong contacts isip attachment sa ilang Gmail accounts. [30] leo_lastimosa@abs-cbn.com
No comments:
Post a Comment