Arangkada of Leo Lastimosa for June 27, 2008

          KBP RADIOTHON

 

          Ang National Bureau of Investigation (NBI) naglaraw sa pagkuha og DNA samples sa tanang patayng lawas nga maugkat gikan sa kabangis sa bagyong Frank.  Kini aron paglikay sa kaguliyang nga gikahadlokang moulbo sa pag-ila na unya sa mga paryente sa mga patayng lawas, labi na sa gipangagpas nang daan nga pagtumutumo sa mga tawong may laing mga tinguha gawas sa paghatag og tarung nga kapahuwayan sa ilang mga minahal sa kinabuhi.

          Di barato ang plano sa NBI.  P20,000 ang gasto sa DNA sampling sa matag patayng lawas.  Nga kapuslan lang kon ipaubos sab og DNA sampling ang duha ka mangangkon nga mga paaryente sa patayng lawas.  Kon maugkat ang kapin sa 800 ka patayng lawas sa mga pasahero sa MV Princess of the Stars, magbuntaog gyod ang gasto.

-o0o-

          Ang Sulpicio Lines wa pa mopassalig pag-abaga sa higanteng gasto pag-ila sa mga patayng lawas.  Nga lahi kaayo kon itandi sa kamanggihatagon sa laing kompaniya sa barko nga nahiagom sa samang bulilyaso niadto.

          Niadtong higayona, gida sa Manila ug gilibre sa barko ug hotel ug pagkaon ang kaparyentihan sa mga biktima hangtod nga nailhan ang tanang patayng lawas ug natibway ang tanang pangutana.

-o0o-

          Aron pagtubag sa dakong panginahanglan pagtabang sa kaliboan ka mga biktima sa lapad nga kadaot sa bagyong Frank, ang Kapisanan ng mga Brodkaster ng Pilipinas (KBP) Cebu Chapter molusad og radiothon karong Lunes.  Ang 30 ka mga sibyaanan sa radyo sa Sugbo mopabati sa ilang hiniusang tingog gikan sa alas-6 hangtod sa alas-7 sa buntag pag-awhag sa mga Sugbuanon pagtabang sa labing naalaot sa bagyo di lang sa Sugbo kon dili apil na sa kasilinganang mga lalawigan.

          Ang KBP Cebu Radiothon manukad sa Fuente Osmena, nga maoy labing sayon nga kahatdan sa mga tigpaminaw sa ilang hinabang, ug maglakip sa live point sa Cebu City Sports Center, diin padayong nagtapok ang gatosan ka mga kabanay sa mga pasahero sa nalunod nga MV Princess of the Stars.

-o0o-

          Atol sa General Membership Meeting sa KBP Cebu Chapter gahapon, nauyonan nga paningkamotan sa mga magsisibya ang pagtapak sa dakong kang-a tali sa mga biktima sa katalagman nga giuhaw sa kasayuran ug sa Sulpicio Lines, ug Philippine Coast Guard nga nagpabiling mapanagan-on sa pagtug-an sa labing bag-ong kalamboan sa ilang mga paningkamot pagtabang.

          Nga gihimo na sa indibiduwal nga mga sibyaanan karon.  Ang mahimo sa KBP mao na lang ang pagpalambo sa kalambigitan sa mga magsisibya ug sa mga tinubdan sa balita.  Aron makuha ang labing kasaligan apan di bahaw nga mga kasayuran.  Ug aron mahimo ang mga sibyaanan nga labing kasaligan nga mga tinubdan sa kasayuran apan di sab mahimong mga turutot sa mga ahensiya nga may gustong tagoan nga kamatuoran.  [30]  leo_lastimosa@abs-cbn.com