Arangkada of Leo Lastimosa for June 19, 2008

            HAWOD SA FINALS

 

            Karong kampeyon nang Boston Celtics, ang bugtong makaribal sa katam-is sa labing unang kampeyonato nilang Kevin Garnett, Ray Allen ug Paul Pierce ug sa labing unang korona sa Celtics human sa 22 ka tuig mao ang kahaw-ang sa makapakugang ug labing masaaron nga season ni Kobe Bryant human sa pagbiya ni Shaquille O'Neal sa Los Angeles Lakers.  Usa ka tuig human siya nidemanda nga mobalhin og laing team, bisan ang labing higpit niyang mga kaatbang naglisod pagsalikway sa panganti ni Kobe paghimo og kasaysayan pagkuha sa kampeyonato human nauwahi og 3-1.

            Apan tungod sa dominanteng 39 puntos nga kadaogan sa Celtics ug sa kamingaw sa 22 puntos nga nahimo ni Kobe, kapasanginlan siya nga igo lang nipabuhi sa dugo sa iyang kaubanan ug mga dumadapig.

-o0o-

            Maong nasubli sa makausa pa ang di kalikayan nga pagtandi niya ngadto sa giisip nga labing maayong magduduwa sa basketball sukad masukad—si Michael Jordan.  Matod ni Maglilindog Chris Broassard sa ESPN si Jordan nakasud sa playoffs sa matag tuig sa iyang pagduwa sa Chicago Bulls.  Bisan sa katuigan nga iyang kaubanan mao ang wa mailhi nga sila si Quintin Dailey, Dave Corzine ug Gene Banks.

            Si Kobe napakyas pagsud sa playoffs sa 2005 bisan kauban niya silang Lamar Odom ug Caron Butler.  Matod ni Broussard kon si Jordan pay nangu sa Lakers di mahitabong tugotan niyang papason sa Celtics ang 24 ka puntos nilang labaw.  Ang labing dakong labaw nga nausik sa Bulls mao ang 13 puntos batok sa Portland Trailblazers sa 1992.  Apan kitang tanan nahibawo nga gidaog ni Jordan ang nisunod nga duha ka duwa pagsakmit sa kampeyonato.

-o0o-

            Alang sa mga batan-on nga wa nang kaabot, niang labok ni Jordan sa NBA finals:

·        Si Jordan ang MVP sa unom ka NBA finals, way laing magduduwa nga nakadaog ini og labaw sa tulo, si Kobe way bisan usa;

·        Ang average ni Jordan sa finals—33.6 puntos, 6 rebounds, 6 assists, 1.8 steals, 2.4 turnovers sa 48% nga shooting sa 43 minutos matag duwa;

·        Sa iyang labing unang finals batok sa Lakers sa 1991, si Jordan may average nga 31 puntos, 11 assists, 6.6 rebounds, 1.4 blocks ug nakapasud og 56% sa iyang shots; ug

·        Nag-average siya og 35.8 puntos sa 53% nga shooting batok sa Portland sa 1992, ug 41 puntos, 8.5 rebounds ug 6.3 assists sa 51% shooting batok sa Phoenix sa 1993.

-o0o-

            Apan makalantaw si Kobe sa mas sanag nga sunod season.  Kanus-a mobalik pagduwa ang batan-on nilang sentro nga si Andrew Bynum.  Nga makadugang sa kalig-on sa ilang mga higante nga silang Pau Gasol ug Odom.

            Apan di angayng mataligam-an nga si Bynum nakaduwa sa duha ka engkuwentro sa Lakers ug Celtics sa regular season.  Ug, nakatag-an mo, pilde sang Lakers sa duha ka duwa.  [30]  leo_lastimosa@abs-cbn.com