Arangkada of Leo Lastimosa for June 29, 2008

          NAPU KA TUGON

 

          Kon tag-iya kag barko, hinumdomi ning mosunod:

1.      Kon patugatuga kag larga bisan bagyo, kinahanglan nga andam kang moangkon sa responsibilidad kon unsa may mahitabo sa barko, mga pasahero ug mga kargamento;

2.    Ayaw panaginot og usa ka biyahe sa usa ka barko kay kon mabulilyaso mahimong makanselar ang tanang biyahe sa tanan nimong barko;

3.     Kon simbako malunod ang barko ug mangamatay ang mga pasahero, likayi kutob sa mahimo ang pagbasol sa mosunod:

a.     Philippine Coast Guard (seguro kang insultuhon sa Board of Marine Inquiry, kay sila ra man say nagduma, ug peligrong rondahon ang imong container yard, labi kon may gitagoan kang smuggled nga asukar);

b.    Ginoo (seguro kang kasab-an sa mga Obispo); o

c.     Pagasa (daghan untang modason sa imong pasangil, apan nauna na nimog tulisok ang coast guard ug ang Ginoo).

4.    Kon makadawat kag distress call gikan sa kapitan, lihok dayon bisan kon adlawng Sabado ug bisan kon nadaot ang sistema sa komunikasyon tungod sa bagyo;

5.     Kon mopasalig ka nga nilihok dayon ka pag-atiman sa mga pasahero sukad sa unang adlaw, seguroha nga nilihok ka sa una pa lang gutlo, kay lisod ipasabot nganong ang imong laing barko maoy labing kataposan nga nahiabot sa dapit nga nalunoran;

6.    Kon may kargamento kang makahilo nga pesticide itug-an dayon sa coast guard, labi na kon apil sa mameligrong mahilo mao ang divers sa US Navy, gawas kon daghan na kang gitagoan nga wa na kang kahibawo unsay itug-an;

7.     Kon modagsang ang kaparyentihan sa nalunod nga mga pasahero, atimana ug pakan-a dayon sila ug tubaga dayon ang ilang mga pangutana aron nga di kang sabonan sa mayor ug sa media, gawas nga matultolan ra gihapon sa forward billing ang imong buhatan;

8.    Kon may natakda nang birthday party sa imong pamilya, bisan unang birthday pa sa imong apo, sa wa pa malunod ang barko, kanselaha o ayaw ipahigayon sa Cebu Country Club nga bantang sa publiko, gawas nga may kahigayonan nga malilian sa mga kapamilya sa nangamatay nga mga pasahero nga mahimong maglisod pagsabot nganong mora kag si Nero nga nagsige lang gihapon og sadya ug kumbira bisan nagdilaab nang Roma;

9.    Kon ang labing uwahing pagkalunod sa barko di maoy una, nga ikaw na gani diay ang labing daghan og kasinatian sa mga katalagman sa kadagatan, ayaw pangayo og pagsabot nga wa magkadimao ang imong gihimo; ug

     10.  Ayaw pagsalig sa imong koneksiyon sa mga politiko kay silay unang motalikod kon may atraso ka sa publiko, labi na kon naatlan ang labing dagkong mga opisyal nga tua sa gawas sa nasud, kay peligrong ikay isakripisyo pagtago sa ilang paglulinghayaw ginamit ang buhis  sa katawhan samtang nag-ilaid ang nasud sa katalagman.  [30]  leo_lastimosa@abs-cbn.com